GWAY GI IDAWUU’D 94:1-11

¹Ayy Tap̱a, /e tana Arumgimis jin ri’cki’da ri’c mo. /E tana Arumgimis jin ri’cki’da ri’c mo tani dhalki /e kushki mo mo.

²Cuyi mis mo, ayy /e jin tana Amandwall mony’cesh gwo mo. C̱iki uni gwahan kun dhu is ki ca tom buni kun ’dap̱a uni ki ’dap̱ mo.

³Ayy Tap̱a, ki mo gi wakata imina uni kun ta thus ki thus i’ko mo? Ki mo gi wakata imina uni kun ta thus ki thus ’ko mo mmop̱e ki bwaŋ ’kunyu’d mo?

⁴Uni wolki gwom p̱us buni kun dhunu uni ’ba/ ki ca ka pije/ mo, uni dhu ’ba/ ki ca mo, aris uni ’baar mo kun miiki tonthus mo.

⁵Uni siri’cki ’kwanim pini ap̱o/ ki sho’k mo, ayy Tap̱a, dhali wa’th mal pini i e mo.

⁶Uni ki ’kosh up̱a dhalla/ mo dhali uni kun ii ii yilkina/ mo, dhali ta iman’kosha mee ki ’kwani kun dar gi icom mo.

⁷Dhali uni ki o gwo mo ki: Tap̱a mishki toŋ kamu/ p̱ar eya? Arumgimis ma Yakuub a’di mish toŋ kamu/ nyiṯẖa/?

⁸Mishi gwo ’ban ma, ayy ’kwani kun ta dholgon ki dholgon mo. Um kun tana rwa/e/, ki um mini yuḵ kakasja mo?

⁹A’di jin uḵki gu’ban’ce mo tani mina a’di diki ciḵ gwo mowa? A’di jin uḵki e mo tani mina a’di diki p̱ar mo e mowa?

¹⁰A’di jin dorki kal gi ’kwaniny’cesh mo tani mina a’di diki dora dor garaa? A’di jin ṯorki ’kwani gwo mmonyiṯẖ to mo tani,

¹¹Tap̱a a’di mishki to kun kuluma ’kwani ibwa mo, ki uni ta toŋ kamuwa? ayy jasa wulp̱e/ ’te/ mo.