Cantar de los Cantares 2

1

2

3

4

5

6

7

8

¹Sarón-neba-naidgi dutu-gwichidyob an gued. Nebagi dutu-lirio-digar-gwichidyob an gued.

²An-ome-nue-sabesailad, ikoganba dutu-lirio-gwichiyobi, omegan-abalagi gudiid.

³An-sui-nue-sabesailad sapimar-abalagi manzana-sapi-gwichiyobi, sapingan-abalagi gudiid. A-sapi-urba-sigedi yeer an itodaed, e-sana, yeer gulledaed.

⁴An-sui, yeer-masgullegedse an-semai gusad, agi e-sabed anga nue-oyosad.

⁵Uva-odinnolegaledgi an-niga be ogannomala, manzanaʼgi an-niga be ogannomala, sui-abegedbina an nue-soged.

⁶Bitigi, e-sakwa-sapiled an-nono-urba mesisana gadin. Bitigi, e-sakwa-nueddi angaagwar an-imakena gadin.

⁷Omegan-Jerusalénʼginmalad, goe-sapurbarmalad-nukad an bemarga ise-wilegagwar soged, melle be an-ome-nue-sabesailad an-ibe odakmalo, melle be ese gormalo, na atakbiedba atakdagoed.

⁸¡An-sui-nue-sabesailad-e-gaya gordani an itoged! ¡Be dakmala! ¡Wegi danikid be dakmala! Yalaganba ichomakdanikid, yar-mulluganba icho-icho danikid.

⁹An-sui-nue-sabesailad goe-sapuryob daed. An-sui-nue-sabesailad goe-sapur-senigwadyob gued. Be dakmalana, anmar-galu-naba gwichid, galu-imbaba atakgwichid, arbakee yawagak-senigwad-ollo-ollogwadba an-dakgwichid.

¹⁰An-sui-nue-sabesailad anga sunmaksad. Weyob anga sogded: “An-ome-nue-sabesailad, be gwisguye. ¡Ome-yeerdakleged, be anba dagye!

¹¹Be dakena, dii-wied-ibagan bato nasye, dii-wied bato bergusye.

¹²Dutumar bato sapurba ainiarye. Namakleged-ibagan noniye. Suirgwamar-namakmalad, bela anmar-yargi itoleye.

¹³Higuera-sapi bato sanmakdeeye, uva-dub durbamakgwisye, e-dutumar bato oyapachaye. ¡An-ome-nue-sabesailad, be gwisguye. Ome-yeerdakleged, be anba dagye!”

¹⁴Igi nuu akwa-imbaba, degi, yar-imbaba yaa-olloganagi dukue, melle be deyob an-idu dukue. Be-wagar anga be oyoge, be-sunmaked-itogega be an-imake. Ar be-gayaburba yeer itoledaed, be-wagar yeer daklebalid.

¹⁵Achu-asdubingiidmar anmarga be gamala. We-achu-senigana nainu-oichoged gudimalad. Ar anmar-ibe uva-dubmar-durbamakgwismalad wiogedid.

¹⁶An-sui-nue-sabesailad angadid, an egadmogad. Dutumar-imbagi sibadmar-akwedii daed.

¹⁷An-sui-nue-sabesailad, dad-argwaned-iduale, negsichilealile, anse be dage. Goe-sapurbalidyobi be abarmakdage, yar-Beterʼye-nugad-yalaganba be abarmakdage.