GWAY GI IDAWUU’D 145:1-10

¹Aha/ mina kar /e ki ca mo, /e jin tana Arumgimis pem mo dhali aMaliḵ pem mo, dhali ’bori gway pini mii ki sule/ sule/ mo dhali ki sule/ sule/ mo.

²Isa yempa/ aha/ mina ’bor /e mii mo, dhali maŋ gway pini ki sule/ sule/ mo dhali ki sule/ sule/ mo.

³Tap̱a a’di icaaca mo dhali a’di ica’d jin minu maŋ mo, dhali dhan cam piti minu ’koki gu’d ’kup̱ mmodoṯ mo.

⁴Anyaḵum yil gi ’kwanin ’deŋ kamu/ mini maŋ miim pini ka nyaḵum ’kwani yilan tiya mo, dhali uni mini bah dhan mii ma dem dem pini jin ḵala /e ki mii mo.

⁵Gom monyca ma ra/ ra/ pini mo dhali mo/eḵ pini mo dhali aris to kun miina /e ki momer mo tani aha/ mina kulum uni ibwa mo be.

⁶’Kwani mini bah dhan mo ma dem dem ma purem pini jin ḵala /e ki mii mo, dhali aha/ mina bah dhan monycam pini mo.

⁷Uni mini gac̱ miin tom pini jin ishi’d ka enthus ki gway pini jin tor /e ḵarash gom tom ’boron mo dhali yuḵ gway ki ’kal ’kal gom mo ma ḵar/em pini mo.

⁸Tap̱a a’di ta’da manmii mii ka ’the mo dhali amanmiimii mo, anyor piti maŋgala she/ mo dhali mo/en ishki’d jin ṯelu sho’k mo.

⁹Tap̱a a’di ’bora’bor gom ’kwani ’baar mo, dhali bwam ma ’thimem piti ki mo/en diki’da p̱owa ris ’kwani ’baar mo kun uḵkina a’di mo.

¹⁰Aris miin tom pini mini c̱i /e bwa jin ’boruwa ’bori is mo, ayy Tap̱a, dhali aris unim pini kun dhunu ki she/ ki dhelel dhelel mo tani uni mini ’bor /e mii mo.