Aposel 23:9-35

⁹Kemin, ili tuluk-tulukmin-kup ke-bam disa akal ma kemiple, lo utamsip tunum ma Falosi kesip ita tola dukum-kup boko-lomdip: Nuli tunum kala atabup kalaali, ami ban kemin kaa ma bom buu kalbup disa. Sinik e ensel e ta taba-lomda, Damaskus unemin liip kawu bokolase nema yo? kalipla,

¹⁰ti weng aal dukum-kup kemipya, soldiya imi kamokim ayo itama yi, Yak-una tildak-una ke-bamdip, weng aal dikibip iyo taba-lom, Pol ayo biing-mo dibii-una-tala-ke-bam: Aalolip o, kala-lomda, suun-daa soldiya imi bokoya tildaak kamok kamok imi iipyak tem tildaak aba-lomdip kasen tap-kup Pol ayo dap-tamalip tam ilmi am dukum kaptam unip.

¹¹Kemin, kutamiip kawu, Kamokim Yesus ayo tal Pol almi mepso kulu tola bokola-lomda: Pol kapyo, suunin daa; atin ti titil-biki-bomdap, nami sang kaa Jerusalam kala bomdap bakayimbap tap ke, nami sang ayo abip dukum Rom kawu bakayim-bam ke-mokomap o, aka ko.

¹²Am daana kutim kawu, Juda malo ma iyo maaklo tala-tala-ke taken-bamdip, God ami tiin diim weng kutii bokolip: Ima ok fala ilomdup, Pol aalup saaknaya kawu, asuk ok so, ima so, inamnum; aa aalin disa ke-lom inam-nokomup namti, God ata taba-lom yela saak-namup o, ke-bam bakamip.

¹³Tunum ilmi-kup 40 le, kuno anung ma ita kanum boko-lomdip,

¹⁴kulaali, din awem tunum pris imi kamok kamok iso, Juda imi kamok kamok iyo bokoya-lomdip: Alik nuli God ami tiin diim kawu weng kutii boko-lomdup: Pol kaa aalin disa ke, ima inamnup namti, God ayo numi yelala, taanokomup o, kalup. Kemin,

¹⁵kipso, Kaunsol kamok kamok ipso, ipta weng binalip din Rom kasel imi soldiya imi kamokim ayo kasen-fokola-lomdip: Pol ayo dap-taldaak daalawa, ami kukup aye, weng aa, kaami sang kaata, maso ma bokoyilaya, dotu utamum o, kalipla, nuli liip kawu kutii ilupla, Pol ayo tal kamok kamok ipni diim talokoma disa. Nuta liip kawu kutii ilup, ayo tiltoop tala, aalokomup o, kemip ko.

¹⁶Kulaa, Pol almi unang umi man ata weng sanala boko-lomdip: Juda iyo asuk kutii-lomdup Pol ayo aalum o, kalbip kala kala-lomda almi unang man ata tiltam soldiya imi am dukum ayo tiltam Pol ami bokolaya,

¹⁷Pol asiik soldiya tiin molin tunum naan-daala tal atamale, bokola-lomda: Kabi mep man tunum man kalaali, kapni kamokim ami weng ma bokolon o, kalba kemin, tal dibii-din daalawa bokolak o, kalaya,

¹⁸kulaa fan, soldiya imi tiin molin ayo dibii-din kamokim be daa bokola ko: Pol sok de-dubip ta, weng umbaap-na yang atami bokop-na-lomda: Mep man tunum man kalawa kapni kamokim ami weng ma bokolon o, kalba kemin, dibii-din daalawa bokolak o, kalaya, dibii-tili no, akale,

¹⁹kulu kamokim ayo yak man dap-tal-fuku dibii-yang sawaan tem kabangu akola bokola ko: Kabi kanim sang ma bokop-non o, kalalawa talap? Kala dik-daalale,

²⁰ayo bokola ko: Juda imi kamok kamok iyo weng taken-bam boko-lomdip: Sabi kawu, soldiya imi kamokim ami din-ilom kasen-fokola-lomdup, Pol ami kukup so, weng so, kaami sang kaata ayo maso ma bokoyilaya, dotu utamum o, kala kanum bokoluwa, dibii-tildaak kamok kamok imi bilip tildaak talak o, kebip. Lale,

²¹kabi imi waka-taka-mokomip weng kaa, weng san-ilomdap, Pol kaa dibii-unemin disa kayi! Tunum kaa kanubip kiili, 40 le, kuno anung ma kanolin kiita, liip kutii-lomdup aalum o, kalaliwa, ili God ami tiin diim kawu boko-lomdip: Nuli aalin disa ke-lomdup ima ina, ok ina kelup namti, God ayo taba-lomda yela taanokomup o! kala-lomdip weng dotu-lom tii, kapni weng kaata-kup tal: Ayo! yakawa yo, kala-lom, fenbip o, kala man ayo kamokim ami kanum bokolaya

²²kemin, soldiya tunum imi kamokim ayo man tunum man ami bokola: Kapni weng kaa bokop-nap kaami sang ayo tunum ali ma bokola-laamin disa kayi! kala-lomda dabaala tambana ko.

²³Kemin, kulaa, kamokim ayo soldiya imi tiin molin tunum alep ma naan-daaya, tal atamiple bokola: Alep kipta din soldiya iyo bokoyip dotuliwa, kutamiip-kulii unokomip ayo ti, tawaal liip yalmin tunum almi-kup 200 ale, hos daang kun diim yalmin tunum almi-kup 70, kuno tam tawaal liip tal une-bam, bainat tup dinin ita 200 kela, kiita afet-daa-lom, mafek mafek talalmipla, am kutamiip-nula, atan sinik talaba tam biti diim tulu kala kalale, kulaa ayo kuliilip abip Sisaria unin o.

²⁴Kuno Pol akal hos ma kola kelip tam ami daang kun diim kabaaku tiinala, yaap-kup dibiilip provins kamokim diilim Feliks bombe unin o, yakale,

²⁵sukon ayo dola kuya-lom bokoyila ko:

²⁶Provins kamok diilim tambal Feliks kaa balap o? Nali Klodius Lisias nata sukon kala dola kup-ti.

²⁷Mep tunum Pol kalawaali, Juda ita taba-lom dap-tal-fuku aalup taanak o, ke-bilipla, nayo atami yi, Kaali Rom kayaak tunum kesa kala kalaliya, soldiya iyo fokoli abiltap din-ilomdip imi sikil un-ilom dabuu dap-tal daasii. Kemin,

²⁸nali atamila, Juda kasel iyo kanim kalan aamum o kem-solip kaa, kalon o, kalaliya, ayo imi bilip dibii-daak daayili. Kemin,

²⁹nali utami yi, Ilmi lo kabak-ami mafek mafek kalan uta mafak bakaan-bam kanonbip. Yale, ami ban ma buu keluya aalap taanak o! Aa sok dedulan kalolapla, kaa tambal disa kala bom-ilila,

³⁰tunum ma kaata, tal bokop-na-lomda: Juda kayaak iyo yawalmin weng baka-bam boko-lomdip: Aalup saaknak o! kalbip kayi! kalaya, abiltap nayo dabaap-ti tala kemin, aalum o, kebip kiimi bokoya-lomdi: Ibi kanim kalan kanonbup kala, kala-lomdip, din provins kamok diilim Feliks ami bokolin o, kali kayi! kala-lomda, sukon kaayo dola kuya ko.

³¹Kemin, soldiya iyo kamokim ami weng ayo weng sandipla, kutamiip kawu, Pol ayo dap-tamalip umbitoop abip Antipatris toop ba kem-silip, am daanale,

³²soldiya malo tawaal liip yalmin iyo aptum kusal iyo keyila asuk ilmi abip unipla, malo ma hos daang kun diim yalmin ita, Pol ayo dibii-din

³³abip Sisaria din aba, sukon ayo provins kamok diilim ami konbip-kup, Pol ayo dibii-din aba dabaalip yak kiyap ami sikil diim aba kelip.

³⁴Provins kamok diilim ayo sukon tik-tiiba-kup, Pol ami dik-daala ko: Kabi dok kanolin Provins kayaak i? akale, Pol ayo bokola-lomda: Nali Provins Silisia tunum o, akale

³⁵weng san bokola ko: Provins Silisia kayaak imi tiin molin kulaa nalta kemin ale, tunum telum o, kem-solip iyo tilipla, kapni weng ayo weng sandila, tam-bak-molon o, kalale, soldiya ma imi bokoya-lomda: Kibi yak Pol ayo dibii tam gavman numi am dukum sawaalak Herot ata desa, kaptam daa-lomdip tiin molin o, yaka ko.