Atos 27:17-43

¹⁷Kanawa tanỹkehse ahtao wapu ynanuahmykyase ehmopyra aehtohme. Yna aroryke tyryrykane a Ripia ehpikoxi isawã zuno toehse yna. Morara exiryke wera touse yna a, tywerake pyra rokẽ ytotohme tyryrykane po.

¹⁸Yrokokoro pohkane a anyanymyryhtao mõkomo ynanypapyase nakuaka yna oserepyryke, wapu tẽme hkopyra ehtohme.

¹⁹Yrokokoro wapu mõkomory nymyry ynanypapyase.

²⁰Tuhke xixi onenepyra ynanexiase, xirikuato onenepyra roropa, konopo itamurume exiryke tyryrykane maro, —Orihnõko sytatose, ynanase. Ynanoserepyase.

²¹Tuhke otuhpyra ynanẽmepyase. Naeroro Pauru ynara nase yna a, —Jepe tomo, jomipona awahtao xine Kereta po ro sehtory, mõkomo onypahpyra exiry, wapu kure ro roropa exiry.

²²Yrome seromaroro kuetatoko. Emynyhmara ehtoko. Orihpyra matose. Wapu rokẽ nerỹko mana.

²³Morara ãko ase Ritonõpo nenyokyhpyry tooehse exiryke koko ya oturuse. Jesẽme mana, ipoetoryme ase.

²⁴Ynara nykã ya, “Pauru, torẽtyke pyra exiko. Seza a ytõko mase, Roma tuisary a. Oewomãko mã Ritonõpo. Mokaro roropa ewomãko mana opokoino,” nykã inenyokyhpyry ya josenety.

²⁵Naeroro sekese ehtoko ropa. Ritonõpo enetupuhnõko ase. Ajohpe pyra mana. Kuewomatorỹko mã inenyokyhpyry nekarohpyryae ro.

²⁶Yrome ahmõta pona kuarotorỹko mã tyryrykane, tykase Pauru yna a.

²⁷Morarame 14me tynyhse ahtao tyryrykane jamihme ro nexiase. Xiaxiake wapu tarotarose, Metiteraneu tuna ena. Mame onoa wapu poko erohketõ ynara nase, —Otarãme nono moe pyra mana, nase toto.

²⁸Tuna tukuhse toto a, zueme aexiry waro toehtohkõme. Zueme ro tukuhse eya xine. Moino akoxi pitiko tukuhse ropa toto a, zueme hkopyra.

²⁹Mame topu a wapu etapary zuno toexirykõke 4me etypohkatoh tomapose toto a, wapu ãtykyry wino. Tõturuse toto Ritonõpo a axĩ aẽmehtoh poko.

³⁰Morarame wapu pokõkõ irumekary se toehse. Kanawae toytorykõ se toh repe. Kanawa tomapose tuna kuaka toto a, etypohkatoh wapu potyry pokona tyritohme sã repe. Yna enekunopyry se rokẽ toh kynexine.

³¹Mame Pauru tõturuse sajẽtu tomo a, soutatu tõ maro, —Wapu rumekaryhtao moxiamo a nerỹko sytatose, tykase ynororo.

³²Morara tykase Pauru exiryke kanawa eary tysahkase soutatu tomo a, kanawa yhtotohme.

³³Aẽmepyryhtao Pauru tõturuse toto a, —Otuhtokose. Pake oemirykõ rohnõko matose, nyhpyra roropa.

³⁴Morara exiryke otuhtoko, jamihme oehtohkõme ropa. Torẽtyke pyra ehtoko. Orihpyra matose, tykase eya xine.

³⁵Morara kaxĩpo wyi apoiase ekamotohme. Noturuase Ritonõpo a mokaro netaryme, wyi ekarotohto. Notukuase ynororo yna maro.

³⁶Morarame sekese ropa ynanexiase, tõtuhse ropa yna exiryke.

³⁷Wapu ao ynanexiase atapona 276 me.

³⁸Morarame tõtuhkehse yna ahtao, tiriiku typahse yna a nakuaka, teme hkopyra wapu ehtohme.

³⁹Mame tõmehse ahtao nono waro pyra toh kynexine, wapu poko erohketomo. Iporiry tonese ahtao eya xine moro taka wapu arory se toehse toto, isawãme tuna ehpiry exiryke.

⁴⁰Naeroro etypohkatoh eary tysahkase eya xine emapotohme nakuaka. Mame ãpuitoh myhty tymyhpokase eya xine. Moromeĩpo wera konõto taunuhmase ropa eya xine apõ pokona, ipotyry wino, tyryrykane a wapu arotohme isawã ehpikoxi repe.

⁴¹Yrome isawã pona tyryhse ipotyry wino wapu. Tũpore tyryhse isawã pona. Pohkane konõto a tãtohkase wapu.

⁴²—Ãpuruhpyrytaõkõ setapatone epara toto ehtohme, tykase soutatu tõ repe.

⁴³Yrome Pauru pyno toexiryke onetapapopyra sajẽtu kynexine. Nakuae tãtakuotyry warõkõ taropose eya osemazuhme, ahmõta pona toto ytotohme.