Apostolo 27:5-33

⁵Ebu Kilikia zu Pamufulia habaꞌa davaraḡa bohaꞌano ruhau onamo, Lukia habaꞌano Mura neḡano hebetiro.

⁶Ebu eꞌe habaꞌano uti azaḡa ibito ziniꞌeteꞌe vazeḡaniꞌa Itali onamihi raꞌeteꞌe ḡasiḡa horoniro. Aꞌe Alesandria neḡa ḡasiḡa. Eme eꞌe ḡasiḡano tutufe tiriro.

⁷Ebu mada ḡehaḡa teꞌoteꞌauꞌenaꞌa negane ruhau onamo, Kenido davaraḡa bohaꞌano feuriro. Zavaraꞌe ꞌize haohaofe onainu ꞌahine, eꞌe moneo ruhau onamoga mene idararo. Eꞌanoꞌo eme Salomone musuga naenaeḡa onamadu, Kerete ꞌumuḡano ꞌafe ruhau onamiro.

⁸Ebu teꞌoteꞌauꞌenaꞌa zavara haone, eꞌe ꞌumuḡa genaḡa uni ruhau onamo, “Toḡatoḡa Manoḡa” rae huneꞌeteꞌe toḡatoḡaḡano hebetiro. Aꞌe Lasea neḡa uhiḡano.

⁹ꞌOugeꞌenaꞌa, mada ḡehaḡa foure hauḡiro ꞌahine, ḡasio ruhau onamogaꞌe riḡa zu ḡiḡaroḡa. Mazaḡa Iuda azaḡaniꞌa iḡaiḡa ogomu moneo zaḡozaḡiꞌuma madaḡa vitaro. Eꞌe hugaꞌe zavara madaḡaniꞌa feuriro, ebu ruhaꞌuma batoḡa ꞌai hauḡiro. Eꞌanoꞌo Pauloꞌa iraduguziro,

¹⁰raenaꞌa, “Zae niduꞌa! Eḡeꞌa ḡianeꞌetene, eme ruhau onamine sauꞌa hidiꞌuma, ḡasi zu tohefe niduꞌaꞌe davarao hunuhuniꞌuma, ebu ḡabonefe zuni sautaꞌuma.”

¹¹Rehano uti azaḡa ibito ziniꞌeteꞌe vazeḡaꞌe Paulo ḡoere mene mae ḡihinadu, ḡasi miruneꞌeteꞌe vazeḡa zu ḡasi vazeḡa ḡoere daꞌo mae ḡihiniro.

¹²Zeḡeꞌa raꞌetaꞌaꞌe, hebetateꞌe habaꞌaꞌe zavara zu nahune madaḡanoꞌe mene manoḡa. Eꞌanoꞌo vaze niduꞌaꞌe eꞌe habaꞌanonoꞌo ruhau buanadu Foinike toḡatoḡaḡa onamihi reiro. Ebu eꞌe toḡatoḡaḡanobuꞌu zavara zu nahune madaḡa meꞌuma reiro. Foinike toḡatoḡaḡaꞌe Kerete ꞌumuḡano ḡasiꞌa hebeteꞌeteꞌe toḡatoḡaḡa ꞌahoga, madaꞌa zubureꞌeteꞌe mone zamainiꞌohe.

¹³Ebu zavara ꞌai kauri moneonoꞌo tahitahe onainuteꞌea, ze ꞌane mada manoḡaniꞌa onaeha reiro. Eꞌanoꞌo ḡasi hanigaḡa hutube zounadu, Kerete ꞌumuḡa genaḡa daꞌo uni ruhau onamiro.

¹⁴Mene faḡa onamiroteꞌea, zavara boro bagaḡa ꞌai ꞌumu raganonoꞌo gudau ovairo. Aꞌe niḡa “Iurakulon” rae huneꞌeteꞌe zavaraḡa boro.

¹⁵Ebu ḡasio ragatiꞌ aradu, zavara roḡoroḡe onamoga mene idaḡa ꞌahine, zavara daꞌo magananiro.

¹⁶Ebu Kauda ꞌumuḡa komeꞌa genaḡa ꞌafe diuḡirotuꞌu, ḡasi komeꞌa ḡaruna ahasinuteꞌe riḡa hutube zouniro.

¹⁷Ebu ohoze ohozeꞌa ḡasi ahase zounirotene, mini hina ḡasi boroo tatuhe ogoru tiro. Ebu hena nougine gasiꞌa ruhau onamadu, Afrika habaꞌa hetaꞌaḡano, niḡaꞌe Surutis-o rameruꞌutiꞌuma rae riharo. Eꞌanoꞌo ḡasi faraiḡa zuni hutube bunadu zavara maganani ruhau oname tauḡiro.

¹⁸Rehano zavaraꞌe ꞌize ufeta boro. Eꞌanoꞌo irarirotene, ḡasio gaueꞌeteꞌe azaḡaniꞌa ḡasi ufinoga rae, odoheꞌeteꞌe toheḡa davarao mae mae modiro.

¹⁹Ebu bare iraradu, mada uḡiduḡa meirotene, ḡasio odohe gaueꞌeteꞌe toheḡa zuni mae mae modiro.

²⁰Eme mada ḡehaḡa mada zu buzuva mene horoniro, zu zavaraꞌe ufeta hune sautu radiunu. Eꞌanoꞌo emeḡe niduꞌa mene ḡabodiꞌuma rae zamariro.

²¹Ze mada ḡehaḡa oganoga mene idararotene, Pauloꞌa zamazeo iḡune edanadu ziro, raenaꞌa, “Zae niduꞌa! Eḡe ḡoere mae ḡihinadu, Kerete ꞌumuḡanonoꞌo mene ruhau buafone, ꞌahige aduga mene hidifo, zu toheze mene mae mae modifo.

²²Rehano e izidi ꞌada ziꞌeteꞌe. Inaroꞌi! Mazaḡa vazeni ꞌahoga mene dauḡiꞌuma, u hube ḡasiꞌa daꞌo sautaꞌuma.

²³Zuhiꞌa Boro, eḡeꞌa kurano hauꞌeteꞌe zu tuḡureḡa haḡaeꞌeteꞌe Badiꞌaḡa, ani tuḡure vigaꞌa ohoḡore ohere eḡe uhiḡano edanadu

²⁴ḡoreheha, raenaꞌa, 'Paulo! Ago rihanoꞌi! Ḡaꞌe Roma zuhiꞌaḡa zamao ꞌize edaꞌuma. Zu Badiꞌa manoḡaꞌe ḡae teite uꞌano, ḡae teite idaḡa ruhauꞌeteꞌe azaḡa niduꞌaꞌe Badiꞌaꞌa ḡaboziꞌuma.'

²⁵Eꞌanoꞌo zae niduꞌa, inaroꞌi! E, Badiꞌa tuḡure vigaꞌa ehateꞌe ḡoeꞌa niduꞌa hudaꞌuma rae, ani mazao fieꞌohe.

²⁶Rehano emeꞌe zavaraꞌa hudi onamadu ꞌumu ꞌahoga hetaꞌaḡano ḡasiꞌa ehoriꞌuma.”

²⁷Ohere gaubanana zu ḡazaḡa fare (14) meiroteꞌea zuni, Adaria Davaraḡano zavaraꞌa ꞌize hudi vaevaefinu. Ebu eꞌe oheꞌa nemanemaḡano ḡasio gaueꞌeteꞌe azaḡaniꞌe gaba ruhau haniteꞌeteꞌe ederiro.

²⁸Eꞌanoꞌo ze davara hoeꞌa idanirotene, mita ḡae ḡazaḡa gaubanana (40) heuḡa. Ebu tahiḡa guhianadu bare idanirotene, mita ḡae uḡidu gaubanana (30) daꞌo.

²⁹ꞌOugadu ze ḡiḡaroze ruziro, mazaḡa hena ḡasiꞌa vatava rana rameruꞌutiꞌuma reiro. Eꞌanoꞌo ze ḡasi hanigaḡa ḡazaḡa (4) ḡasi ariḡa ḡuzuonoꞌo mae davarao feuniro, ebu ḡaiḡai iraroga veize guhiu radiro.

³⁰Eꞌe zamaḡano ḡasio gaueꞌeteꞌe azaḡaꞌe feranoga radu, soꞌe ḡasi hanigaḡa ovoe buneꞌohe rae, ḡasi kobeꞌa fuiꞌadu zazoꞌanonoꞌo ovoe buniro.

³¹Rehano Pauloꞌa uti azaḡa ibito ziniꞌeteꞌe vazeḡa tahiꞌaḡeta ziro, raenaꞌa, “Ḡasio gaueꞌeteꞌe azaḡaniꞌa ḡasi ꞌadaonoꞌo vaḡinine, zaꞌe mene ḡabodiꞌuma.”

³²Eꞌanoꞌo uti azaḡaniꞌa ḡasi kobeꞌa ovoe dabanateꞌe miniḡa ꞌai tene reꞌadu, ruhune modiro.

³³Ebu irara ꞌai hanitirotene, Pauloꞌa zeḡe niduꞌa ogomu anoga rae umiziro, raenaꞌa, “Za mada gaubanana zu ḡazaḡa fare (14), zamaze aduduꞌenaꞌa guhiu onaeha. Ebu ogomuni ꞌahoga zu mene aneha.