Esayi 11:3-15

³A niin sama nɛn Alatala yɛɛragaxun fari. A mi kitin sama yɛtagin ma. A mi feene ragidima muxune fala xuiin xɔn.

⁴Koni a sɛnbɛtarene makitima nɛn tinxinni. Yiigelitɔɔn naxanye yamanani, a yi ne feene ragidi ɲɛnige faɲini. A yamanan muxune garinma nɛn falan na alo bosana. A fala xuine yi muxu ɲaxine faxa.

⁵Tinxinyaan nun tɔgɔndiyaan luma nɛn a yi alo tagi xidin muxun tagi waxatin birin.

⁶Nayi, kankon nun yɛxɛɛ diin luma nɛn e bode xɔn, burunna ɲarin nun siin yi e sa yire kedenni, turadin nun yatan nun xuruse turaxin yi lu e bode xɔn, diidina nde yi ti e yɛɛ ra.

⁷Ɲinge gilɛn nun kanko gbeena e dɛgema nɛn, e diine yi sa e sa yire kedenni. Yatan yi sɛxɛn don alo ɲingena.

⁸Dii ɲɔrɛn sabaan soma nɛn saɲin soden dɛxɔn, diin yi nɔ a yiin nasoɛ koson yinla ra.

⁹Fe ɲaxi mi fa luma na, gbalo mi na Alatalaa geya sariɲanxin birin fari. Amasɔtɔ Alatala kolonna yamanan nafema nɛn, alo fɔxɔ igena a folon nafema kii naxan yi.

¹⁰Na lɔxɔni, diin naxan minixi Yese bɔnsɔnni na luma tixi nɛn alo taxamasenna yamane yɛɛ ra. Siyane fama nɛn a fɛma, a dɔxɔden yi lu mayilenɲɛ binyeni.

¹¹Na lɔxɔni, Marigin mɔn a yiini bandunma nɛn alogo a xa a yamaan muxu dɔnxɛne xunba: naxanye na lu e nii ra Asiriya yamanani e nun Misiran yamanan lanbanna nun a faxan na, e nun Kusi nun Elan nun Babilɔn yamanane yi, e nun Xamata yamanan nun fɔxɔ ige tagi bɔxɔne yi.

¹²A taxamasenna tima nɛn siyane xa, a Isirayila kaane malan naxanye yi suxi yɛngɛni. Yuda bɔnsɔnna muxun naxanye xuyaxi ayi dunuɲa xun xɔn, a yi ne malan sa keli bɔxɔn tongon naaninne birin yi.

¹³Nayi, Efirami bɔnsɔnna mi fa Yuda bɔnsɔnna maxɔxɔlɔnma. Yuda bɔnsɔnna yaxune raxɔrima nɛn, Efirami mi fa Yuda maxɔxɔlɔnma, Yuda mi fa findima Efirami yaxun na sɔnɔn.

¹⁴E birin sigama nɛn yɛngɛni sogegododen binni Filisitine geyane fari, e sa sogeteden binna muxune nafunle tongo yɛngɛni. Edɔn nun Moyaba yamanane yi lu e sɛnbɛn bun, Amonine yi xuru e ma.

¹⁵Alatala igen ɲanma nɛn Misiran fɔxɔ ige yireni, a yi a yiini bandun Efirati baan xun ma, a yi na baani taxun xude solofere ra a dɛ foye gbeen na, muxune yi nɔ a gidɛ, e mi e sankidine ba.