GWAY GI IDAWUU’D 65:3-13

³haali/ gom gway gi miinthus mo. Ki gwondhaŋ bana p̱iki ana e mo, /e gwamki uni mo.

⁴Mom’bor mii gom a’di jin kwanykina /e mo dhali guyu/ mmo’dish mo is mo, dhali mmoc̱a’b e bwaagoŋ pini mo. Am minu kap̱ mo ki miim ’borgam pini mo e gu’b pini mo jin ta gu’b pini gi mondheleladhelel mo be.

⁵Ki dhan miim pini kun miikina /e kun caaca mmothoḵ am ’twa/ ki mony’cuḵ mo, ayy Arumgimis bam jin ta bway mowoṯẖ mo, /e jin ta mo ma ’teŋ kap̱e/ goma ris ’kwani kun ’kokin e ’pemen gi mony’ceshi ’baar mo, dhali uni kun si’dkin mo e bwamp̱owa ris ḵumma/ yi’de/ mo.

⁶/E ki mom’bi’th is pini mo tani /e ṯelki dhan wosh kun turatur sho’k mo, mmoc̱u’th gi mo ma dem dem mo.

⁷/E jin doshki yi’de/ jin mii’da ḵuku/ ḵuku/ mo, dhala ḵuku/ ḵukum buni jin birkina uni bakal mo, dhala dulaṯṯ gi ’kwani mo,

⁸wakan uni gwansan gun ’kokin e mony’cesh jin si’dasi’d mo tani, uni ḵo/ki is gom jamas miim pini mo. /E ki dhal mo jin yana ya gi mon’thamo/ mo dhali mom’pimpili/ mo mmoḵum cuuwa/ gom bwaŋ ’kunyka/ mo.

⁹/E buṯkin e mony’cesh mo dhali wol a’di yi’de/ mo, dhali /e ’kummki a’di ki ’kumm jin caaca kagahara mo. Yi’de/ ma Arumgimis kun son a’di ’tu’dki mo mo. /E ki ’twaḵ emen buni mo, haali/ wakan /e thosonki a’di mo be.

¹⁰/E wolki a’di yi’de/ ka ceŋjal kun ishkin ka enthus mo, dhali thoson a’di jil piti mo, mmodhal a’di ki c̱o’do/ mo ’pena p̱iriny ma sho’k mo dhali /e ki ’bor a’di mii mo gom ca jin cana a’di mo.

¹¹/E shumki yil gi mo jin isha to ka enthus kun ta kum pini mo. Jil jin dir ma arabiyyam pini mo tani uni wolki ’twa/ mo ki momoṯ jin momoṯkina uni mo.

¹²Mo ma shon dhii/i’d gi mombwaasho mo tani wolki ’twa/ mo, dhali aris woshi ’baar mo uni ’kamki is buni ki moŋ’kuny bwa mo.

¹³Ashom bip̱ uni hi’thki is buni ki mo ma ma’diny mo, dhali embul wosh uni hi’thki is buni ki pos mo, uni ḵumki cuuwa/ mo dhali yuḵ gway mmonṯal ’de/ ki moŋ’kuny bwa mo.