Samu 69:14-36

¹⁴Ipwa injunya yalyilyu dokona nyisape. Nambana yanda pimwai dee ipwa andake dolapona nenge rekya lao nyepe.

¹⁵Namba ipwa palyuo koo mange nelyamo dokome nyuo koko palya nanale. Namba yuwale kyasisi londe dokona malu pisi kara narowale.

¹⁶Kamongo embena mona reto puu penge keyange dokona piso pii yano pyaka. Embena saka renge palenge doko paleta namba keta ipupi.

¹⁷Embena kendemande akali doko kandele kanda nale lao kara napipi. Namba angi randa nyilyu dokona dakepa embame nyisa.

¹⁸Namba keta epapala nyisape. Nambana yanda pimwai dapwana namba nenge rekya lao nyepe.

¹⁹Nambana kingi doko kokwa soo lao koo keta palyamisa elya nyilyu doko emba silini. Embame nambana yanda pimwai dupwa peparae kandasi karene.

²⁰Kingi kokwa soo laminyi dokome nambana mona doko kwaepyasa namba kopyali pakana palamo. Namba dopa pyuo pilini lao mendeme kenda dokona nakanju sepala mona minyaramburami kandena lao lengenyipunu dokopa mendali daa ingilyamo.

²¹Namba lopo piyamo dokopamauli nyuo jiyami. Namba ipwa nano piyamo dokopa ipwa waene kau pingi doko nyuo jiyami.

²²Nakamana pati andake laminyi dupwame nakama kokwa sinyi nembo penale. Nakamana nenge nenge yuu gii dokona kone makarami dokona mangena minyinya.

²³Pyao lenge kwaenyi nembape. Nakamana mata dupwa poraiya nanale lao pipi.

²⁴Embena imbu singi doko nakama keta kulimbwanyi palyapala imbu singi dokome pyao yamasu pyanyi palyape.

²⁵Nakamana piso palyuo pyuo papilyaminyi panda doko mee apa sinyale. Nakamana komau anda dokona mendepe lenge rao see nanale.

²⁶Embame koo piyaminyi pyao yano nyiinyi dupwako randa mailyaminyi. Nakamame embame pyao ranjama nyiinyi wambu dupwanako pii lakamyuo palaminyi.

²⁷Nakama lete parami panda dorena maiya narene. Nakamana koo dupwa mondo lao pepana pyao retakamyuo karape.

²⁸Lete karengena buku dokona nakamana kingi doko kwuanyi nembasi palena. Nakama embena wambunya kingi silyamo dokona sisara daa.

²⁹Namba mona rando mona kendo pilyu. O Anatu, embame namba minyalyuo nyepala nyisape.

³⁰Nambame banya lao suu pyao kenane romope lao rana isa poko baa suu pyao kararo. Banya yulu keyange wakasa dupwana namba banyalao sangyu lao lao panaro.

³¹Renge dokome Kamongo baa rae mainyipyambwaramopa mena bulamakao kali kameya mairaminyi dupwa mee ingyuo para.

³²Pendewa dupwame doko kandaraminyi dokopa raeme kumarami. Dopako pyuo Anatu kingi lenge wambu dupwa dokome porainyi pyambwaramo larami.

³³Kamongome bange yano pilyamo karelyaminyi dupwana pii doko soo nyuo dee banya wambu karapusi palenge dupwa kame see naowako karo pingi.

³⁴Anatu baa yake yuupi laparaeme lakando wee kenanepe lena. Ipwa kota dee bange wasiyamo silyamo dupwa opetaeme baa lakandena.

³⁵Baame yuu Jerusaleme doko nyiso Juta wambunya taone dupwa dee kamba pyakamira dokopa banya wambu dupwa dokona yuu rombo pyao nyuo nao palirami ingilyamo.

³⁶Banya kendemande wambunya para pyao nyerami. Wambu baa mona retarami dupwame dokona panda nyuo nao palirami.