Dad Fngewe 13:7-23

⁷Nun dad to flingu nun knunla balù landè, bay nun dademe dad to flingu landè knunla, balù nun bongknunla.

⁸I to nun knun, i knunan gafalwà kenen di agot dad sasè tomantak kenen, bay i to landè, landè to mantak kenen.

⁹I dad to matlu, gambet i kalwa too fye knengan, bay i dad to sasè, gambet i salò mudaf i nengan du kagunmati.

¹⁰I to fdatah i kton, landè dademe gukelan ku là samuk, bay i to flinge i fngewe, kenen fulung faldam.

¹¹I knun gwè mdà di mlal kfagu, too mlal sa lana, bay i knun gwè fagu di tu, too lamnok.

¹²Ku nun fatanam na là gdohò, too gdanà i nawam, bay ku gdohò i knayè nawam, too ge lehew.

¹³I to knangan flalò Dwata, én gafalmo kenen, bay i to mlalò i flaloan nun gufyen.

¹⁴I dad tdò i dad fulung faldam gamtabeng ge, gambet yéél mdà disfuten, na ku laloam, gafalwaan ge di ksasè i gamgebe ge di fati.

¹⁵I to nun kaglabat too mgafè, bay i to là gsalig too malima gnagun.

¹⁶I to fulung mebe i kton, funa faldam klon fa mimò, bay i to là fulung faldam, fiten di kdee i klandè kfulungan.

¹⁷I to là gsalig dek ftulen i tulen, mlé sa i ksamuk, bay i to gsalig dek ftulen i tulen, én mlé ktanak.

¹⁸I to là mayè flinge i fngewe kenen, kalima na kyà i mkel dikenen, bay i to flinge i kngak kenen, nafè i dad to.

¹⁹Ku gdohò i knayè nawam, too ge lehew, na dad to là fulung faldam là mayè tmagak i sasè.

²⁰I to sgalak i dad to fulung faldam, kenen mbaling fulung faldam, bay i to sgalak i dad to là fulung faldam nun kalmon.

²¹I samuk samlalò i dad to gamsalà, bay i kafye, én samlalò i dad to matlu.

²²I to fye, nun knunan tnagakan di dad ngà i dad ngaan, bay i knun i to gamsalà, gfun i dad to matlu kadang di satu duh.

²³I tanà là magligo, ku magligo na fanla, gamlé gablà knaan i dadto landè, bay dad to là matlu, làla faloh fafla.