GWAY GI IDAWUU’D 69:14-36

¹⁴Ki mowoṯẖ pini jin ta isiŋ gana/ mo tani ’cwami aha/ mo ’peni boro’th jin loski aha/ mo. Dhalki aha/ ’cuḵu mo ’peni ’kwani kun ta ’kup̱ ki aha/ mo dhali ’peni yi’de/ kun ’kula’kul kun shwana nyor mo.

¹⁵Dhalku/ ki dhala gannu/ yi’de/ bway mo mmodhi’th aha/ sho’k mo, walla moŋ’kul piti mmolos aha/ mo, walla jisa ’kulga/ mmomu’th ’twa/ ap̱o/ aha/ mo.

¹⁶’Thoḵi aha/ ’twa/ mo ma ayy Tap̱a, haali/ mo/en pini jin ṯelu sho’k mo a’di ’bora’bor mo be. Isi ki gwo gi momiimiim pini jin ishki’d ka enthus mo tani ṯu’kki/ aha/ is mo.

¹⁷Dhalku/ ki bag jis/em pini ’peni c̱iŋkinam pini mo. Haali/ aha/ dina e mo ma c̱is mo tani huru/ ki jahanne/ mo mmo’thoḵ aha/ ’twa/ mo.

¹⁸’Dishi aha/ is mo dhali wani aha/ ’ba/ mo, dhali kari aha/ ki ’kus ’peni ’kwani kun ta ’kup̱ ki aha/ mo.

¹⁹/E mishi mowaḵ pem jin waḵu aha/ mo, dhali mo ma ’the is pem mo dhali mo jin ’konuki taḵ aha/ mo. Aris uni gun ta ’kup̱ ki aha/ misha /e mo.

²⁰Asor ’ce’dkina dum pem bwa mo, wakan a’di itaka/ buṯkan ki buṯkan mo. Aha/ ŋap̱a mo jin minu ’taki hil aha/ ki mo ma ’thime/ ki mo/en mo tani hili aha/ gama wathiŋ kamu/ yisa. Dhali aha/ ŋap̱a ’kwani mmo’taki malas aha/ mo tani, hili aha/ dinaki gam jaŋ kamu/ mo.

²¹Uni c̱iki aha/ aṯi’d tonthus e tonṯe/ mo, dhali gom yi’de/ jin bu’thki aha/ mo tani uni c̱iki aha/ yiman tom’pac̱a’d mmop̱i mo be.

²²Dhalki tonṯem buni jin shwana uni atharabeesa mo warki’d ka gume/ ibwambori uni mo. Dhalki tom buni kun ’ciṯẖu/ ’kus mmomiiya bas goma yuḵ jin yuḵu ka tul ’kup̱ mo warki’d ka gume/ mo.

²³Dhalki em buni a’di dhurumkunu mo mo, wakan ki uni mini ’koki p̱ar mo e mo dhali dhu ki uni empa’d buni mmodee ki sule/ sule/ mo.

²⁴Woli anyor pini jin deḵkina /e ap̱o/ uni mo, dhali dhalka nyor buni jin pura /e ki o’d kumki uni ’twa/a ’cesh mo.

²⁵Dhalki gu’ba’kum buni taki bwam ma’du/ mo. Dhalku/ ki dhal jan ṯal ’deŋ kamu/ bway mo mmoc̱a’b e gu’b burrinyem buni mo.

²⁶Haali/ uni ṯo’cki a’di bwa mo a’di jin dorkina /e mo, dhali a’di jin taḵkina /e jama/ mo tani uni ’kon naskina/ mmoṯo’c a’di bwa ki nyanye/ mo.

²⁷Dhuki uni ajisa i is mo. Dhalku/ ki dhu uni mmodhu ka p̱o/ ’peni /e mo.

²⁸Dhalki uni ’koshu gway buni ’pena warka/ gi mondiki/e mo, dhali uni minu ’koki ’kwar gway buni e bwamana warka/ nyaḵki ’kwani kun tana ḵar/e mo.

²⁹Hili aha/ wo’ckunuwa du she/ mo dhali ’kaa du she/ mo, Dhalki bwaya ḵar/em pini, ayy Tap̱a Arumgimis, kar aha/ e mo jin ḵa’dama/ ḵa’dam mo.

³⁰Aha/ mina maŋ gway ma Arumgimis ki gway jin yuḵu mo. Aha/ mina eḵ a’di ki bwa jin ’boruwa ’bor i is mo.

³¹Mii yansan a’di imidi ’bor Tap̱a bwa kagahara mmobola morbip̱ e mo, walla rasim bip̱ jin ’kana je mo dhala cuḵ mo.

³²Dhalki uni gwansan kun siriju/ ki sho’k p̱ar mii e mo dhali ’kuny bwa mo. Dhali um gwansan gun simmkina Arumgimis e mo tani dhalka dum bum tashu e mo doḵ/e.

³³Haali/ Tap̱a a’di ciḵki gwo mo ’peni uni gun mini mii ta gi to mo, dhali a’di diki waḵ uni gun ta unim piti kun deḵkunu mo.

³⁴Dhalki momis dhali mony’cesh maŋ a’di mo, dhali dhan ḵumma/ yi’de/ dhali aris to ’baar mo kun ḵalki ya e bwaman a’di mo.

³⁵Haali/ Arumgimis midi ta Sihyuun is is ki me’d mo dhali nyaŋ ka Yahuuda/ ’peŋkuman bampam piti doḵ/e mo. Dhali uni gun ta c̱iŋkinam piti mo tani mini ’ko e mo yan mo dhali bu’th a’di mo

³⁶dhali uc̱i gi c̱iŋkinam piti mo tani midi ta mal piti mo, dhali uni gwansan gun eni gway piti mo tani mini ’ko e bwaman a’di mo.