Exodus 40:9-31

⁹“Munu palulanguṟu uwankara palyaṟa tjunkunytjatjanungku uwila wiṟu panya miḻmiḻmankupaingka pitinguṟu tjutiṟa para-kurpiṟa waṉala Tiinta Miḻmiḻpa, munu kutjupa kutjupa tiinta unngu nyinanytja tjuṯa kuḻu kurpila nyanga tjananya uwankara miḻmiḻmankunytjikitjangku.

¹⁰Munu palulanguṟu pitjilpa panya kuka tiliwakalpai uwila panya palula kurpila palunya kuḻu miḻmiḻmankunytjikitjangku munu ayana panya waṟika puṟunypa tjuṯa kuḻu kurpila palunya tjananya kuḻu miḻmiḻmankunytjikitjangku.

¹¹Munu palu puṟunytjuṯu piti panya paltjilpai kurpiṟa miḻmiḻmanama, piti maṉa kuḻu.

¹²“Munu Aaronnga palumpa katja tjuṯa kuḻu ngalya-kati tiinta pala miḻmiḻpakutu munu tjananya minangka paltjila.

¹³Munu Aaronnga mantara panya wiṟu mulata tjarpatjura munu uwila panya miḻmiḻṯa palunya kurpiṟa miḻmiḻmara paluṟu tjukurtjararingkula ngayuku waṟka palyantjaku.

¹⁴Munu palumpa katja tjuṯa kuḻu katira mantara panya wiṟu tjuṯangka tjarpatjura.

¹⁵Munu palu puṟunypaṯu tjananya uwilangka kurpiṟa miḻmiḻmara tjana kuḻu tjukurtjararingkula ngayuku waṟka palyantjaku. Uwilangka kurpiṟa miḻmiḻmankunytja nyanga paluṟu nintini tjana tjukurtjara tjuṯa tiṯutjara ngaṟanytjaku nyanga palula tjanala maḻangka kuḻu kutjupa ngapartji piṟuku ngaṟanytjaku munu piṟuku maḻatja maḻatja.” Nyanga alatji Godalu Mosela wangkangu tjana palyantjaku.

¹⁶Ka Moselu uwankara palyaṉu Mayatja Godalu wangkanytjitja.

¹⁷Kaya Israelkunu tjuṯa ngura Itjipalanguṟu ankula nguṟurpa yiya kutju wiyaringu. Kaya pala palula aṟangka piṟa ngaṉmanyitjangka Moselu tjana tiinta panya miḻmiḻpa palyaṟa ngaṟatjunu tiinta panya Godanya Tjunguringkupai.

¹⁸Tjana puṉu tjuṯa-waraṟa muṟutjunkula puṉu waṟa tjuṯa kaṯakutjara kaṯakutjara para-ngaritjuṟa waṉaṉu katu kuḻu.

¹⁹Munuya palulanguṟu tiinta tjiipi miṟinguṟu palyantja katu ngampaḻtjunu munu palulanguṟu tiinta kutjupa antipina miṟinguṟu palyantja palula katu ngampaḻtjunu panya Godalu wangkanytjitjangka.

²⁰Ka Moselu puḻi panya tjiwa kutjara tjukurpa puḻkatjara mantjiṟa Pakutja panya Kalkuntjitjangka unngu tjarpatjunu. Munu palulanguṟu puṉu waṟa kutjara kampa kutjara tjunu witiṟa katinytjaku, munu pakutja palula katu liita panya nyaḻpitjara kutjara katu ngaparku nyinanytja kutjaratjara angatjunu.

²¹Munu palulanguṟu Pakutja panya Kalkuntja Tiinta Miḻmiḻṯa unngu tjarpatjunu kampa wiluṟara munu mantara waṟa panya waṟaly-waṟalytjunu kuranyu, panya alatji Godalu wangkangu pakutja palunya kumpiṟa kanyintjaku.

²²Munu palulanguṟu taipula panya mai tjunkupai katira tiinta unngu tjarpatjunu kampa alinytjara mantara panya waṟaly-waṟalyngaṟanytjala kakaraṟa.

²³Munu mai nyuma katu tjunu mai panya Godanya ungkunytjitja, panya alatji Godalu palunya tjunkunytjaku wangkangu.

²⁴Munu lampa panya tili tjuṯatjara tiinta unngu tjarpatjunu taipulangka uḻpaṟira.

²⁵Munu nyara palula Mayatja Godala miṟangka Moselu tili panya tjuṯa tiliṟa wantingu Godalu wangkanytjitjangka.

²⁶Munu palulanguṟu taipula tjukutjuku wiṟu paṉṯipaitjara katira tiinta unngu tjunu mantara panya waṟaly-waṟalyngaṟanytjala kuranyu.

²⁷Munu paluṟu nyaḻpi wiṟu paṉṯipai tjuṯa tiliṟa wantingu wiṟu paṉṯinytjaku, panya alatjingantjaku Godalu wangkangu.

²⁸Munu palulanguṟu mantara waṟa tiinta tjaangka waṟaly-waṟalytjunu.

²⁹Munu piṟuku pitjilpa panya kuka tiliwakalpai katira tjunu Tiinta Miḻmiḻṯa kuranyu kampa kakaraṟa. Munu pitjilpa pala palula paluṟu kuka tjunkula tiliwakaṟa mulurunu Godanya ungkula waḻkuntjikitjangku munu mai uṉinypa tjuṯa kuḻu tjunkula tiliwakaṟa Godanya ungu, panya Godalu wangkanytjitjangka.

³⁰Munu piti panya paltjilpai puḻka katira tjunu pitjilpangka muṉkara tiintangka tjangaṯi, munu kapi kuḻu tjutinu paltjintjaku.

³¹Kayanku Moselu, Aarontu munu palumpa katja tjuṯangku kuḻu manyirka, tjina kuḻu paltjiṉu piti panya palula Tiinta Miḻmiḻṯa tjarpanytjikitjangku. Munuya palu puṟunypaṯu tiṯutjarangku paltjiningi Tiinta Miḻmiḻṯa tjarpanytjikitjangku munu pitjilpa kuka tiliwakalpaikutu pitjanytjikitjangku, panya Godalu Mosela wangkangu alatji palyantjaku.