GWAY GI IDAWUU’D 24:1-7

¹Mony’cesh a’di ta jin Tap̱a mo dhali mon’tu’d piti mo, mony’cesh dhali uni gwansan gun ’koni bwaman a’di mo.

²Haali/ a’di nyaŋki a’diya p̱owa ris ḵumma/ yi’de/ mo dhali ṯel a’di sho’k mo ap̱owa ris yi’de/ kun son mo.

³Kaja a’di imidi shin ’kuwosh gi Tap̱a mo? Dhali kaja a’di imidi doshi mom piti jin ḵogu mo?

⁴A’di ta a’di jin mina me’di dheleladhelel mo dhali adu jin dheleladhelel mo, a’di jin diki ’deka ḵashiram piti ’kup̱ ki gwo jin ’ce’du/ ’te/ ka ṯor mo dhali jin diki thul gwo me’da p̱o/ ka he’k e mo.

⁵A’di midi bu’th mom’bor mii ’peni Tap̱a mo, dhali mo gi yeyunum piti ’peni Arumgimis gi bway gi mowoṯẖ piti mo.

⁶Me’d uni ma nyaḵum yil gwansan kun simmki a’di e mo, uni gun simmki jis/e ma Arumgimis ma Yakuub e mo. Doshi ma dhali ’cunycuri yan mo.

⁷’Deki ’kup̱ bum ki mis mo ma, ayy aris ’twaŋkala goŋ mo, dhali um minu ’de’k mo, ayy arisa campur kun tana dhamo/ mo, jin min ma Maliḵ gi monyca yayu/ bway bwaman mo.