ፒሊጲሲዮሳ 4

1

2

3

4

¹ታናዳን ፆሳ ካሊያዋንቶ፥ ታኒ ሲቂያዋንቶ፥ ላሞቲያዋንቶ፥ ታና ናሼቺያዋንቶ፥ ታና ꬎቁ ኦꬂያዋንቶ፥ ታ ዳባቶ፥ ሲሚ ጎዳን ሂንቴንቱ ሚኒ ኤቃናው ቤሴ።

²ኤዎዴኔ ሲንፂኬ፥ ሂንቴንቱ ላዑካ ቆፋን ኢቱዋ ጊዲዴ፥ ጎዳን ዴዓናዳን፥ ታኒ ሂንቴና ዞራይ።

³ቃሲ ታናና ኦꬂያ ኣማኔቴዳዎ፥ ኔኒ ሃ ማጫ ኣሳቱዋ ማዳናዳን፥ ታኒ ኔና ዎሳይ፤ ኣዪሲ ጎፔ፥ ኡንቱንቱ ታናናኔ ኡንቱንቱ ሱንꬃይ ፆሳ ዴዑዋ ማፃፋን ፃፌቴዳ ቃሌሚንፆሳና ቃሲ ታናና ኢቲፔ ኦꬂያ ሃራቱዋ ኡባና ዎንጋላ ኡባሳ ጋꬃናው ዳቡሬዲኖ።

⁴ጎዳና ሂንቴንቱ ዴዒያ ዴዑዋን ኡባ ዎዴ ናሼቲቴ፤ ታኒ ሃዋ ጉጃዴካ ጋይ፤ ናሼቲቴ።

⁵ኣሳይ ኡባይ ሂንቴንቱ ኣሺኬቴꬃ ኤሮ፤ ጎዳይ ማታን ያና።

⁶ፆሳ ሂንቴንቱ ዎሲያ ዎሳ ኡባን ኣ ሎይꬂ ጋላቲዴ፥ ሂንቴና ኮሺያዋ ኡባው ዎሲቴፔ ኣቲን፥ ኢቲባዉካ ሂርጎፒቴ።

⁷ቃሲ ኣሳ ኤራቴꬃ ኡባፔ ኣꬊያ ፆሳ ሳሮቴꬃይ ሂንቴንቱ ዎዛናኔ ሂንቴንቱ ቆፋ ጎዳ ዬሱሲ ኪሪስቶሳ ባጋና ናጋና።

⁸ዉርሴꬃን፥ ታናዳን ፆሳ ካሊያዋንቶ፥ ሂንቴንቱ ዎዛናን ሎዖባኔ ጋላቲሲያዋ ቆፒቴ፤ ቱማ ጊዲያባ ኡባ፥ ቦንቺሲያዋ ኡባ፥ ባዪዙዋ ጊዴናባ ኡባ፥ ጌሻባ ኡባ፥ ሲቁዋ ኡባ፥ ሱሬ ጊዲያባ ኡባ ቆፒቴ።

⁹ሂንቴንቱ ታፔ ታማሬዳዋ፥ ኣኬዳዋ፥ ሲሴዳዋኔ ቤዔዳዋ ኡባ ኦꬂቴ፤ ቃሲ ኑሲ ሳሮቴꬃ ኢሚያ ፆሳይ ሂንቴናና ኢቲፔ ጊዳናዋ።

¹⁰ሺን ዳሮ ዎዲያፔ ጉዪያን፥ ሃዒ ሂንቴንቱ ታዋ ላዔንꬁዋ ቆፓናው ዶሜዳ ዲራው፥ ታኒ ጎዳን ሎይꬃ ናሼታይ፤ ታው ቆፓናው ሂንቴንቶ ኢንጄቴናን ኢፄዳዋፔ ኣቲን፥ ታው ቆፋ ቆፒታ።

¹¹ታኒ ሃዋ ታና ሜቴዳ ዲራው ጊኬ፤ ኣዪሲ ጎፔ፥ ታው ዴዒያባይ ታው ጊዳና ጊያዋ ታኒ ታማራዲ።

¹²ታኒ ሜቶቲዴ ዎቲ ዴዓኔንቶ ኤራይ፤ ቃሲ ዱሬቲዴ ዴዒያዌካ ኣዬንቶ ኤራይ፤ ሃቃን ጊዲናካ ኣዉዴ ጊዲናካ፥ ታኒ ካሉዋኔ ኮሻ ቃሲ ፓጫኔ ፓላሃ ታማራዲ።

¹³ኪሪስቶሲ ታው ኢሜዳ ዎልቃን፥ ኡባባ ኦꬃናው ታኒ ዳንዳያይ።

¹⁴ጊዶፔካ፥ ሂንቴንቱ ታ ሜቱዋ ታናና ሜቶቲዴ ዳሮ ሎይꬄዲታ፤

¹⁵ፒሊጲሲዮሳ ኣሳው፥ ዎንጋላ ሚሺራቹ ኮይሮ ሂንቴ ጊዶን ኦዴቴዳ፤ ሺን ታኒ ማቂዶኒያፔ ኬሴዳ ዎዴ፥ ታና ኣማኒያ ሂንቴንቱፔ ኣቲን፥ ሃራይ ማዲቤናዋ ሂንቴንቱ ሂንቴንቱ ሁጴው ኤሪታ፤ ቃሲ ኢሚያባንካ ኣኪያባንካ ሂንቴፔ ኣቲን፥ ሃራይ ታና ማዲቤና።

¹⁶ኣዪሲ ጎፔ፥ ታና ሜቱ ኦይቄዳ ዎዴ፥ ሃራይ ኣቶ ታኒ ቴሴሎንቂያን ዴዒሺንካ ታና ዛሪ ዛሪዴ ማዴዲታ።

¹⁷ታኒ ሂንቴዋ ቦላ ሃራባይ ጉጄታናዋ ኮዪያዋፔ ኣቲን፥ ዎዪታ ፃላላ ኣካናው ኮዪኬ።

¹⁸ሺን ታኒ ሂንቴንቱ ኢሜዳዋ ኡባ ኣካዲ፤ ቃሲ ታው ፓላሂዴ ጊዲያዌ ዴዔ። ሂንቴ ኪቴዳ ኡባባ ኤፓፊሮዲቶሳፔ ኣካዲ፤ ኮሺያ ኡባይ ታው ዴዔ። ሂንቴ ታው ኪቴዳ ኢሙ ፆሳው ሳዉዋ ቶሺኩ ጊያኔ ኢ ዶሲያ፥ ኣ ናሼቺያ ያርሹዋ ማላ።

¹⁹ቃሲ ታ ፆሳይ ባሬ ቦንቾ ዱሬቴꬃ ዳሩዋን ኪሪስቶሲ ዬሱሳ ባጋና ሂንቴና ኮሺያዋ ኡባ ሂንቴንቶ ኢማና።

²⁰ኑ ፆሳው፥ ኑ ኣዎ ሜꬊናፔ ሜꬊና ጋካናው ቦንቹ ጊዶ። ኣሜንዒ።

²¹ኪሪስቶሲ ዬሱሳዋ ጊዲያ ፆሳ ኣሳቱዋ ኡባቱዋ ሳሮ ጊቴ። ታናና ሃዋን ዴዒያ ኢሻቱ ሂንቴና ሳሮ ጊኖ።

²²ሃዋን ዴዒያ ፆሳ ኣሳቱዋ ኡባቱ፥ ኡባፔካ ኣꬂዴ ካቲያ ቄሳሬ ጎሊያን ዴዒያዋንቱ ሂንቴና ሳሮ ጊኖ።

²³ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴናና ጊዶ።