ᤛᤣ᤺ᤰᤕᤢᤰᤔᤡᤒᤠᤜᤠ᤹ 27:17-43

¹⁷ᤂᤧᤱᤜᤠ᤹ᤖᤧ ᤂᤧᤴ ᤌᤥ ᤔᤧᤀᤢ᤺ᤰᤂᤢᤀᤠᤱ ᤘᤠᤗᤠᤎᤠ᤺ᤴ ᤔᤧᤕ᤺ᤏᤧᤴᤗ ᤑᤠ᤹ᤀᤠᤱ ᤁᤢᤛᤡᤃᤠᤱᤗᤠᤶ ᤀᤡᤍᤠ᤺ᤰᤁᤡᤸᤗᤧ ᤆᤡᤃᤧᤰ ᤆᤡᤃᤧᤰ ᤀᤡᤔᤧᤄᤣ᤺ᤰᤂᤢᤖᤥ॥ ᤛᤡᤖᤋᤡᤛ ᤔᤧᤵᤔᤏᤠᤒᤠ ᤕᤧ᤺ᤱᤄᤠ ᤘᤠᤈᤡᤶᤒᤣᤀᤥ ᤀᤠᤎᤠ᤺ ᤑᤠ᤹ᤀᤠᤱ ᤔᤧᤃᤡᤛᤧᤀᤠᤱ ᤕᤶᤒᤠ ᤘᤠᤍᤥᤛᤠᤖᤡ᤺ᤴ ᤕᤥ ᤔᤧᤎᤠ᤺ᤛᤢ॥ ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱ ᤜᤢᤖᤧᤒᤠ ᤗᤧᤵᤔᤠᤱ ᤘᤠᤗᤠᤎᤠ᤺ᤴ ᤔᤧᤗᤧᤖᤢ ᤔᤧᤍᤣ᤺ᤛᤢᤖᤥ॥

¹⁸ᤆᤰᤔᤧᤸᤗ᤹ᤀᤣ ᤛᤢᤖᤡᤳ ᤁᤣᤈᤱ ᤁᤡᤵᤔᤠ ᤂᤢ᤺ᤛᤧᤖ ᤜᤢᤖᤧᤖ ᤏᤧᤛ᤻ᤛᤧ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤢᤍᤠ᤺ᤴᤍᤡᤰᤔᤥ ᤂᤧᤱᤜᤠ᤹ᤖᤧ ᤘᤠᤃᤰᤜᤠ᤹ ᤆᤫᤠ᤺ᤳᤋᤥ ᤗᤠᤵᤑᤢᤔᤠ ᤔᤧᤜᤣ᤺ᤰᤋᤢᤖᤥ॥

¹⁹ᤁᤢᤀᤠᤳᤇᤧᤴᤍᤠ᤺ᤴ ᤘᤠᤗᤠᤎᤠ᤺ᤴ ᤕᤠᤱᤕᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤘᤠᤍᤥᤛᤠᤔᤠᤜᤠ᤹ ᤆᤫᤠ᤺ᤳᤋᤥ ᤀᤠᤒᤠᤅᤣ ᤗᤠᤵᤔᤧᤓᤢᤛᤢᤖᤥ॥

²⁰ᤕᤖᤡᤰ ᤕᤧᤴ ᤌᤠᤖᤡᤰ ᤁᤡᤵᤔᤠ ᤂᤢ᤺ᤛᤧᤖ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤖᤧᤖ ᤏᤧᤛ᤻ᤛᤧᤒᤠᤸᤗᤧ ᤆᤥᤃᤢᤸᤗᤧ ᤗᤠᤶ ᤁᤧᤗᤥ᤺ᤒᤠ ᤂᤣᤛᤣ᤹. ᤏᤠᤶ ᤌᤣᤀᤠᤱ ᤀᤠᤏᤡᤃᤧ ᤏᤡ᤺ᤔᤠ ᤔᤧᤛᤢᤰᤋᤢᤶᤒᤧᤴᤏᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤜᤡᤱ ᤁᤧᤗ᤹ᤒᤠ ᤏᤡᤱᤛᤠᤱᤅᤠᤱ ᤔᤠ᤺ᤔᤏᤠᤍᤣ᤺ᤔᤏᤠᤖᤥ॥

²¹ᤘᤠᤗᤠᤎᤠᤀᤥᤒᤠ ᤔᤏᤠᤜᤠ᤹ ᤆᤠ ᤔᤧᤴᤈᤠᤀᤣᤒᤠ ᤕᤖᤡᤰ ᤕᤧᤴ ᤐᤥ᤺ᤰᤂᤧᤀᤠᤱ ᤘᤕᤧᤒᤠᤸᤗᤧ ᤐᤠᤘᤗᤧᤴ ᤂᤢᤴᤇᤡ᤹ ᤗᤢᤶᤔᤥ ᤕᤧᤶᤛᤡᤱᤅᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤍᤠᤱᤒᤠᤛᤣ. ᤀᤠᤒᤠ᤺ᤴ ᤁᤧᤄᤧᤵᤛᤢᤶᤔᤠᤱ ᤁᤪᤣᤋᤗᤠᤶ ᤀᤠᤴᤎᤠᤛᤡᤱᤅᤡᤴᤏᤡᤸᤗᤧᤃ ᤀᤰᤂᤣᤗ᤹ᤖᤡᤰ ᤀᤡᤶᤔᤥ᤺ᤰ ᤔᤧᤒᤥ᤺ᤰᤂᤧᤶᤒᤠᤖᤥ॥

²²ᤁᤖ ᤀᤠᤸᤗ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤗᤳᤌᤡᤰᤁᤠᤱ ᤀᤠᤴᤇᤡ᤺ᤏᤧᤴᤗᤥ. ᤁᤖ ᤁᤴ ᤘᤠᤗᤠᤎᤠ᤺ᤴᤗᤰ ᤀᤡᤶᤔᤥ᤺ᤰ ᤐᤥ᤺ᤱᤗᤥ॥

²³ᤀᤡᤱᤃᤠ᤹ ᤛᤣᤘᤠ ᤆᤥᤃᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤀᤠᤴᤍᤧ᤺ᤴ ᤛᤧᤴᤍᤡᤰ ᤀᤡᤱᤃᤠ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ

²⁴ᤀᤰᤂᤣ ᤔᤧᤳᤋᤠᤱ. ‘ᤐᤠᤘᤗᤀᤣ. ᤔᤧᤃᤡᤛᤧᤴᤏᤧ᤹ᤀᤥ. ᤂᤧᤏᤧ᤹ᤃ ᤛᤡᤈᤖᤗᤧ ᤁᤢᤍᤃᤡ ᤂᤠᤛᤧᤴ ᤗᤥ᤺ᤴᤇᤡᤱᤛᤧ ᤕᤧᤵᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ᤏᤢ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤜᤡᤱᤄᤢᤛᤡ᤹ᤖᤥ॥’

²⁵ᤂᤧᤸᤗᤧ ᤆᤥᤃᤢᤸᤗᤧ ᤀᤠᤍᤠᤱᤒᤠᤛᤣ. ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ᥄ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤳᤋᤠᤱᤒᤠ ᤁᤢᤀᤡᤛᤡ᤺ᤰ ᤁᤧᤳᤗᤥ॥

²⁶ᤜᤧᤰᤁᤣᤛᤠᤱ ᤀᤠᤏᤡ᤹ᤃ ᤁᤢᤓᤠ ᤘᤠᤃᤵᤂᤠᤶᤔᤥ ᤀᤠᤜᤠᤰᤛᤡᤱᤗᤥ॥”

²⁷ᤂᤠᤶᤍᤥᤗᤢᤶ ᤘᤖᤰᤁᤥ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤕᤠᤵᤔᤡ ᤔᤢ᤺ᤳᤋᤧᤒᤠ ᤌᤡᤰ-ᤗᤡ (᥇᥊) ᤕᤧᤴ ᤐᤥ᤺ᤰᤂᤧ ᤆᤢᤖᤧᤀᤠᤱ ᤘᤕᤧᤖᤥ॥ ᤛᤧᤳᤗᤢᤶᤓᤰᤋᤧᤸᤗᤧ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤗᤠᤈᤣ᤹ᤖᤧ ᤁᤢᤒᤣᤛᤠᤱ ᤔᤧᤃᤧᤖᤧᤒᤠ ᤏᤡᤱᤘᤠ᤹ ᤔᤧᤄᤥ᤺ᤛᤢᤖᤥ॥

²⁸ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤆᤫᤠ᤺ᤳᤋᤡᤸᤗᤧ ᤁᤢᤓᤡ᤺ᤶᤔᤧᤴ ᤀᤠᤰᤂᤧᤶᤔᤩᤠᤰ ᤏᤧᤒᤣ ᤑᤠ᤹ᤀᤠᤱ ᤗᤢᤱᤅᤡᤴ ᤀᤡᤍᤠ᤺ᤰᤁᤡᤸᤗᤧ ᤀᤡᤔᤧᤄᤣ᤺ᤰᤂᤢᤀᤠᤱ ᤆᤫᤠ᤺ᤳᤋᤥ ᤔᤧᤎᤠᤛᤢᤀᤠᤱ ᤔᤧᤛᤡ᤺ᤰᤋᤢᤸᤗᤧ ᤜᤢᤰᤛᤡᤰ ᤕᤧᤳᤁᤡᤵ (᥎᥆) ᤔᤧᤄᤥ᤺ᤛᤢ॥ ᤜᤧᤰᤁᤩᤠᤱ ᤛᤵᤑᤠᤱ ᤔᤧᤛᤡ᤺ᤰᤋᤢᤸᤗᤧ ᤜᤢᤰᤛᤡᤰ ᤋᤢᤰᤁᤡᤵ (᥌᥆) ᤔᤧᤄᤥ᤺ᤛᤢᤖᤥ॥

²⁹ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤕᤠᤀᤥᤒᤠ ᤐᤕᤶ ᤗᤢᤱᤅᤥ ᤀᤠᤍᤥ᤺ᤰᤐᤡᤗᤠ ᤑᤠ᤹ᤀᤠᤱ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤘᤠᤗᤠᤎᤠ᤺ᤸᤗᤧ ᤁᤢᤀᤣ᤺ᤰᤗᤧᤵᤔᤠᤱᤏᤢ ᤗᤡᤛᤡ ᤘᤠᤍᤥᤂᤧ᤺ᤰᤆᤢᤖᤡᤜᤠ᤹ ᤔᤧᤎᤠᤛᤢᤀᤠᤱ ᤀᤠᤸᤗ ᤜᤠᤖᤠ ᤂᤠᤀᤥ᤺ᤳᤏᤡᤖᤥ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤖᤥ॥

³⁰ᤜᤧᤰᤁᤩᤠᤱ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤘᤠᤗᤠᤎᤠᤸᤗᤧᤴ ᤋᤰᤗᤧᤵᤔᤠᤱᤏᤢ ᤘᤠᤍᤥᤂᤧᤰᤆᤢᤖᤡᤜᤠ᤹ ᤁᤧᤎᤠ᤺ᤒᤠ ᤔᤧᤗᤠᤶᤛᤡᤱᤗ ᤂᤧᤳᤇᤡᤱᤔᤠ ᤑᤠ᤹ᤀᤠᤱ ᤂ᤺ᤱᤒᤣᤴ ᤕᤥ ᤆᤫᤠ᤺ᤳᤋᤥ ᤌᤠ᤺ᤔᤠ ᤔᤧᤜᤣ᤺ᤰᤋᤢᤖᤥ॥

³¹ᤁᤖ ᤐᤠᤘᤗᤖᤧ ᤌᤰᤋᤢᤶᤒᤠ ᤏᤢ ᤌᤰᤛᤢᤒᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤘᤠᤍᤥᤆᤠ᤺ᤰᤐᤠᤜᤠ᤹ ᤁᤴ ᤘᤠᤗᤠᤎᤠᤀᤥ ᤔᤧᤴᤕᤠ᤺ᤰᤏᤧᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤁᤧᤴᤜᤡᤱᤅᤡᤴᤗᤥ॥”

³²ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤂ᤺ᤱᤒᤣᤴ ᤁᤧᤓᤥ᤺ᤶᤒᤠᤀᤠᤱ ᤁᤧᤒᤵᤐᤠ ᤀᤡᤍᤠ᤺ᤰᤜᤠ᤹ ᤔᤧᤄᤰᤋᤢ ᤔᤧᤍᤣ᤺ᤛᤢᤀᤠᤱ ᤂ᤺ᤱᤒᤣᤴ ᤆᤫᤠ᤺ᤳᤋᤥ ᤔᤧᤗᤧᤖᤢ ᤔᤧᤍᤣ᤺ᤛᤢᤖᤥ॥

³³ᤀᤠᤸᤗ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤐᤠᤘᤗᤖᤧ ᤂᤧᤱᤜᤠ᤹ ᤁᤢᤈᤠᤛᤡᤰ ᤆᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤛᤡ. “ᤂᤡᤏᤡ᤹ᤃ ᤁᤧᤃᤡᤛᤡᤒᤠᤸᤗᤧ ᤆᤥᤃᤢᤸᤗᤧ ᤌᤣᤀᤠᤱ ᤔᤧᤴᤈᤠᤀᤣ ᤁᤧᤘᤕᤡᤒᤠ ᤌᤡᤰ-ᤗᤡ (᥇᥊) ᤕᤧᤴ ᤐᤥ᤺ᤰᤂᤧ॥

³⁴ᤜᤡᤱᤔᤠᤖᤧ ᤗᤠᤃᤡ ᤌᤣᤀᤡᤃ ᤆᤠᤔᤠᤀᤣ ᤐᤥ᤺ᤱ. ᤜᤧᤰᤁᤣ᤺ᤸᤗᤧ ᤆᤠᤈᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥ ᤂᤡᤏᤡ᤹ ᤌᤧᤃᤣ᤺ᤰᤀᤡᤎᤡᤰᤁᤠᤱ ᤌᤣᤀᤠᤱ ᤔᤧᤒᤥ᤺ᤱᤏᤧᤸᤗᤥ॥”

³⁵ᤐᤠᤘᤗᤖᤧ ᤜᤧᤰᤁᤣ ᤔᤧᤳᤋᤢ ᤛᤢᤖᤢᤛᤡᤀᤠᤱ ᤁᤢᤓᤠ ᤂᤖᤧ᤺ᤱ ᤂᤵᤛᤢᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤆᤠᤔᤠ ᤜᤣ᤺ᤰᤋᤢᤖᤥ॥

³⁶ᤂᤧᤱᤜᤠ᤹ ᤁᤠᤰ ᤜᤠᤱᤜᤠᤱ ᤔᤧᤗ᤹ᤖᤧᤀᤠᤱ ᤆᤠᤈᤠᤔᤠ ᤔᤧᤜᤣ᤺ᤰᤋᤢ॥

³⁷ᤀᤠᤏᤡᤃᤧ ᤘᤠᤗᤠᤎᤠᤀᤥ ᤁᤡᤵ ᤌᤡᤰ ᤏᤧᤳᤇᤡᤀᤠᤱ ᤏᤢ-ᤋᤢᤰ (᥈᥍᥌) ᤔᤏᤠᤜᤠ᤹ ᤕᤠᤰᤔᤏᤠᤖᤥ॥

³⁸ᤁᤧᤖᤧᤰᤗᤧ ᤂᤢᤏᤡ᤹ ᤂᤠᤄᤠ ᤆᤠ ᤔᤧᤈᤀᤠᤱ ᤘᤠᤗᤠᤎᤠ᤺ᤴ ᤕᤠᤱ ᤕᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤛᤡ-ᤈᤠᤜᤠ᤹ ᤆᤫᤠ᤺ᤳᤋᤥ ᤗᤠᤵᤔᤧᤓᤢᤛᤢᤖᤥ॥

³⁹ᤜᤧᤰᤁᤩᤠᤱ ᤏᤠᤶᤒᤡᤴᤍᤧᤀᤠᤱ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤘᤠᤖᤰ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤋᤧᤴ ᤔᤧᤏᤡ᤺ᤛᤢ. ᤁᤖ ᤗᤠᤈᤣ᤹ᤀᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ॥ ᤜᤧᤰᤁᤩᤠᤱ ᤁᤢᤕᤠᤀᤥ ᤋᤣ᤹ᤔᤠᤀᤠᤱ ᤁᤧᤗᤢᤶᤛᤡᤱᤒᤠᤀᤠᤱ ᤁᤧᤏᤧᤒᤠ ᤕᤧ᤺ᤱᤄᤠᤀᤥ ᤘᤠᤗᤠᤎᤠ᤺ᤴ ᤜᤠᤰᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤔᤧᤈᤥᤃᤢᤖᤥ॥

⁴⁰ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤘᤠᤍᤥᤂᤧ᤺ᤰᤆᤢᤖᤡ ᤀᤡᤍᤠ᤺ᤰᤜᤠ᤹ ᤔᤧᤄᤰᤋᤢᤀᤠᤱ ᤘᤖᤰᤁᤥ ᤔᤧᤏᤡ᤺ᤒᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤢᤍᤥ᤺ᤶᤔᤠ ᤁᤢᤜᤡᤔᤠ ᤛᤡᤱᤅᤡᤴ ᤁᤧᤎᤶᤒᤠᤀᤠᤱ ᤁᤧᤒᤵᤐᤠ ᤀᤡᤍᤠ᤺ᤰᤜᤠ᤹ᤀᤠᤱ ᤔᤧᤓᤠ᤺ᤰᤂᤢ ᤔᤧᤍᤣ᤺ᤛᤢᤖᤥ॥ ᤂᤧᤱᤜᤠ᤹ᤖᤧ ᤘᤠᤍᤥᤛᤠᤖᤡ᤺ᤴ ᤔᤧᤓᤠ᤺ᤰᤂᤢᤀᤠᤱ ᤔᤧᤓᤥ᤺ᤴᤍᤢ॥ ᤜᤧᤰᤁᤣᤗ᤹ᤖᤡᤰ ᤛᤢᤖᤡᤳᤔᤠᤸᤗᤧ ᤘᤠᤗᤠᤎᤠ᤺ᤴ ᤔᤢ᤺ᤳᤋᤢᤖ ᤁᤢᤕᤠᤀᤥ ᤋᤣ᤹ᤖᤢᤖᤥ॥

⁴¹ᤁᤖ ᤘᤠᤗᤠᤎᤠ᤺ᤸᤗᤧᤴ ᤋᤰᤗᤧᤵᤔᤠᤱᤒᤧᤴ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤁᤧᤗᤢᤶᤛᤡᤱᤒᤠᤀᤠᤱ ᤁᤧᤏᤧᤒᤠ ᤕᤧ᤺ᤱᤄᤠᤀᤥ ᤛᤠ᤹ᤖᤡᤰ ᤜᤠᤰᤛᤡᤱᤅᤠᤱ ᤔᤢᤶᤔᤠᤀᤠᤱ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤣ᤺ᤰᤗᤧᤵᤔᤠᤱᤒᤠᤴ ᤘᤠᤓᤧᤸᤗᤧᤱᤅᤡᤸᤗᤧ ᤜᤡᤵᤋᤢᤀᤠᤱ ᤕᤶᤔᤠ ᤜᤣ᤺ᤰᤋᤧᤖᤥ॥

⁴²ᤌᤰᤛᤢᤒᤠᤜᤠ᤹ᤖᤧ ᤐᤢᤱᤗᤠᤎᤠᤒᤠᤜᤠ᤹ ᤘᤠᤔᤧᤈᤠ᤺ᤰᤁᤠᤱ ᤔᤧᤄᤧᤳᤇᤡᤱ ᤔᤧᤒᤣ᤺ᤰ ᤑᤠ᤹ᤀᤠᤱ ᤛᤧᤵᤔᤠᤛᤡ ᤏᤡᤱᤛᤣ᤺ᤰ ᤔᤧᤈᤥᤃᤢ॥

⁴³ᤁᤖ ᤌᤰᤋᤢᤶᤒᤠᤸᤗᤧ ᤐᤠᤘᤗᤧᤴ ᤋᤠᤱᤛᤧ᤺ᤵᤔᤠ ᤑᤠ᤹ᤀᤠᤱ ᤔᤠ᤹ᤖᤢᤀᤠᤱ ᤘᤠᤈᤠ᤺ᤰᤔᤠ ᤁᤧᤗᤧᤒᤠᤜᤠ᤹ ᤋᤃᤡ ᤔᤧᤒᤡᤴ ᤔᤧᤎᤠᤏᤡᤀᤠᤱ ᤘᤠᤔᤧᤈᤠ᤺ᤰᤁᤠᤱ ᤁᤢᤕᤠᤀᤥ ᤔᤧᤒᤣ᤺ᤰᤏᤡ ᤜᤧᤰᤁᤩᤠᤱ