Dad Fngewe 15:4-17

⁴I fye talù gamlé klawil na ktanak nawa i dad to, bay i sasè talù gamlé tduk di nawa i dad to.

⁵I to là fulung faldam là mayè flinge i tdò i maan, bay i to dmawat i kngak i maan, fiten i kfulungan mebe i kton.

⁶I knun i to matlu là lana di kenen, bay i knun i to sasè tatì lana di kakel i kalima.

⁷I kbel i gnadè fagu di to fulung faldam, ise ku fagu di to là fulung faldam.

⁸I dsù blé i to sasè knang Dwata, bay i dasal i to matlu kanlehewan.

⁹I nimò i to sasè knang Dwata, bay kanbongan nawa i to mimò i matlu.

¹⁰Ku gasyat i to di fye dalan, too blat i kaflayaman, na mati i to ku laan dmawat i kngak kenen di gugsalaan.

¹¹Du gadè Dwata i kdee gablà di gumnè i dad mati, lumban fa kgadean i kdee gablà di nawa i dad to.

¹²I to madoy là mayè ku nun mngak kenen, na là mayè mni fngewe di to fulung faldam.

¹³I to lehew, teenam i klehewan di bawehan, bay i to mlidù, teenam i klidù nawan di bawehan.

¹⁴I to nun kaglabatan mayè gambet, bay i to là fulung faldam fnò i nawan i klandè kfulungan.

¹⁵I knè i to mdanà too malima, bay i to nun klehew, too lehew i knean.

¹⁶Fye fa i to tukay knunan ku nun klikoan di Dwata, di to nun bong knunan i nun ksamuk.

¹⁷Fye fa ku tatì ge alò kmaan i gulay dmeme i demem sakdo, di kmaan ge i too fye nem uten, bay nun kasnang nawa.