1Igkeepes te Nengazen is limbung he paaǥi te kedtimbang, piru iyan din igkesuat is kenà kedlimbung.
2Is ebpelavew ne egkepeel-elezan sikandin, piru is kenà mepelevawen egkehimu he uluwanen.
3Is etew he metazeng, egketuenan din ke hengkey is ereg he ebeelan din su hustu man is paaǥi zin, piru is etew he edlimbung, egkezeetan su kenà hustu is paaǥi zin.
4Kenà ebpulus diyà te kenikew is ketiǥeyunan emun iyan en kebpatey nu, iyan, is ketazeng mulà, ebpekelibri kenikew te kemetayen.
5Is ketazeng te etew he wazà duen igkesewayi, iyan ebpekepelemu te ked-ubpè din, ne is mezaat he ulaula te etew ne iyan ebpekezezaat kandin.
6Is metazeng he kebpengungubpaan te etew iyan hustu he ebpekelibri kandin, piru is mezaat he penganduy te etew he meluiven ne ebpekezezaat kandin.
7Emun ebpatey en is menge etew he lalung, ne egkaawà is perateng dan; is menge penganduy zan egkehimu he wazè dan pulus.
8Edlibriyen te Megbevayà te kelised is metazeng he etew, piru kenè din mulà edlibriyen is lalung.
9Edezeetan te menge etew he wazà medtuu te Megbevayà is duma zan pinaaǥi te menge ebpekezezaat he ebpengeǥiyen dan, iyan, egkelibri mulà is metazeng he menge etew pinaaǥi te kegkeuluwanen dan.
10Ed-ugyab te kegkelipey is menge meǥinged diyà te inged dan emun ed-uswag is menge metazeng he etew; igkelipey zaan te menge meǥinged dutun emun ebpatey is menge etew he mezaat is menge ulaula.
11Pinaaǥi te kedtuvazi te metazeng he menge etew ed-uswag is inged, iyan, pinaaǥi te menge lalag te menge etew he mezaat is menge ulaula, egkezeetan is inged.
12Is etew he wazè din utew kedsavut mesudì te zuma zin, iyan, is etew he metau he edsavut, ne kenà mulà mesudì.
13Is etew he pereituk, kenà egkeseriǥan su edtudtulen din is kenà duen ibpetudtul, iyan, is etew he metazeng, egkeseriǥan mulà su kenè din edtudtulen is kenà dait he edtudtulen.
14Egkezaag te tebek is nasyun he wazà duen ebpekepenurù ke hengkey is hustu he ed-ul-ulahan, iyan, ebpekezaag mulà is nasyun he mahabet is metau he edsambag ke hengkey is hustu he ed-ul-ulahan.
15Is etew he ebpesarig te utang te zuma he etew ne meniǥù en he ebpekedsendit, piru is etew he kenà ebpesarig te zuma ebpekelikey te selenditan.
16Telehuzen is bahi he meupiya is ulaula zin. Piru kenà telehuzen is mevurut he maama su ketiǥeyunan dà is egkekuwa zin. Is etew he peǥulen egkaayuayu, piru is etew he meǥied edsepian mulà.
17Is etew he metinevangen, iring te iyan din edtevangan is keugelingen din, ne is mesipala, iring te iyan din ebpesipelahan is keugelingen din.
18Is lalung he etew, kunaan din ke meupiya is suhul kandin, iyan, meupiya mulà is suhul te etew he meupiya is menge ulaula zin.
19Meluǥayad is untung te etew he metazeng, iyan, is etew he kenà ed-engked he ebaal te mezaat, kemetayen is egkepengkusan din.
20Egkeepesan te Nengazen is menge etew he iyan dan ed-isipen is mezaat, iyan, igkelipey zin mulà is menge etew he wazà igkesawey te menge ulaula zan.
21Siguradu he edsilutan is menge etew he mezaat is menge ulaula zan, iyan, kenà mulà edsilutan is menge metazeng.
22Is kekempet te vahi he tulebung, wazà pulus diyà te kandin; iring dà te vulawan he inggalunggalung te vavuy.
23Meupiya is rimeǥas te tinguhà te etew he metazeng, piru igkepauk mulà is tinguhà te lalung.
24Duen etew he ibpemeǥey zin dà is ketiǥeyunan din, iyan, nasì ed-iseg is kegketiǥayun din, ne zuen daan utew subra is kegkenuǥun din te azen din, iyan, nasì egkaawà diyà te kandin is menge azen din.
25Is kelelaǥan he etew, ed-uswag sikandin, ne is edtavang te zuma zin, edtevangan daan sikandin te zuma zin.
26Edrewakan te menge etew is etew he idsekel zin is keuyaǥan, iyan, ebpenubtuvazan dan mulà is andam he ebelegyà te keuyaǥan su wey metevangi is duma.
27Is etew he meupiya is tuyù din, meupiya is isip te menge etew ziyà te kandin, iyan, is etew he mezaat is tuyù din, mezaat daan is ed-ul-ulahan te menge etew ziyà te kandin.
28Is etew he edsarig te ketiǥeyunan din, egkeulug iring te zahun he egkepugpug, piru is metazeng, ed-uswag iring te melambeg he pinemula.
29Is etew he ed-sinamuk diyà te keugelingen din he pemilya, ne wazà egkepupulus din, ne is menge tulebung, egkehimu zà he suluǥuen te menge metau.