Jesos Odanodaganan Odijitcige8ini8an 23:9-35

⁹Midac ki kitci pabibaginani8an. Nandam ka taci8adj Coda8innig kikinoamage8innig, ka iji acidagimagani8i8adj igi8e ka nagadjito8agobanen inakonige8inan, ki pazig8i8ag e kitci aiajide8e8adj: “Ka8in madji kegon nimikasinanan kidji gi inakamigizidj 8aa nabe Pon. Ne8ad pejig ajenin konigotc pejig manidon ogi aiamiigodog8enan.”

¹⁰Kegapitc igi8e ka kaganondi8adj ki ani k8ag8e migadi8ag. Ka niganizidj cimaganic ogi kosabanin Ponan kidji nisimagani8indjin. Midac ogi inan ocimaganiciman kidji sagiziimagani8indjin Ponan ka iji ma8adjiidinani8anig, acitc kidji pidigeagani8indjin ka iji 8akaak8aigadenig.

¹¹Apitc e ani onag8icinig, ka Tibendjigedj ogi pi nda 8abaman Ponan acitc ogi inan: “Ka8in kotadjiken! Aja kigi paba tibadjimonan nikikinoamage8in Jerusalem odenakag, acitc panima kiga iji tibadjimonan Rom odenakag.”

¹²8iabanig, nandam Coda8innig ki onendamobanig kidji nisa8adjin Ponan, e ikido8adj: “Ka8in kiga 8isinisimin, acitc ka8in kiga minik8esimin, pinici kidji ick8a nisaiak Pon. Kicpin ega todamak ii, kiga madji iji8ebizimin.”

¹³A8acamej nimidana8e8agoban (40) Coda8innig kagi onendamo8agobanen kidji nisa8adjin Ponan.

¹⁴Ogi nda 8abama8an dac Coda8inni kitci aiamie ogiman acitc ka niganizindjin Coda8innin. Ogi ina8an: “Nigi onendananan, Kije Manido e 8abamigo8ag, ega kidji 8isiniag pinici kidji nisagani8idj Pon.

¹⁵Mi oo kagi iji nda8endamag kidji todameg, kina8a acitc kitci aiamie onakonige8innig. Nd8e8emik ka niganidj cimaganic kidji pidji8inadjin Ponan ooma. 8idamaok kiabadj e 8i k8ag8edjimeg Pon kegoni, na8adj kidji nisidotameg adi kagi inakamigizidj. Nina8it dac niga nisanan meg8adj pidji8inagani8idj.”

¹⁶Pejig dac Pon odojiman ki nodage8an adi 8a toda8agani8ipan. Teci8ag ki ija ka iji 8akaak8aigadenig kidji nda 8idama8adjin Ponan.

¹⁷Pon dac ogi nd8e8eman pejig cimaganici ogiman acitc ogi inan: “Iji8ij aa ockina8es kidji nda 8abamadjin ka niganizindjin cimaganican. O8i 8idama8an kegoni.”

¹⁸Midac aa cimaganici ogima ogi iji8inan ini ockina8esan 8edi ka tendjin ka niganizindjin cimaganican acitc ogi inan: “Aa takonigan Pon nigi nd8e8emig acitc nigi k8ag8edjimig kidji pidji8inag 8aa ockina8es ooma. Ki8i 8idamag kegoni.”

¹⁹Ka niganizidj dac cimaganic ogi sagindjinan ini ockina8esan acitc ogi iji8inan ega eji tendjin kodagian a8iagon. Midac ogi k8ag8edjiman: “8egonen 8a ikido8an?”

²⁰Aa ockina8es ogi nak8e8ajian: “Ki nakomidi8ag Coda8innig ka niganizi8adj kidji k8ag8edjimik8a kidji pidji8inimagani8indjin Ponan 8abanig nigan ka iji ma8adjiidindjin Coda8inni kitci aiamie onakonige8innin. Kada in8ekazo8ag, e inik8a kiabadj e 8i k8ag8edjima8adjin kegoni, 8e8enda kidji nisidotamo8adj adi maia kagi inakamigizindjin.

²¹Ka8in dac teb8eta8akenig! A8acamej nimidana (40) Coda8innig kada kazo8ag kidji k8ag8e nisa8adjin Ponan. Ma8asag ki kitci onendamog ega kidji 8isini8adj acitc ega kidji minik8e8adj pinici kidji nisagani8indjin Ponan. Aja dac nogom kitaji piigog, e 8i nodaok8a adi ke ikido8an.”

²²Ka niganizidj dac cimaganic ogi inan: “Ka8in a8iag 8idama8aken egi tatibadjimotaojian ii.” Midac ka iji madjinija8adjin ini ockina8esan.

²³Ka niganizidj cimaganic ogi nd8e8eman nijin cimaganici ogiman. Ogi inan dac: “Ma8adjiikog nijo midasomidana (200) cimaganicag kidji ijaieg Sesani (Césarée) odenag, acitc nij8asomidana (70) ka pimibaigo8adj cimaganicag, acitc dac nijo midasomidana (200) cimaganicag ka takonamo8adjin cimaganici pajibaiganan. Kiga madjam cagidasotibaiganeag e onag8icig.

²⁴Nadji8ijikog acitc pebejigogack8eg kidji pimibaigodj Pon. Mi panima ki iji8inagani8idj kitci ogima Pilikisikag (Félix), ega madji kegoni kidji gi ijisedj.” Mi ka ikidodj ka niganizidj cimaganic.

²⁵Midac ka iji ojibiigedj. Mi oo ka ikidomaganig odojibiigan:

²⁶“Kin Pilikis kitci ogima ka kitci apitendagozian, kidanamikon.

²⁷Coda8innig ogi takona8an ono naben acitc o8i nisa8an. Midac nigi kikendan Rom ogima8i8inikag eji tibendagozidj. Nigi 8idji8ag dac nicimaganicimag acitc nigi 8idjia kidji ojimodj.

²⁸Ni8i kikendanaban 8egonen 8edji 8i nisa8adjin. Midac nigi iji8ina ka iji ma8adjiidindjin Coda8inni kitci aiamie onakonige8innin.

²⁹Midac oo kagi kikendaman. Nandam Coda8innig ki ikido8ag e kitci madji inakamigizindjin osa ega egi nosoneamindjin odinakonige8ini8an. Nin dac 8in enendaman ka8in abidji kitci kegoni ki inakamigizisi kidji gi odji kiba8agani8ipan kek8an kidji gi odji nisagani8ipan.

³⁰Nigi 8idamago dac egi kimodji onendamo8adj nandam Coda8innig kidji nisa8adjin. Midac 8edji ki pi ijinija8ag kinikag. Acitc dac nigi inag igi Coda8innig kidji nda 8abamik8a kidji gi 8idamaok8a adi ka iji panaagendjin. Pojo! Nin Kalod Lisias (Claude Lysias).” Mi oo ka ojibiigedj ka niganizidj cimaganic.

³¹Midac cimaganicag ogi todana8a adi ka inagani8i8adj. Ogi iji8ina8an Ponan meg8a tibik Antipatini (Antipatris) odenakag.

³²8iabanig, cimaganicag ka pimibaigo8adj ogi 8idji8a8an Ponan, kodagiag dac cimaganicag ki ki8e8ag 8akaak8aiganikag.

³³Igi cimaganicag ka pimibaigo8adj ki ija8ag Sesani (Césarée) odenakag. Ogi mina8an dac kitci ogima Pilikisan ii ojibiigani Kalod Lisiasan kagi ojibiigendjin, acitc dac ogi mina8an Ponan.

³⁴Kitci ogima Pilikis ogi nabo8adan ii ojibiigani. Midac ogi k8ag8edjiman Ponan: “Adi 8edjian?” Pon ogi inan: “Silisia (Cilicie) aki nidodji.”

³⁵Midac Pilikis ogi inan Ponan: “Kiga tibakonin apitc tag8icino8adj igi8e ka inactaonik8a.” Ki ikido dac kidji kana8enimagani8indjin Ponan kitci migi8amikag 8eckadj kagi ojitogobanen kitci ogima Herod.