Salmos 65:3-13

³Mana allita rurashäcunaga binsiycämannami. Chaypis gamllami llapan juchäta perdunamanqui.

⁴Cushishami cawanga acrashayqui runaga. Paycunawanga wasiquicho iwalmi goyanqui. ¡Chaychöga gam tarichimashayquiwan sacsashami goyashäcuna!

⁵Nogacunata salbamaj Tayta Diosnë, mañacamushäta wiyamashpayqui fiyupa allicunata rurarmi yanapaycämanqui. Gammanmi yäracamun llapan nasyuncho tiyajcuna, may caru lamarpita mas carucho tiyajcunapis.

⁶Gammi munayniquiwan callpayquiwan sumaj tacyaraycächinqui llapan jircacunata.

⁷Gammi chawächinqui lamar yacu wayrawan gaparar pullchajyaycajta, runacuna shanaypa shanar gaparpaycajtapis.

⁸Cay pachacho tiyajcuna may carucho carpis almiraypajta rurashayquita ricar fiyupami almirasha. Pachapa jucaj cuchunpita jucaj cuchuncamami runacunaga cushicurcaycan.

⁹Gammi ricaycanqui cay pachataga. Tamyachimunqui. Micuycunatapis wayuchinqui. Gammi rïgutapis pargunqui achca mayu yacu aywajcunawan. Chaynömi chacrataga camarinqui.

¹⁰Cay pachacho caj ragracunaman gammi yacuta juntachinqui. Chacrapa llapan curpancunatapis ñuchuchinqui. Allpacunatapis tamyawan ömichinqui. Bindisyunniquiwanmi llapanpis alli wayun.

¹¹Gampa bindisyunniquiwanmi watapis watacharcun. Maypapis tamyachishallayquipami micuypis alli wayun.

¹²Chunyaj chaqui jircacho caj guewacunapis berdiypa berdiycanmi. Puntacunapis cuyayllapämi caycan.

¹³Intëru pampacunachömi uywacunapis juntasha caycan. Guechwa pampapanami rïgucuna juntaraycan. ¡Llapanmi cushicuypita cantashpan gaparpaycan!