Erubasa 3:1-18

¹Mama, kenè nu lipati is menge penurù ku kenikew; tipiǥi nu ziyà te gehinawa nu is menge suǥù ku,

²su pinaaǥi kayi edluǥeyazan ka te untung wey ebmeuswaǥen ka.

³Kenè nu ewaa ziyà te kenikew is kebpekid-uunungen wey is kegkemetinumanen; ke và dà belieg ne ipurung nu ivevelieg, ne ke và dà litra ne isurat nu ziyà te ǥehinawa nu.

⁴Emun ed-ul-ulahan nu heini, egkezeliǥan ka ne ebpekepenunuat ka te Megbevayà wey menge etew, ne meupiya is kedtengtengi zan kenikew.

⁵Purung ka sarig te Nengazen ne kenè nu iyan seriǥi is kenikew he keugelingen he ketau.

⁶Minsan hengkey is ed-ul-ulahan nu ne isipa nu is Nengazen, ne iyan sikandin metau wey nu iyan meikul is metandang he zalan.

⁷Kenè nu isipa he utew ke en uluwanen, kekenà, tehuza nu is Nengazen, ne kenè nu ul-ulaha is mezaat.

⁸Iring heini te tambar he ibmeupiya te lawa nu.

⁹Beǥayi nu te zengeg is Nengazen pinaaǥi te kedhelaza nu te ketiǥeyunan nu wey te egkehuna he veǥas te langun he menge pinemula nu.

¹⁰Ne emun ed-ul-ulahan nu heini, ne egkepeuluwan is budiga nu, ne edrepey te inumen is menge teleǥuey nu.

¹¹Mama, kenè nu isipa he mezaat is kebmansu te Nengazen wey kenè nu ikeepes is kedawey zin.

¹²Su ebmensuwen te Nengazen is menge mibpelanggè din iring te ebeelan te sevaha he amey ziyà te anak din he pelanggè din.

¹³Utew zeyzey is etew he zuen din ketau wey kedsavut.

¹⁴Su zekelè pa is pulus kayi kenà is selapì wey vulawan,

¹⁵ne mahal pa heini kenà is menge elahas, ne wazà minsan hengkey he egkesuatan nu he ebpekerepeng kayi.

¹⁶Is ketau ne ebpekepeluǥayad te untung nu wey ebpekeveǥey zaan te ketiǥeyunan nu wey zengeg.

¹⁷Ebpekeuǥup heini te kebpengungubpaan nu wey te meupiya he kebpekesavuk nu.

¹⁸Utew zeyzey is etew he edtulung ebpepenurù su wey mebmetau; is ketau ebpekelipey kandin wey ebpekepeluǥayad te untung din.