GWAY GI IDAWUU’D 106:5-31

⁵ki aha/ mina p̱ar mo jin rusa/ rus gi unim pini kun kwanya /e e mo, ki aha/ mina bwa ’kuny mo e mo jin ’kunya bwaŋ ’kwani gi kal pini mo, ki aha/ mina ca mo e mal pini mo.

⁶Am dhali ibabam bam mo, ’thissa/ niin mo tani miikina miinthus mo. Aman miikina mii kun ’coḵa’coḵ mo, am miikina to kun ta thus ki thus mo.

⁷Ibabam bam, ki uni ’kokin e Pam Masir mo tani, uni ’koki hil gwo i e gom tom pini kun miina /e ki momer mo. Uni ’koki ka mo/en pini e jin ṯelu sho’k jin ishki’d ka enthus mo, hili uni pishki is ka le’d ap̱o/ a’di jin Caa e ki Ca e Ḵumma/ Yi’de/ jin ta gi ’Per mo.

⁸Naskina/ a’di ki ta uni is ki me’d gom gway gi gway piti mo, ki a’di midi ṯor mom’bi’th ma dem dem piti mo.

⁹A’di ḵucurki Ḵumma/ Yi’de/ jin ta gi ’Per mo dhali a’di warki’d ki mo jin ḵuthaḵu’th mo. Dhali a’di suski uni e bwaman moŋ’kulga/ mo me’d jin miikina a’di e bwaman ma si’b mo.

¹⁰Wakan a’di taki uni is ki me’d mo ’peni ’kwaniŋ ’kup̱ buni mo, dhali ’cuḵ uni mo ’peni mom’bi’th gi ’kwaniŋ ’kup̱ buni mo.

¹¹Dhali yi’de/ kumki uniŋ ’kup̱ buni ’twa/a ’cesh mo. Jaŋkamu/ di’d jin boc̱o’d ’peni uniya?

¹²Dhali yan’ko’d uni gamki gwom piti is mo. Uni yuḵki gway gom momaŋ piti mo.

¹³Hili ki jahanne/ uni ŋaki miim piti mo. Uni ’koki c̱or gwom piti jin logoma a’di mo.

¹⁴Hili uni cana bwa en’dap̱ mo mmogora bwa ki gor e mombwaasho mo, dhali kara Arumgimis mo mmonyo/ a’di e bwam ma si’b mo.

¹⁵A’di c̱i uni to jin doṯkina uni mo, hili a’di ki hash ’ba’th jin shi/ uni is e bwaman uni mo.

¹⁶Ki ’kwaniŋ gwas kun ’kon e mo ma yuukam buni mmoṯa’c bwa ki ṯa’c ap̱owa Musa mo dhala Haruun, a’di jin ta jan ’de/ gi Tap̱a jin ḵogu mo tani

¹⁷mony’cesh ḵa’dki ’twa/ mo dhali losa waḵ ma Daṯẖan mo dhali kum ’kwani kun nyaḵ ii ka Abiram ’twa/a ’cesh mo.

¹⁸O’d si’da/ du’dushki’da p̱o/ imannyaḵ iim buni mo dhala le’dan o’d shwaki ’kwani kun ta thus ki thus mo.

¹⁹Uni uḵki ari bip̱ e ’kuwosh ma Hurib mo dhali uni ki luŋ tomp̱inycon jin ṯo’du/ mmo/uḵ a’di jin ta p̱inycon mo.

²⁰Uni aḵki monyca ma Arumgimis e mo gom jamas to jin uḵu mo me’da morbip̱ jin shwa’da sho mo.

²¹Uni ŋakina Arumgimis mo, a’di jin ta’da Manwoṯẖ uni mo a’di jin miiki dhan to jin caaca e Pam Masir mo,

²²ki mii gi momer mo e bampa/ ma Haam mo, dhali dhana puren to e Ḵumma/ Yi’de/ jin ta gi ’Per mo.

²³Wakan a’di oki gwo mo ki: A’di midi ’ce’d uni sho’k moyi, dhala Musan ’dem piti jin kwanya a’di mo tani dina a’di ki doshi bwambori a’di mo ntagi a’di doḵki’da nyor piti jin midi ’taki ’ce’d uni sho’k mowa?

²⁴Yan’ko’d uni ki waḵ mony’cesh jin ’bora’bor mo, dhali dar gi moŋgam gwo is gom gwom piti jin ona a’di is mo.

²⁵Uni miikina gumgum e bwaŋ gu’b burrinyem buni mo, dhali ush gwo gi ’twa/ gi Tap̱a ha e mo.

²⁶Wakan a’di ’de’kki me’d piti mo dhali thul gwo me’da p̱o/ gom uni mo mmo/o ki a’di midi dhu uni mo mmoṯa’k mo e mombwaashoyi,

²⁷dhali ḵwa/ emen gi uc̱im buni bwa mo e bwaman kal gi ’kwaniny’cesh mo, mmoc̱ekerki uni bwa mo e bampany ’ceshi ’baar mo.

²⁸Wakan uni ’tampalki is buni ka rum ma Baal jin ta ji Pam P̱aguur mo, dhali ’ka to jin ’ciṯẖu/ ’kus mmothe tomp̱inycon gom jwa gi ’kwani kun wun mo.

²⁹Uni rukunyki Tap̱a mmomiiya nyor mo gom miim buni mo, dhali ’ba’th jin wo’cki ’kwani is she/ du’dushki’d e bwaman uni mo.

³⁰Dhali yan’ko’d P̱inahaas doshki’d ki mis mo dhali woṯẖ gwo is mo, dhali ’ba’th jin wo’cki ’kwani is she/ c̱a’bki’d mo.

³¹Dhali a’di ikarkunu a’di ki mo ma ḵar/e mo ’pena nyaḵum yil jin tanu mo mmotana nyaḵum yil ki sule/ sule/ mo.