Soukapwüng 1:4-14

⁴Lupwen ra feila maun, ewe Samol mi Lapalap a awinner, pwe ra akufu ekewe chon Kanaan me chon Peris. Iwe, ra niela ükükün engol ngeröü mwän me leir me lon Pesek.

⁵Ikenan ra sereni ewe king Atoni-pesek o maun ngeni, ra pwal akufu ekewe chon Kanaan me chon Peris.

⁶Iwe, Atoni-pesek a süla. Nge ra tapweri, ra liapeni o pöküela aütülapen pöün me pechen.

⁷Mürin, Atoni-pesek a apasa, “A wor fik king üa pöküela aütülapen pöür me pecher, ra achchupi ener me fän ai chepel. Usun üa föri ngeniir, iei usun Kot a pwal föri ngeniei.” Iwe, ra emwenala ewe king Jerusalem, nge a mäla ikenan.

⁸Iwe, ekewe re Juta ra maun ngeni Jerusalem. Ra liapeni o niela chon ren ketilas, ra pwal kenala ewe telinimw.

⁹Mürin ra feila pwe repwe maun ngeni ekewe chon Kanaan mi nonom lon ewe fanü mi chukuchukutä, lon ewe fanü Nekep, pwal lon ewe fanü tekison.

¹⁰Iwe, chon Juta ra pwal feila maun ngeni ekewe chon Kanaan mi imweimw lon Hepron. Nge iten Hepron me lom Kiriat-arapa. Iwe, ra akufu Sesai, Ahiman me Talmai.

¹¹Iwe, seni ikenan ekewe re Juta ra feila o maun ngeni chon Tepir. Nge iten Tepir me lom Kiriat-sefer.

¹²Nge Kalep a apasa, “Iö epwe maun ngeni Kiriat-sefer o liapeni, üpwe ngeni nei föpwül Aksa pwe pwülüan.”

¹³Iwe, Otniel nöün Kenas we mwän, nge Kenas pwin Kalep kükün, a liapeni ewe telinimw. Mürin, Kalep a ngeni nöün föpwül Aksa pwe pwülüan.

¹⁴Nge lupwen neminewe a feito ren Otniel, ätei a pesei ngeni pwe epwe tüngorei saman we eu tanipi. Neminewe a tötiu seni wan aas, nge Kalep a aisini, “Met ka mochen?”