ፒልጲሲዮሴ ዓሶም 4

1

2

3

4

¹ታ ዒንሢ ናሽካያ፥ ጶቂሣያ፤ ሃሣ ታና ዎዛሳያና ታ ማዼ ማዾ''ኮ ቦንቺ ዒንጎ ባኮ ማዔ ታ ዒጊኖንሢዮቴ! ዓካሪ ዬያይዲ ጎዳና ዶዲ ዒንሢ ናንጋንዳጉዲ ታ ዒጊኖ ዒንሢ ማዔ ጎይፆና ታ ዒንሢ ዞራኔ።

²ዔዎዲያና ሲንፂኬና ዔያታ ዎላ'' ቡኪ ጎዳና ዓኣ ፔቱሞና ናንጋንዳጉዲ ታ ዔያቶ ሺኢቃኔ።

³ኔኤኒያ፥ ዒኢካ ዓኣ ጉሙርቂንታ ታኣኮ ማዾ'' ላጋሢ' ዬንሢ ላኣሎንሢኮ ዑኬ ማዒ ዓያኖ ናንጎ ዛሎ''ና ዔያቶ ኔ ማኣዳ''ንዳጉዲ ጌዒ ታ ኔኤም ኬኤዛኔ፤ ዓይጎሮ ጌዔቴ ዬንሢ ላኣሎንሢ ቄሌማፆሴና፤ ሃሣ ሱ'ንፃ ናንጎ ማፃኣፖይዳ ፃኣፒንቴ፥ ሜሌ'' ኑኡኮ ማዾ'' ላጎንሢንታ ዎላ'' ማዒ ኮዦ ሓይሶ ኬኤዚፆና ታኣና ዎላ'' ዔያታ ላቤ''ያታሢሮኬ።

⁴ጎዳና ዒንሢ ዓኣሢሮ ቢያ ዎዴ ዎዛዹዋቴ፤ ላሚ ላሚ ታ ዒንሢ «ዎዛዹዋቴ» ጋዓኔ።

⁵ዒንሢኮ ኮሹማ ዓሲ ቢያም ዔርቴያ ማዖንጎ፤ ጎዳ ሙካኒ ዑኬኔ።

⁶ዬያሮ ዒንሢም ኮይሳ ባኣዚ'' ዓኣቶ ጋላቲ ጋላቲ ፆኦሲ ሺኢቃንዳኣፓዓቴም ዓይጎ ባኣዚ''ሮዋ ማሊ ሜታዺፖቴ።

⁷ዓሲ ማሊሢኮ ዑሣ ማዔ፥ ፆኦሲኮ ኮሹማ ዒንሢኮ ዒኖና ማሊፆና ዬሱስ ኪሪስቶሴ ዛሎ''ና ካፓንዳኔ።

⁸ታ ዒሾንሦ! ታ ሚሾንሦ! ዓካሪ ጋፒንፆይዳ ታ ዒንሢም ኬኤዛሢ' ጎኔ ማዔ ባኣዚ''፥ ዒናና ዓኣያ ማሃ ባኣዚ''፥ ጌኤሺ ማዔ ባኣዚ''፥ ፂሎ'' ማዔ ባኣዚ''፥ ናሹሞ ዓኣ ባኣዚ''፥ ኮሺ ሃይሴ ማዓ ባኣዚ'' ቢያ፤ ሃሣ ኮሺ ማዾ ማዔቴያ ጋላቲሢ፤ ዬንሢ ባኮንሢ ማሉዋቴ ጌይኬ።

⁹ታኣኒ ዔርዛኣና ዋይዚ ዒንሢ ዔኬ ባኮና ታ ማዻኣና ዛጌ ባኮ ቢያ ማዹዋቴ፤ ዬያ ዒንሢ ማዼቴ ኮሹሞ ዒንጋ ፆኦዛሢ ዒንሢና ዎላ'' ማዓንዳኔ።

¹⁰ሚርጌ ዎዴኮ ጊንፃፓ ታ ሜታሢ ዛሎ'' ዒንሢ ማሊሢ ዓርቄሢሮ ፆኦሲ ሱ'ንፆና ሚርጌና ታ ዎዛዻኔ፤ ዬያ ታ ጋዓሢ' ዒንሢ ማሌ ባኮ ማዻኒ ዒንሢም ጊኢጉዋዖ ዓቴ''ኔ ጌይሢ ማዓንዳኣፓዓቴም ታ ሜታሢ ዛሎ'' ማሊፆ ዒንሢ ሃሼ''ዖ ዓርቄኔ ጌይሢቱዋሴ።

¹¹ሃሣ ዬያ ታ ጋዓሢ' ታና ሜቴ ባኣዚ'' ዓኣኔ ጌይቱዋሴ፤ ዓይጎሮ ጌዔቴ «ታኣኮ ዓኣ ባካ ታኣም ጊዳንዳኔ» ጌይሢ ታ ዔራሢሮኬ።

¹²ዬያሮ ዔኤቢ ዴንቂሢ ማዔቴያ ዔኤቢኮ ባይቂሢ ታ ዔራኔ፤ ዓይጎ ቤስካ ማዔቴያ ዓይጎ ዎዴና ማዖም ሚሽኪሢና ናይዺንቲሢና፥ ሃሣ ዴንቂሢና ዔኤቢ ባይዚሢናኮ ዓኣ ባኣዚ'' ታ ዔራኔ።

¹³ዬያሮ ኪሪስቶሴ ታኣም ዒንጋ ዎልቆና ቢያ ባኣዚ'' ታ ዳንዳዓንዳኔ።

¹⁴ጋዓንቴ ዒንሢ ታ ሜታሢ ታኣና ዎላ'' ዔካያ ማዒፆና ኮሺ ማዾ ዒንሢ ማዼኔ።

¹⁵ዬያ ሌሊቱዋንቴ ኮዦ ሃይሶ ማዾ'' ታ ዓርቄ ዎዶ''ና ሜቄዶኒያ ዓጫ''ፓ ታ ኬስካኣና ዒንሢ፥ ፒልጲሲዮሴይዳ ዓኣ ዓሶፓ ዓታዛ ሜሌ'' ታና ማኣዴ'' ሺኢጲሢ ማኣሪ ዓሲ ባኣሢ ዒንሢ ዒ'ንሢሮ ዔራያኬ፤ ዬያሮ ታኣኮ ዔቦ'' ዴንቂፆናኣ ማዖም ባይዚፆናይዳ ታና ማኣዴ''ሢ ዒንሢ ሌሊኬ።

¹⁶ቴስሎንቄይዳ ታ ዓኣና ሜታዼሢ ዔሪ፥ ላሚ ላሚ ታና ዒንሢ ማኣዴ''ኔ።

¹⁷ዬያ ታ ጋዓሢ' ዒንሢ ሃያኮ ቤርታ ማዼ ባኮፓ ባሼ ሚርጌ ኮሺ ማዾ ዒንሢም ቃሲ''ንታንዳጉዲኬ።

¹⁸ታኣም ኮይሳሢጉዲ ሌሊቱዋንቴ ዑሣ ዓኣዼ ማዔ፥ ዒንሢ ታኣም ዳኬ ባኮ ዔፓራዲቶሴይዳፓ ታ ዔኬኔ፤ ዬይ ዒንሢ ዳኬ ባካ፦ ኮሺ ሳውሞ ዓኣ ፆኦሲም ዒንጎ ባኣዚ''ጉዲ ማሂ ፆኦሲ ዔካንዳያና ዎዛዻንዳ ዒንጊሢኬ።

¹⁹ዬያሮ ታ ፆኦዛሢ ሃይማኬ ጌይንቱዋ፥ ዒዛኮ ዓኣ ባኮይዳፓ ዬሱስ ኪሪስቶሴ ዛሎ''ና ዒንሢም ኮይሳ ባኮ ቢያ ዺቢሺ ዒንጋንዳኔ።

²⁰ኑ ዓዳሢ፥ ፆኦዛሢም ናንጊና ናንጊ ሄላ''ንዳኣና ቦንቾ ማዖንጎ፤ ዓኣሜን።

²¹ዬሱስ ኪሪስቶሴ ጉሙርቂ ፆኦሲም ዱማዼያ ማዔ፥ ዒዛ ዓሶም ቢያ «ኮሺዳ?» ጌዔኔ፥ ጎዑዋቴ፤ ታኣና ዎላ'' ዓኣ ዒሾንሢንታ ሚሾንሢንታ «ኮሺዳ?» ዒንሢ ጋዓኔ።

²²ዓቴ'' ኪሪስቶሴ ጉሙርቃ ዓሳ ቢያ፤ ሃሣ ዱማና ሮሜ ካኣቲም ማዻ ኪሪስቶሴ ጉሙርቃ ዓሳኣ «ኮሺዳ?» ዒንሢ ጋዓኔ።

²³ጎዳ ዬሱስ ኪሪስቶሴኮ ኮሹሞ ዒንጊፃ ዒንሢ ቢያሢም ማዖንጎ።