Acts 27:5-33

⁵Ba boga tara yaraga kai garubonei ku Cilicia kupurina, ba Pamphylia kupurina wata ba ku Myra meyaginai ka riu, kona wai Lycia kupurina kamonai.

⁶Namai Julius waka i panani i nenae ku Italy wai i uwana geyikai.

⁷Ba kao pesarisi kega ka nae yagiyagina, ba kai baga saki, yepo ka riu ku Cnidus. Saba sibe i tobeyebeyikai wai, ka kuka kai garubona ku Crete neyara wakunai wata ka nae, ba Salmone ka tupasairei.

⁸Tore baranai kai baga ka botu ku (kupura kana waba) Moyu Gairena, Lasea meyagina gwabinai.

⁹Mara i veoroma saki namai sibe goyona kairavina kai baga ba enagai ama bowagawagana wai aba naganagarina, ba nuwatoai wata ka veravera. Kairavina karaku wai bisiya Kaona ikakaba. Paul i kaobinonorisi,

¹⁰“Pipiya, a kinakinani wai ata wagawagana wai, ina piropiro saki ba goyo kaikapona sakina ina tupuwa waka kurina, ba sawara ba yebo kota kurita wai nina tana kai mana.”

¹¹Saba taupauma ana abiabiyisi asi bada, Paul ana sisiya ita nonori wai saba, waka aba yabiyabi biyina, ba waka badana ana sisiya i nonori.

¹²Ba bodu maranai wai kega moyu gairena ba namai kata mana, wai koroto kaikapona asi waina kata vera damana ku Phoenix ba namai kata koba. Kona wai Crete biyisi asi moyu gairena, okowa sibena ba kariwabo sibena matasi.

¹³Ba kariwabo i dagui i tosisini maranai si nosi kata rubana si wosei wai, asi sopo si taina geyei ba, Crete torena baranai wata si kuka si nae.

¹⁴Kega rabarabana ba sibe kaikapo sakina yabarata neyarai i botu.

¹⁵Kata waka i ravi wai kega rubarubana sibe kata gebeyei, wai ka boterei i kasi nunurikai.

¹⁶Neyara yogiyogina kana waba Cauda, wakunai wata ka nae, ba kai baga saki kata, bi tarabonabona wakana yogiyogina kata taina geyei.

¹⁷Ba saibisaibirisi si taina geyei ba, waka kaikapona dobona uramai si kausi, si tombibiri ba si kau kikisi, kairavina si nagara ku Syritis maratete siti garu geyisi wai sopo si garu kirei ba nuwatoai i kasi nunurikai.

¹⁸Ba mara i tom wai sibena i vera tupetupena wai waka enaga ba sibe i torikarikai wai waka sabisabirisi sawara si garu kikirana.

¹⁹Ba kao bitonuinai, waka bagibagi sawarisi mutusi si garu kikirana.

²⁰Kao pesarisi kamonai, kao ba gwamegwame kega ka kinana, ba sibe kaikapona i veravera tupetupena wai, ama nota si peku kata kega kata yawasa.

²¹Ba kega ka kam yepo kao biyamo si kakaba murinai, Paul basusi yai i msiri ba i wona, “Pipiya, au sisiya kota nonori ba kega Crete, tati sumarei wai niko goyona kega tata panani, ba sawara kega tati siwasiwana.

²²Ba a kaobitoraimi kata koi maragata! Kega kesana kotoi ana yawasa ini siwani, saba waka wata ina rukwauruba.

²³Yauku niko God karinai ba a bosaibisaibirei wai, pomai ana aneya i msi ratu kuriku,

²⁴ba i wona, ‘Kega kuna nagara Paul, kom Caesar naonai kuni msiri, ba God ana binuwanuwana kurim wai, pipiya yabata ko bowagawaga wai ereonowasi sina yawasa.’

²⁵Kona kairavina koi maragata! Basuna God a bigeruwei ba i woniku wai nanakasike ina tupuwa.

²⁶Saba neyara kesanai ina kasi geyita.”

²⁷Taparoro ruwamo si kakaba pomnai, Mediterranean Enaginai karaku wata yoyo si tanikai pom basunai wai, waka pipiyisi damisi si yauni kata, matapa ku tepa ka veraverakasibau.

²⁸Kona kairavina rubana uramina si garu kirei ba si panani kata enaga raguna si yauni wai 120 meter rubana ba mara yogina murinai si yauni wai 90 meter rubana.

²⁹Si nagara kata waka ku akima iti kam gaeni, wai sopo asi bata waka murinai si garu kikirana, ba asi waina mara ita tom yagina wai kairavina si rupari.

³⁰Waka pipiyisi asi waina sita vera siti sumarisi, bitarabonabona wakana yogiyogina si tere kirei ku enaga, ba si wose bage asi waina sopo waka naonai siti garu kikirana.

³¹Saba Paul, abiya badana ba abiabiyisi kurisi i wona, “Abisiri yai waka pipiyisi kega sina mana wai kega tana yawasa.”

³²Damanina abiabiyisi urama si tara yaragi ba bitarabonabona wakana yogiyogina si karuwei.

³³Mara i tomtom wai, Paul i baba tupetupena kata sita kam, i wona, “Taparoro ruwamo ko binuwapoya saki kairavina kega ko kam.