Erubasa 27:11-26

¹¹Mama, mebpekeuluwanen ka su iyan heini ebpekeveǥey kedì te kelipey, ne egketavak ku is minsan hentei he edsudì kedì.

¹²Is etew he uluwanen egketuenan din emun duen piligru he egkehitavù kandin, piru is etew he kenà uluwanen ne kenà mevantey, umbe ebpekaantus sikandin.

¹³Emun ebpesarig is etew he iyan sikandin ebayad diyà te kenikew te utang te etew he wazè din mekilala, siguruwa nu he zuen din igkesandà kenikew, minsan is bisti zin, su para mesiguru nu he mekevayad sikandin.

¹⁴Is etew he iyan en igkepukew zin ke meselem is mezaǥing he kebpenuvadtuvad nu, ne ibpetug-iring din heini te kebpenrewaki kandin.

¹⁵Is bahi he peretebek te esawa zin ne iring te edtiǥisan he atep emun rendeng.

¹⁶Ne emun edewayen ta sikandin ne egkeiring ki zà te edawey te keramag wey te egkemkem te lana.

¹⁷Is putew ebpekepeǥarang te putew zaan, ne is etew zaan, iyan ibmetau te zuma zin.

¹⁸Is ed-elima te kayu he higus ebpekekaan te veǥas dutun te ed-elimahan din. Ne is suluǥuen he ebpurung ebpenilbi te egalen din ne egkezeliǥan.

¹⁹Iring te egkeehè ta is alung ta ziyà te wahig, pinaaǥi te keugelingen ta he gehinawa, egketuusan ta ke metazeng ki he etew wey ke kenà.

²⁰Kenà egkeengked is kebpemematey te etew; ne is suat te etew ne kenè daan egkeengked.

²¹Egketuenan is hustu he vulawan wey is hustu he pelata pinaaǥi te kegezami zuen pinaaǥi te hapuy, ne is etew zaan egketuenan is ked-etew zin pinaaǥi te kegkezeliǥi kandin.

²²Is tulebung minsan ed-iringen te pa te parey he ed-ey-eyazan ebeveyuwa su wey maawà is ukap, iyan, kenà gihapun egkaawà is ketutulebungi zin.

²³Pekeventayi nu wey kenè nu lemlemuwi is menge uyaǥen nu,

²⁴su is menge ketiǥeyunan wey kevantug, kenà edtaman te taman is kegkeengkena zuen te etew.

²⁵Egeraven nu is menge igkumpey nu; ne egkesuvul ǥihapun haazà is migeravan nu, su para zuen layun sagbet he egkekaan te menge uyaǥen nu puun te menge vuvungan.

²⁶Ebpekehimu ka te visti pinaaǥi te vulvul te menge kerehidu, ne ebpekepemasa ka te tanà pinaaǥi te halin te menge kambing nu.