Erubasa 21:11-29

¹¹Emun edsilutan is menge sumpalit, pinaaǥi zutun egkepenurù is iring dan he wazà kedsavut ne egkehimu he uluwanen. Is uluwanen he etew, ed-iseg pa is ketau zin emun egkepenurù sikandin.

¹²Is Megbevayà he metazeng netuenan din is menge vaal te menge etew he lalung, ne edsilutan din sikandan.

¹³Emun kenè ta idtetepian is egkengeayuayu he ebpekitavang kenita, ne kenè ki zaan idtetepian emun iyan ki ebpekitavang.

¹⁴Emun ebeǥayan nu te gasa he wazà metueni te zuma haazà is egkepauk kenikew, ne egkeawà is rerangit din.

¹⁵Emun ed-ikulen is hustu he kukuman, egkelipey is menge metazeng, iyan, egkengeheratan mulà is menge lalung.

¹⁶Kemetayen is egkepengkusan te etew he edlikayan din is kegketau.

¹⁷Is etew he iyan dekelà diyà te ǥehinawa zin is kedlipeylipey wey kebpengemuran ne egkepubri, ne kenè en edsepian, kekenà, egkeey-eyuwan.

¹⁸Edsilutan is menge lalung wey is meluiven su wey melibri is menge metazeng.

¹⁹Deyzey pa is kedsivey ked-ubpà diyà te sibsivayan, kenà is kebpekid-amur te peretebek he esawa.

²⁰Is uluwanen he etew ne edteǥana para te huziyan he timpu, piru is tulebung he etew ebpetakè en mulà te kegastu.

²¹Is etew he egkesuat he meupiya is ked-ubpè din wey metazeng, ebmeluǥayad is untung din, wey ebmezeeǥen, ne egkezeliǥan sikandin.

²²Is peremandar he metau te paaǥi ebpekaaǥew te inged he mezakel is menge sundaru zuen, ne ebpekerundus heini te menge verengbeng he edseriǥan dutun te menge sundaru.

²³Is etew he ebpekeventayan din is kebpengaǥikaǥi zin, ebpekelikey te samuk.

²⁴Is hembugiru wey mepelevawen he etew, ne egkekilala ta sikandin su masudì sikandin, wey utew mepedeligen.

²⁵Is tepulan, egkehimu he iyan ibpatey zin is kegkeseeng din tenged te kenè din egkekuwa is edtinguhaan din; kenè din egkekuwa su kenè man sikandin edterebahu.

²⁶Is tepulan he etew ne egkesuat layun he ebpekekuwa, piru is metazeng he etew ebeǥey he wazà kegkenuǥun.

²⁷Kenà igkesuat te Nengazen is ibpemuhat te menge lalung, lavew en ke mezaat is tuyù dan te ked-ul-ulaha zan dutun.

²⁸Is teruen he tistiǥus ne kenè en ibpekaǥi, piru is tistiǥus he tutuu is egkeǥiyen din ne iyan ibpelaus ibpelalag.

²⁹Is etew he lalung, ne kenè din igkeseeng is ed-ulaula din, piru is metazeng mulà, ebpurungan din ed-isipa is ed-ul-ulahan din.