Filippi 4

1

2

3

4

¹Pi walageg ni girdi’en Kristus, ri gimed ba t’uf rog, ma kug tawreng nagmed, ma kam felfelan’ niged gag, ma kari felan’ug ngomed! Pi walageg ni girdi’en Kristus ni gimed ba t’uf rog, ireray rogon ni ngam pired ni gimed bmuduwgil ko ngongol romed u fithik’ Somol.

²Euodia nge Sintike, wenig ngomew, mu guyew rogon nge ta’reban’mew ni bod rogon e walag ni ppin nma par u fithik’ Somol.

³Ma ku errogon gur e cha’ ni gab yul’yul’ ni gadow ma ayuwegdow ko re gaf i maruwel ney, gub adag ni ngu’um ayuweg e gali ppin ney; ya ba gel e maruwel nra tew nra unew ngog ngu’ug wereged fare Thin Ni Bfel’, ma kur unew ngak Klement nge tin kabay e girdi’ ni ug muruwliyed e re gaf i maruwel ney u ta’bang, ni bay fithingrad u lan e babyor rok Got ni babyoren e pi’in kar fosgad.

⁴Gubin ngiyal’ ni ngu’um felfelan’gad ko ta’ab girdi’ ni kam ted Somol. Ere ngku gog bayay ni nge lungug: mu felfelan’gad!

⁵Mu sumunguygad ngak urngin e girdi’. Ya bay sul Somol ni dabki n’uw nap’an.

⁶Ma dariy ban’en ni nge magafan’med ngay, machane fa’an gimed ra meybil ngak Got mi gimed ning ngak e tin nge yag ngomed, ma gubin ngiyal’ ni ngu’um ninged ngak ni gimed be pining e magaer ngak u lanin’med.

⁷Ma gapas rok Got ni dabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.

⁸Pi walageg ni girdi’en Kristus, n’en ni nggog ngomed u tungun e re gi babyor ney e ngam suguyed lanin’med ko fapi n’en ni bfel’, ni yira yog e fel’ ngay: ni n’en nriyul’, nge n’en nib yal’uw, ma bmat’aw, ma bmachalbog, ma bmanigil, nge tin ndariy thibngin.

⁹Mmaruwelgad ko tin kam filed rog nge tin ke yag ngomed rog, ni tin ni yag ngomed ko thin rog nge ngongol rog. I Got ni ir e be pi’ e gapas nga lanin’dad e bay i par romed.

¹⁰Ri ba ga’ e felfelan’ ni gu be tay ko ta’ab girdi’ ni kug tew Somol! Ya ke n’uw nap’an nde bung rogomed ni ngam daged ngog ni gimed be leam nigeg, ma chiney e ke bung rogomed bayay. Gathi gu be yog ni kam paged gag — ya bochan e de bung rogomed ni ngam daged.

¹¹Ma gathi gu be yog e re bugithin ney ni bochan e gu be finey ni kam paged gag ndakumur leam niged gag; ya kug fil rogon ni nge fel’ u wun’ug e tin bay rog ban’en.

¹²Ya gu manang rogon ni ba’aray ni kan gafgow u ban’en, nge rogon ni ba’aray nike pag urngin ban’en nike yag ngog. Kug nang rogon e ren’ey, ere demturug e gin’en ma demturug e re ngiyal’ i n’en, ma bfel’ u wun’ug ndemturug ko gub fos ara gub yam’ ko bilig, ma demturug ko pire’ ban’en ni bay rog ara rib lich.

¹³Demturug e mit i n’en ni gu ra mada’nag ma bay gelngig nike pi’ Kristus nrayag ni gu par riy.

¹⁴Machane ri gimed ba gol ni kam ayuweged gag ko gafgow nike yib ngog.

¹⁵Gimed piyu Filippi e ri gimed manang faram fa ngiyal’ i n’em ni gu chuw u Macedonia kakrom ni gu be machibnag fare Thin Ni Bfel’ ko girdi’ i yan, ma kari mmusgad e ta’are galesiya ni mu ayuweged gag; ma kari mmusgad e pi’in mu uned ngog ko tin gu win riy nge tin gu lus riy.

¹⁶Gathi nga ta’ab yay ni fa’anra gu gafgow u ban’en u Thessalonika mi gimed pi’ nge yib ngog.

¹⁷Gathi bochan e kemus ni gub adag ni ngi i yag e tow’ath ngog; machane gub adag ni nge puthuy Got e win ko ngongol ni bfel’ ni kam ngongliyed.

¹⁸Urngin e tin ni mpi’ed nge yib ngog e ke thap ngog — ma ke gaman ke pag urngin! Ke fek Epafroditus i yib ngog urngin e tow’ath rog ni mpi’ed ngak, ni aram e kefel’ rogog u urngin e tin ug gafgow riy. Pi tow’ath ney e bod e n’en ni bfel’ bon ni yima pi’ ngak Got ni ba maligach ni ba’adag Got ma bfel’ u wan’.

¹⁹Ma Got rog ni pire’ ban’en rok e bayi pi’ ngomed u daken Jesus Kristus urngin e tin ni gimed be gafgow riy.

²⁰I Got ni Chitamangidad e ngu’un tayfan ndariy n’umngin nap’an. Amen.

²¹Nge felan’ Got ngak urngin e girdi’ rok nib mil farad ngak Kristus Jesus. Pi’in girdi’en Kristus ma walagdad yad ni yad bay rog u roy e karogned ni nge felan’ Got ngomed.

²²Urngin e girdi’ rok Got ni yad bay u roy, ni ba ga’ ni pi’in nib mil farad nga tafen e en ni Emperor e karogned ni nge felan’ Got ngomed.

²³I Jesus Kristus ni ir e Somol rodad e ngi i ayuwegmed ni gimed gubin.