Atos 23:9-35

⁹Morarame toepanaikase toto tõtururukohtao imoihmãkomo. Mame Moeze omihpyry warõkõ towõse xikihme tõturutohme. Parixeu tõ kynexine. Ynara tykase toto, —Mose azahkuru pyra nase. Otarãme Ritonõpo nenyokyhpyry tõturuse mã imaro. Morara exiryke jehno pyra sehtone, Ritonõpo poetory zehno pyra, tykase toto.

¹⁰Mame morotaõkõ tõxienonohse itamurume. Mame Pauru tywyhtywyhmaryhtao eya xine soutatu tõ tonyohse koroneu a Pauru arotohme ropa tytapyĩkõ taka.

¹¹Morarame koko Jezu tõturuse Pauru maro. Ynara tykase ynororo eya, —Tãkye exiko Pauru. Jerusarẽpõkõ mutuarõtanopyase toh ypoko. Moro saaro Romapõkõ roropa tuarõtanohnõko mase ypoko, tykase Jezu eya.

¹²Morarame yrokokoro juteu tõ oximõme toehse Pauru etapary se exiketomo. —Otuhpyra sehtone, eukuru onẽpyra roropa sehtone Pauru etapatoh ponãmero kyya xine, tykase toto.

¹³40me motye Pauru etapary se exiketõ kynexine.

¹⁴Mame toytose toto tytamuxirykomo a, Ritonõpo maro oturuketõ tuisary tomo a roropa oturuse. Ynara tykase toto eya xine, —Otuhpyra ynanase, eukuru onẽpyra roropa ynanase Pauru etapatoh ponãmero yna a.

¹⁵Naeroro kokoro koroneu a Pauru enehpoko oya, õturupotohme samo. Ynanase eraximãko etapatohme, tykase toto eya xine, tytamuxirykomo a.

¹⁶Morara kary totase Pauru patumy a. Mame toytose ynororo soutatu tõ tapyĩ taka Pauru zuruse.

¹⁷Morarame Pauru a sajẽtu tykohmase tyya. —Mose nuasemã arota auturutohme koroneu a, tykase ynororo.

¹⁸Mame tarose eya. Ynara tykase ynororo koroneu a, —Mose Pauru nenehpohpyry oturuse amaro, tykase.

¹⁹Mame emary poko mokyro tarose koroneu a mya, tõtururukõ onetara imehnõ ehtohme. —Aimo, oty kary se hma ya? tykase ynororo eya.

²⁰Ynara tykase ynororo, —Juteu tõ otururu etano. Oya Pauru aropõko toh mana kokoro, kõseriu tomo a, imaro tõturutohkõme ropa.

²¹Yrome anaropyra exiko. 40me motye etapary se exiketõ mana Pauru eraximãko, etapatohme. Otuhpyra, eukuru onẽpyra, enara toh mana Pauru etapary se toexirykõke. Seromaroro oehnõko toh mana oturuse amaro, tykase ynororo eya.

²²Mame koroneu a nuasemã taropose ropa, —Sero onekaropyra ropa exiko imehnomo a, tykase ynororo eya.

²³Morarame koroneu a asakoro kapitão tykohmase tyya. Ynara tykase ynororo eya xine, —200me soutatu eahmako, Sezarea pona oytotohkõme, 70me kawaru aronanõ maro, 200me roropa warata ekomananõ maro, tykohmãsehxo ahtao oytotohkõme.

²⁴Kawaru tõ enehpoko Pauru ytotohme epo. Tomeseke arotatoko kowenu terekatu a, Perixi a, ewomatohme eya, tykase.

²⁵Mame pape tymerose eya aropotohme. Ynara tymerose eya Perixi neneryme,

²⁶“Ynymerohpyry moro oneneryme. Jepe nymyry mase Perixi. Ywy ase Kyrautiu Rixia. Kure pãna mã repe?

²⁷Mokyro Pauru tapoise juteu tomo a, etapatohme repe. Yrome soutatu tomo a towomase, romanome exiryke.

²⁸Mokyro aroase juteu tõ kõseriu ẽpataka azahkuru exiry waro jehtohme repe.

²⁹Yrome axĩ zuaro toehse ywy. Romano kowenu omihpyry poko mose onyhxiropyra toh nexiase, tytamuxiry tõ omihpyry poko rokene. Morara exiryke ẽmapory se pyra exiase ãpuruhpyry taka. Etapapory se pyra roropa exiase.

³⁰Mame, ‘Juteu tõ mokyro etapary se,’ kary totase ya. Morara exiryke aropoase myaro. Pauru zehnotokõ roropa aropõko ase oya, ihxirotohme onetaryme. Enara rokẽ ynymerohpyry moro oneneryme. Ywy ase Kyrautiu Rixia.”

³¹Morarame Pauru tarose soutatu tomo a, koroneu omi poe. Koko tarose toto a Ãtipatyri pona.

³²Yrokokoro pupu po rokẽ ytoketõ toeramase ropa tytapyĩkõ taka. Kawaru po ytoketõ rokẽ Pauru maro toytose.

³³Mame Sezarea pona toeporehkase toto ahtao pape tokarose eya xine kowenu tuisary a. Pauru roropa tokarose eya xine.

³⁴Mame pape tonese ahtao kowenu tuisary a Pauru a tõturupose, —Otypõ mahno? tykase. —Xirixiapõ ase, tykase Pauru. Moro waro toehse tahtao

³⁵ynara tykase ynororo eya, —Imeĩpo okohmãko ase ohxironanõ tooehse ahtao, tykase ynororo eya. Mame tõmapose Pauru eya, Erote tapyinỹpyry kurã taka.