Leemiso Maxaafaa 13:7-23

⁷Bana dure milatissiya asi de7ees; shin au aibinne baawa; harai qassi bana hiyyeesa milatissiyaagee de7ees; shin au daro aqoi de7ees.

⁸Asi ba miishshan ba shemppuwaa wozanau danddayees; shin hiyyeesaa yashissiyaabi baawa.

⁹Xillotussi ubbatoo poo7o; shin iitatu xomppee to7ana.

¹⁰Otoroi ooshshaa yelees; shin zoriyaa ekkiyaageeti aadhdhida eranchcha.

¹¹Daafuri bainnan demmido miishshai eesuwan xayees; shin minni oottidi demmido aqoi, dari daridi bees.

¹²Koyiyoobai polettennan gam77iyoogee azzanissees; shin amottidobai polettiyoogee ufaissees.

¹³Zore kariya uri meton gelees; shin azazuwaa bonchchiya uri saruwan de7ana.

¹⁴Aadhdhida eranchchai immiyo timirttee de7o pultto; hegee asi haiquwaa piriyaappe kessi ekkanau maaddees.

¹⁵Akeeki de7iyo uri bonchchettees; shin ammanettennan aggiyoogee bashshau efees.

¹⁶Cincca asai ubbai eran oottees; shin eeyyai ba eeyyatettaa qonccissees.

¹⁷Iita asati kiitettidi, meton geloosona; shin ammanttiya asati kiitettidi, sarotettaa ehoosona.

¹⁸Seeraa ixxiya asi hiyyeeseesinne yeellatees; shin seerin siyiya urai bonchchettees.

¹⁹Amottidobaa demmiyoogee keehi ufaissees; shin iitati iitaappe haakkanau koyokkona.

²⁰Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees.

²¹Nagaranchchata iita qaadai kaallees; shin xilloti lo77o oosuwaa woituwaa ekkana.

²²Lo77o asi ba naatu naata laatissees; shin nagaranchchaa aqoi xilluwaassi dagattees.

²³Hiyyeesaa goshshai daro kattaa aifanau danddayees; shin suure pirddai paccidoogaa gaasuwan xayees.