Ecclesiastes 3:2-19

²God guu dugu di madagoaa e haanau ai, mo di madagoaa e made ai, di madagoaa e dogi ai, mo di madagoaa e hagi ai,

³di madagoaa e daaligi ai, mo di madagoaa e haga hili ai, di madagoaa e oho gi daha, mo di madagoaa e hau ai.

⁴God guu dugu di madagoaa e manawa gee ai, mo di madagoaa e manawa lamalia ai, di madagoaa e lodo huaidu ai, mo di madagoaa e gagaalege ai,

⁵di madagoaa e heetugi ai nnuaidina taane mo di ahina, mo di madagoaa hagalee heetugi ai nnuaidina taane mo di ahina, di madagoaa e hongi ai, mo di madagoaa hagalee hongi ai.

⁶God guu dugu di madagoaa e gida ai nia mee, mo di madagoaa e ngala ai nia mee, di madagoaa e benebene, mo di madagoaa e kili gi daha,

⁷di madagoaa e haahi, mo di madagoaa e dui, di madagoaa e noho hua deemuu, mo di madagoaa e leelee.

⁸God guu dugu di madagoaa e aloho ai, mo di madagoaa e de hiihai, di madagoaa tauwa, mo di madagoaa e noho i di aumaalia.

⁹Ma ni aha ala e gaamai i tadau moomee?

¹⁰Au e iloo nia mee daamaha a God ne haga uda mai gi gidaadou.

¹¹Mee ne haga noho nia madagoaa tau ang gi nia mee huogodoo. Mee ne gaamai gi gidaadou di hiihai gi iloo gidaadou nia mee ala ma ga kila aga maalia, gei mee digi gaamai gi gidaadou di iloo hagatau o ana mee ala e hai.

¹²Gei au gu modongoohia mai gi di au bolo tadau mee dela e mee tadau hai, la gi tenetene hua mo di hagamahi i tadau madagoaa ala e mouli ai gidaadou.

¹³Gidaadou huogodoo belee miami mo di inuinu mo di tenetene gi tadau mee ala ne ngalua ginai. Deenei la di wanga dehuia mai baahi o God.

¹⁴Au e iloo bolo nia mee huogodoo a God ne hai le e noho hua beelaa, deai ono hagaodi ai. Goe e deemee di haga puni be e daa dau mee i nia mee a Maa. Di mee deenei dela e hai go God, le e hai gidaadou gi hagalaamua a Mee.

¹⁵Nia mee huogodoo ala e kila mai be e mee di kila aga, huogodoo la guu lawa di kila aga i mua. God e hai nia mee gi kila aga i nia holongo e logo.

¹⁶Au gu modongoohia eau labelaa bolo i lodo henuailala nei, di manawa hai mee huaidu la guu pono di lohongo o di manawa hai mee donu mo di haihai di mee dela e donu.

¹⁷Au e maanadu bolo nia daangada ala e donu mo nia daangada ala e hai di hala, la ga gabunga go God be di mee hua e dahi, idimaa, nia mee huogodoo mo nia hai huogodoo ga kila aga hua i nadau madagoaa donu ala guu lawa di dugu.

¹⁸Au gu maanadu labelaa bolo God e haga madamada gidaadou, belee haga modongoohia mai gi gidaadou bolo gidaadou e hai hua be nia manu.

¹⁹I di hagaodi, tangada mo di manu le e hula gi di gowaa e dahi, meemaa e mmade hua be di mee e dahi. Meemaa ne hai hua be di mee e dahi. Tangada le e deai ono humalia i di manu ai, idimaa, di mouli le e deai dono hadinga ai ang gi tei meemaa.