Psalms 45:2-16

²Ni kari ningo yawara, se kari bo bo nika iwita mena; nika kiring mu marolila ko den karogo; Kaem uwutata nika beteram owore te se nu pempem la marak ningo kisu lagoso.

³O king sokel karogo, nika saenang to ale ka luan karogo ituwurko; ni ka nip biya se ka sokel aora biya mu kager ko bala iwita tugumko.

⁴Ni nip biya mu karogo kager te namar ale marirerko; nika kager mu, den nunguning se bagara ningo diram mu ko ni kagersam; namar ale kiwem bibiya bitarko.

⁵Gatu mare kore tamatama mu kager kari memek nokosopas atumu barurumumonko; sor sor ko kariimet nika siwik duap ningi la kapamonko.

⁶O Kaem, nika king ko bagara mu pempem la butata lagerko, se munan ningo diram mu nika king ko tam iwita, nika kingdom te bitaruko.

⁷Ni munan ningo ko kua lagasam ale munan memek mu ni biriruwusam; buta se Kaem, nika Kaem, mu amilmil oil sipiling te waram, ale ka saki alo nunga ningi, ni kualala biya ka beteram se bagasam.

⁸Ni guang balayam nagurem mu mel siring yawara yawara karogo terong mam; nika kawam bala duap duap wore te bala tuman, ale ni amilmil kisimonko gita te wur yagowom gurugusan.

⁹King saki nunga nanawusari se imet nunup bibiya mu karogo taiman; se imet ni ilak nimi kiting ilup se nika niwus ko bagarukko mu, kiting sengam mu te, sor Ophir ko bala gold te nungurman mu naguram ale bagoso.

¹⁰Ikiko, aga nanawus, degewa gurugu ale den imi ikiko: Ni ka kariimet se ka niet ko kawam digo lilim biring tuiko.

¹¹Se king ka amilmilaruk, ale ka kema motam balayam mu ko kueruk, se ni nup biya tui se nu nika bituokko.

¹²Sor Tyre ko kariimet nungumik mel suen biya karogo mu gemang kulukurmonko munan duap duap karogo tai kisimonko.

¹³Imet kulak king aguwam mu ko guang mu nikim ago se gold awote biliwilik bagara se ko ariga yam yawarakala;

¹⁴se ko melmasak mu karogo diruwuman ilak king kote namaman; se itiwik kulak noko saonga mu karogo nunga diruwuman nongorak namaman;

¹⁵nuna amilmil te nongorak king ko kawam ningi kasu naguman.

¹⁶O king, nika kuriang kari bilangamon, ale ni, ka niet alo nongorak iwita, nina nigiwim tamon ale ninga ali sor bitarmonko.