GWAY GI IDAWUU’D 45:2-16

²/E ta a’di jin onu bwa ki nyanye/ ki iya/ gi ’kwani mo. A’the a’di wolkunuwa p̱owa le’d pini mo. Wakan Arumgimis ’borki /e mii ki sule/ sule/ mo.

³Deḵi gandal pini ap̱owa wum pini mo, ayy /en ’de/ jin c̱a’bki dem dem mo e monycam pini mo dhali e mo/eḵ pini mo.

⁴E mo/eḵ pini mo tani meri mo e mo jin p̱inu mii e mo gom gway gi gwoŋ gana/ mo dhali gom mo jin minu cesh she/ mo gom mo jin minu dhu bwa ki gwa’d ki miiŋḵar/e mo. Dhalki me’da bim poros pini ṯorki /e gwo gom dhan mii jin caaca mo.

⁵Athop̱am pini uni kaaka mo eya du uni kun ta ’kup̱ ma maliḵ mo. Dhali ’kwani ṯa’kkin e bwaŋ’kwariny pini mo.

⁶Ḵursim pini a’di ta ji ma Arumgimis jin di’d ki sule/ sule/ mo. Cwa ma maliḵ pini a’di ta cwa jin ’konuki mii mii ka gwar ’de/ mo.

⁷/E eni mo jin miinu miiŋḵar/e mo dhali shi/ mo jin miinu to gun ’coḵa’coḵ i e mo. Wakan Arumgimis jin ta’da Arumgimis pini mo tani a’di ’koshki /e ki monyca mo ka yin gi mom’bor bwa ap̱o/ uni gun ta cim pini mo.

⁸Burrinye/ ma p̱om pini a’di ter mo kagahara mo gom yiman cwaŋ ḵuyu’d ’pena murr dhali yiman gi cwa jin wana e ka ’kwaṯan mo dhali yiman cwa jin yuḵu gway ka saliiḵa mo. ’Peni mo ma maliḵ pini jin ta sheny je mo tani ashun dheŋdhenye/ uni buḵkunu mo mmo’kuny /e bwa mo.

⁹I’bwa/ gi imaliḵ mo uni ’koni bwaman up̱ pini kun taḵu mo. E me’da bim poros pini mo tani ayim jin ta asha maliḵ a’di doshki’d ki ’dolkon ’peni Pa Up̱ir jin hidhu i/is ma yim mo.

¹⁰Ciḵi gwo mo ma, ayy ’bwa/um, dhali mishi isi gwo dhali ḵa’di ’cem pini mo. Dhalki ’kwanim pini ’pen mo dhali gu’b gi icim mo.

¹¹Dhala maliḵ mina bwa o gom jarom pini mo. Me’d jin tana a’di tap̱am pini mo tani luŋi a’di mo.

¹²’Kwani gi Pan Sur uni mini sus mo ma ’them pini ki to kun c̱inu ki me’d mo, uni ’peni ’kwani kun ta pa ki pa mo,

¹³’pena ris to gun ’kona e ki she/ ki she/ kun tanu mo. ’Bwa/ ma Maliḵ a’di shumkunu ki burrinye/ jin shonu ka ce e ki ’dolkoni e mo.

¹⁴Ka ris jamas burrinye/ ki she/ ki she/ mo tani ayim suskunu amaliḵ mo nyaḵki nyaranyaŋa’b ma yim jin suski a’di mo, uni gun iiyin nyaḵka yim mo.

¹⁵Ki bwaŋ ’kunyu’d dhali ki bwaŋ ’kunyka/ mo tani uni sus uni mmonṯal ’de/ mo me’d jin cic̱kina uni gu’b ma maliḵ mo be.

¹⁶Mmodhal mii yansan e i is gom ibabam bum mo tani a’di midi ta iya/m bum mo. Dhali /e mini dhu uni mmota iya/ gi mony’ceshi ’baar mo be.