Erubasa 23:3-17

³Kenè ka meima te meupiya he menge keenen he indtangel zin, su kela ke igezam din dà te ulaula nu.

⁴Kenè nu pesubrahi is kedhaǥù nu tenged te kedtinguhà he medsepian ka. Kekenà, pugungi nu is keugelingen nu ne is-isipa nu ke hengkey is hustu.

⁵Is selapì, ne egkehanew te senge perè dà he iring te zuen din pakpak he edlayang pehendiyà te meziyù iring te vanug.

⁶Kenè ka megkaan etawa meima te keenen te etew he kuriput, minsan meupiya pa heini.

⁷Su is etew he iring keniyan, ebelensiyen din is kezekelà te egkekaan nu. Ke sikandin, “Pengaan ka.” Piru kenè bes ebpuun diyà te meupiya he ǥehinawa zin is kegkekeǥiya zin dutun.

⁸Umbe, kenè ka penigudu kaan su egkeutè nu is nekaan nu ne egkaawè is pulus te kedeliǥa nu kandin.

⁹Kenè ka mebpekidlalag te menge tulebung, su minsan metau ke pa he ed-lalag wazà pulus gihapun kayi ziyà te kandan.

¹⁰Kenè nu eǥawa is tanà te menge ilu pinaaǥi te kedhelina te menge kezaan he menge simintu kayi.

¹¹Su is Nengazen iyan mekeǥeǥehem he edlavan kandan. Iyan sikandin ebpengalang kandan kuntra kenikew.

¹²Pemineg ka emun ebpenuruen ka su wey ka mebmetau.

¹³Kenè ka mebpeneǥana he ebmansu te anak nu. Su is kedlegkuta nu kandin ne kenè din ibpatey,

¹⁴kekenà, iyan idluǥeyazi kandin te untung.

¹⁵Mama, melipayen a emun uluwanen ka,

¹⁶wey hustu is menge lalag nu.

¹⁷Kinahanglan he kenè ka egkesina te menge mekesesalà, kekenà, tehuza nu layun is Nengazen.