Dad Fngewe 12:1-9

¹I to mayè flinge i kngak kenen di gugsalaan mayè gmadè, bay i to là mayè flinge i kngak kenen di gugsalaan laan fulungfaldam.

²Kanlehew Dwata i to fye, bay i to falan fandam i sasè nimoan, nukum kenen Dwata.

³I to sasè landè gutadagan du sasè nimoan, taman fugen, bay i to matlu nun gutadagan du fye nimoan, taman là kenen fugen.

⁴Lehew na dag i satu lagi i yaanan fye ldam, bay ku nun libun gafyà i yaanan, salngad kenen i satu tduk di dad tulan i yaanan na gafalmo kenen.

⁵I fandam i to matlu gablà di demen to too tlu, bay i to sasè malak i demen to fagu di kafgawan.

⁶I talù i dad to sasè gafalmo i demen to, bay i talù i dad to matlu gafalwà i dad to fanla falmo.

⁷I dad to sasè mati, na landè tnagakla bella, bay i dad bel i dad to matlu, landè gusenla.

⁸I to fulung faldam magdayen, bay i to là matlu fandaman mgadoy.

⁹Fye fa i to mdanà ku too malgad mimò du fye mto, di to baling tatì flingu kenen bong to, bay mnè kenen di kbitil.