Pisalem 106:5-31

⁵Heia au gii mmada gi di haadanga lamalia o au daangada, gei gi tenetene au madalia di tenetene o au daangada, i di hagamadamada haga manawa lamalia o digau ala gu hai mee ginai Goe.

⁶Gimaadou gu ihala gadoo be madau damana mmaadua. Gimaadou gu huaidu gei gu ihala huoloo.

⁷Tadau damana mmaadua nogo i Egypt, digi donu gi nia hegau haga goboina a God ala nogo hai, digaula gu de langahia nia holongo e logowaahee a Mee ala ne hagamodongoohia dono aloho i ginaadou. Digaula gu hai baahi gi di Gowaa Aamua i tongotai di Tai Mmee.

⁸Gei Mee gu haga dagaloaha digaula gii hai be dana hagababa dela ne hai, belee hagamodongoohia ono mahi maaloo dangihi.

⁹Mee ne helekai hua gi di Tai Mmee, gei di maa guu bagu, gei Mee ne lahi ana daangada laa lodo di Tai Mmee i di gowaa maangoo.

¹⁰Mee ne haga dagaloaha digaula gi daha mo digau ala e hagawelewele gi digaula. Mee ne daa mai digaula gi daha mo nadau hagadaumee.

¹¹Gei nia wai gu hagamaalemu nia hagadaumee digaula, deai tangada i digaula ne dubu i golo ai.

¹²Malaa, ana daangada gu hagadonu laa nia hagababa a Maa ga daahili hagaamu a Mee.

¹³Gei digaula gu limalima hua gu de langahia nia mee a Mee ala ne hai, gei digaula digi tali bolo e hagalongo be Mee gaa hai bolo aha.

¹⁴Digaula gu aumidi huoloo gi nia meegai i lodo di anggowaa ga hagamada a God.

¹⁵Malaa, gei Mee guu wanga gi digaula nia mee digaula ala ne madau, gei Mee gu hagau mai labelaa di magi huaidu gi digaula.

¹⁶Di madagoaa i lodo di anggowaa, gei digaula ne dubua gi Moses mo ang gi Aaron, go tangada hai hegau haga madagu a Dimaadua,

¹⁷gei henuailala gu mahaa guu holo a Dathan, gaa danu a Abiram mo dono madahaanau.

¹⁸Di ahi ga haneia gi hongo nia hoo digaula, gaa dudu digau huaidu aalaa.

¹⁹Digaula ne hai di nadau dama kau daane goolo i Sinai, ga daumaha gi di balu god deelaa.

²⁰Digaula gu koodai nia madamada o God gi di ada di manu dela e gai nia geinga tolo.

²¹Digaula gu de langahia di God dela ne haga dagaloaha ginaadou gi ono mogobuna mahi i Egypt,

²²mo nia hagadilinga mee hagagoboina huoloo ala ne hai go Mee i tenua o di madawaawa Ham, mono mee hagagoboina i di Tai Mmee!

²³Di madagoaa a God ne hai bolo Ia ga daaligi ana daangada gi daha, gei tangada hai hegau a Maa ne hilihili, go Moses, ga duu aga ga longilongi a God bolo gi dugua dono hagawelewele dela belee daaligi digaula gii mmade.

²⁴Malaa, digaula gu hagalee hiihai e ulu i tenua humalia deelaa i di nadau de hagadonu nia hagababa a God.

²⁵Digaula e noho hua i lodo nadau hale laa, gaa hai laa nadau tamu, hagalee hagalongo gi Dimaadua.

²⁶Malaa, Mee guu hai dana hagamodu bolo Ia ga daaligi digaula gii mmade i lodo di anggowaa,

²⁷ga hagamodoho nia hagadili digaula gi baahi digau tuadimee, gaa hai digaula gii mmade i lodo nia henua mai i daha.

²⁸Malaa, nia daangada a God gu daumaha gi di balu god Baal i Peor, ge guu gai nia mee tigidaumaha ala ne tigidaumaha gi nia god ala nadau mouli ai.

²⁹Nia hagadilinga hai beenei digaula la guu hai a Dimaadua gi hagawelewele, deelaa di mee ne hidi ai taumagi huaidu ne hai gi digaula.

³⁰Gei Phinehas ga du gi nua ga hagaduadua nia daangada ala ne hai nau mee hala, gei di magi huaidu deelaa guu noho.

³¹Tugi i di laangi deelaa gaa hana, gei di haga langalangahia o di mee dela ne hai go Mee i di laangi deelaa le e haihai, gaa hana hua beelaa.