1نَ دَنفِ شَنبِ، مَنفّ عَسُيٍرُ سُ نَشَ هَمّدَتَ عَفَفَكَ شَ دِ هَمَن بِنيَ، عَ عَ تِ مَنفّدِيٍ بِرِن شُن مَ.
2مَنفّ شَ مِشِيٍ بِرِن نُ عٍ شِنبِ سِنمَ هَمَن بُن مَ، عَلْ مَنفّ عٍ يَمَرِ كِ نَشّ. كْنْ مٌرٌدٍكَيِ تَن نُ تٌندِ مَ نّ عَ شِنبِ سِندٍ عَ بُن مَ، عَ مَن مُ عَ قٍلٍنمَ عَ بّ بْشِ مَ.
3مَنفّ شَ مِشِيٍ نَشَ مٌرٌدٍكَيِ مَشْرِن، «عِ مَنفّ شَ يَامَرِ مَتَندِ مَ مُنقٍ رَ؟»
4عٍ نُ لُمَ مٌرٌدٍكَيِ مَشْرِن نَ نَ قٍ مَ، كْنْ عَ مُ عَ تُلِ مَتِمَ عٍ رَ. سَ نَ قَرِ، عَ نُ بَرَ عَ قَلَ عٍ بّ عَ يُوِقِ نَ عَ رَ. نَ تّمُي، عٍ نَشَ نَ دّنتّفّ هَمَن بّ، عٍ شَ عَ مَتٌ عَ نَشَن نَبَمَ.
5هَمَن تٌ عَ تٌ مٌرٌدٍكَيِ مُ تِنمَ عَ شِنبِ سِندٍ عَ بُن مَ، عَ نَشَ شْنْ كِ قَنيِ.
6عَ تٌ عَ كٌلٌن، يُوِقِ نَن مٌرٌدٍكَيِ رَ، عَ مُ تِن عَ تَن فبَنسَن شَ تْورْ دٍ قَ. عَ نُ وَ مَ عَ شَ مِشِ بِرِن نَن نَهَلَكِقٍ قَ، يُوِقِ نَشٍيٍ بِرِن نُ نَ عَسُيٍرُ سُ شَ مَنفّيَ بُن مَ.
7عَوَ، مَنفّ عَسُيٍرُ سُ شَ مَنفّيَ حّ قُ نُن قِرِن ندٍ، كِكٍ سِنفٍ، نَشَن شِلِ نِسَن، هَمَن نَشَ سٍمَتٌي مَشْرِن، عَ شَ عَ كٌلٌن عَ لَنمَ عَ شَ يُوِقِيٍ قَشَ كِكٍ نُن لْشْي نَشَن مَ. سٍمَتٌي نَشَ عَ تٌ نَ لَنشِ كِكٍ قُ نُن قِرِن ندٍ نَن مَ، نَشَن شِلِ عَدَرِ.
8نَ تّمُي هَمَن نَشَ عَ مَسٍن مَنفّ عَسُيٍرُ سُ بّ، «سِ ندٍ نَ عِ شَ حَمَ يَ مَ، نَشَن يٍنسٍنشِ عِ شَ مَنفّيَ يِرٍ بِرِن. عٍ شَ سّرِيّ مُ لُشِ عَلْ سِ فبّتّيٍ شَ سّرِيّ، بَرِ مَ عٍ تٌندِ مَ عِ شَ يَامَرِيٍ يَتِ سُشُدٍ. عَ مُ لَنمَ عٍ شَ سَبَتِ عِ شَ بْشِ مَ.
9مَنفّ، شَ عِ تِنشِ، يَامَرِ قِ عٍ شَ هَلَكِ. ﭑ تَن يَتِ بَرَ تِن كْبِرِ فبٍتِ كٌلٍ وُلُ قُ قِدٍ عِ شَ مِشِيٍ مَ نَشٍيٍ يِ وَلِ رَكَمَلِمَ.»
10مَنفّ نَشَ عَ شَ تْنشُمَ بَ عَ بّلّشّسٌلٍ رَ، عَ نَشَ عَ سٌ هَمّدَتَ شَ دِ هَمَن يِ رَ، نَ عَفَفَكَ نَشَن نُ قِندِشِ يُوِقِيٍ يَشُي رَ.
11مَنفّ نَشَ عَ قَلَ عَ بّ، «عِ شَ عِ شَ كْبِرِ رَفَتَ. عِ مَن شَ عِ وَشْنقٍ رَبَ يِ مِشِيٍ رَ.»
12نَ كِكٍ سِنفٍ، شِ قُ نُن سَشَن ندٍ، هَمَن نَشَ مَنفّ شَ سّبّلِتِيٍ مَلَن، عٍ شَ عَ شَ يَامَرِ سّبّ مَنفّ رَ سِمَيٍ، بْشِ فٌمِنَيٍ، نُن سِ بِرِن مَنفّدِيٍ مَ. بَتَاشّيٍ نَشَ سّبّ سِ بِرِن شَ سّبّلِ كِ مَ نُن سِ بِرِن بَرِ شُي رَ. عٍ نَشَ نٍيٍ سّبّ مَنفّ عَسُيٍرُ سُ شِلِ رَ. عٍ مَن نَشَ مَنفّ شَ تْنشُمَ قْشِ سَ نَ كّيدِيٍ مَ.
13شّيرَيٍ نَشَ سِفَ نَ كّيدِيٍ رَ مَنفَتَا يِرٍ بِرِن مَ. عَ نُ سّبّشِ كّيدِيٍ كُي، كِكٍ قُ نُن قِرِن ندٍ، كِكٍ نَشَن شِلِ عَدَرِ، نَ شِ قُ نُن سَشَن ندٍ، يُوِقِ بِرِن شَ قَشَ، دِ مّدِ يٌ، قٌرِ يٌ، دِيْرّ يٌ، فِنّ يٌ. عٍ سْتْسٍ بِرِن شَ لُ مِشِ فبّتّيٍ بّ. يِ بِرِن شَ رَبَ نَ لْشْي نّ.
14عَ نُ لَن نّ يِ يَامَرِ شَ قِ مِشِ بِرِن مَ، عَلَكٌ عٍ شَ نْ نَ رَبَدٍ نَ لْشْي.
15مَنفّ شَ شّيرَيٍ نَشَ سِفَ عٍ فِ رَ عَلْ مَنفّ عَ قَلَ كِ نَشّ. عَسُيٍرُ سُ نُن هَمَن نَشَ لُ يِرٍ كٍرٍن عٍ شَ وّنِ مِن، كْنْ مِشِ نَشٍيٍ نُ نَ سُسٍ مَنفَتَا، عٍ بِرِن بْحّ نَشَ مِنِ عَ عِ.
