Kap 145:1-10

¹Dewit dakon kap kɨnda. Kap on Piŋkop dakon man aŋkɨsik dakon kap. Piŋkopno ae Kɨla Amɨn Madepno, bɨsapmɨ bɨsapmɨ mango aŋkɨsikeŋ.

²Gɨldarɨ gɨldarɨ mango aŋkɨsikeŋ. Dagok dagogɨ mɨni gak aŋkɨsiŋ wɨgɨkeŋ.

³Yawe uŋun mani wukwisi, do mani aŋkɨsiŋ kɨmotneŋ. Mani wukwisi, do uŋun dakon mibɨlɨ kɨsi amɨn da arɨpmɨ dɨma nandaba pɨsogɨ.

⁴Babɨkon da babɨkon pi madep aŋ aŋ agɨl uŋun do yaŋ yaŋ akdaŋ.

⁵Amɨn da tapmɨm madepgo gat ae Kɨla Amɨn Madep Wɨkwisi egɨsal uŋun do yokdaŋ. Aŋakwa nak do pi madep madep asal uŋun do nandaŋek egɨpbeŋ.

⁶Amɨn da pi masɨ masɨmɨ asal uŋun dakon geni yokdaŋ. Aŋakwa nak da man madepgo do yokeŋ.

⁷Aŋpakgo tagɨsi uŋun dakon geni yaŋek kapmon da aŋpakgo kɨlegɨsi uŋun do yoni.

⁸Yawe da nin do nandaŋ yawok nimɨŋek bupmɨ nandaŋ nimɨsak. Butjap tepmɨ dɨma nandaŋek but dasi galak taŋ nimɨsak.

⁹Amɨn morap kɨsi do aŋpak tagɨsi aŋyomɨsak. Aŋek yo morap wasagɨt uŋun do bupmɨkon da kɨlani asak.

¹⁰Yawe, yo morap wasagɨl uŋun da mango aŋkɨsini. Mɨŋat amɨn kabɨgo da mango aŋkɨsini.