Atos 27:5-33

⁵Morotoino tuna konõto takuohse yna. Xirixia ehpikuroko toytose yna, Pãpiria ehpikuroko roropa Mira pona, Rixiapõ pona.

⁶Moroto sajẽtu maro imepỹ wapu aka ynanotyriase, Arexãtyria poe Itaria pona ytokety aka.

⁷Moro ae axĩ pyra ynanytoase Synitu pona tyryrykane popyra exiryke. Saumona kuroko ynanytoase Kereta zomye.

⁸Morarame ynanytoase wapu ae ehpikuroko, kuremỹme samo, pata pona, kure otyryhkatoh pona. Moro Rasea maro atameke pyra.

⁹Moroto okyna yna ahtao ytotoh pyra toehse. Naeroro Pauru ynara tykase toto a,

¹⁰—Ytotoh pyra nase. Kuytorykohtao seromaroro, wapu nerỹko mana. Itamurume mõkomo nerỹko. Ahno roropa orihnõko otarãme, tykase Pauru repe.

¹¹Yrome mokyro sajẽtu, wapu esẽ tõ omipona nexiase, Pauru omipona pyra.

¹²Otyryhkatoh moroto popyra exiryke toytorykõ se toh kynexine Penixi pona, moroto toehtohkõme konopo ae, kure moroto exiryke. Tyryry karahko Penixi po, Kereta ahmõta po.

¹³Naeroro tyryry tykase ropa ahtao, —Ehmaropa, tykase toto. Etypohkatoh tanỹse ropa toto a wapu ytotohme ahmõta Kereta ehpikuroko.

¹⁴Yrome okynã pyra tyryrykane tyjamihtase. Tyryrykane esety Euroakirão.

¹⁵Moro a wapu tarose axiny. —Ah kuakuarotou, ynanase.

¹⁶Ahmõta pitiko kuroko yna ytoryhtao tyryry karahko nexiase. Naeroro ynanerokuase itamurume kanawa anymyry poko wapu aka.

¹⁷Kanawa tanỹkehse ahtao wapu ynanuahmykyase ehmopyra aehtohme. Yna aroryke tyryrykane a Ripia ehpikoxi isawã zuno toehse yna. Morara exiryke wera touse yna a, tywerake pyra rokẽ ytotohme tyryrykane po.

¹⁸Yrokokoro pohkane a anyanymyryhtao mõkomo ynanypapyase nakuaka yna oserepyryke, wapu tẽme hkopyra ehtohme.

¹⁹Yrokokoro wapu mõkomory nymyry ynanypapyase.

²⁰Tuhke xixi onenepyra ynanexiase, xirikuato onenepyra roropa, konopo itamurume exiryke tyryrykane maro, —Orihnõko sytatose, ynanase. Ynanoserepyase.

²¹Tuhke otuhpyra ynanẽmepyase. Naeroro Pauru ynara nase yna a, —Jepe tomo, jomipona awahtao xine Kereta po ro sehtory, mõkomo onypahpyra exiry, wapu kure ro roropa exiry.

²²Yrome seromaroro kuetatoko. Emynyhmara ehtoko. Orihpyra matose. Wapu rokẽ nerỹko mana.

²³Morara ãko ase Ritonõpo nenyokyhpyry tooehse exiryke koko ya oturuse. Jesẽme mana, ipoetoryme ase.

²⁴Ynara nykã ya, “Pauru, torẽtyke pyra exiko. Seza a ytõko mase, Roma tuisary a. Oewomãko mã Ritonõpo. Mokaro roropa ewomãko mana opokoino,” nykã inenyokyhpyry ya josenety.

²⁵Naeroro sekese ehtoko ropa. Ritonõpo enetupuhnõko ase. Ajohpe pyra mana. Kuewomatorỹko mã inenyokyhpyry nekarohpyryae ro.

²⁶Yrome ahmõta pona kuarotorỹko mã tyryrykane, tykase Pauru yna a.

²⁷Morarame 14me tynyhse ahtao tyryrykane jamihme ro nexiase. Xiaxiake wapu tarotarose, Metiteraneu tuna ena. Mame onoa wapu poko erohketõ ynara nase, —Otarãme nono moe pyra mana, nase toto.

²⁸Tuna tukuhse toto a, zueme aexiry waro toehtohkõme. Zueme ro tukuhse eya xine. Moino akoxi pitiko tukuhse ropa toto a, zueme hkopyra.

²⁹Mame topu a wapu etapary zuno toexirykõke 4me etypohkatoh tomapose toto a, wapu ãtykyry wino. Tõturuse toto Ritonõpo a axĩ aẽmehtoh poko.

³⁰Morarame wapu pokõkõ irumekary se toehse. Kanawae toytorykõ se toh repe. Kanawa tomapose tuna kuaka toto a, etypohkatoh wapu potyry pokona tyritohme sã repe. Yna enekunopyry se rokẽ toh kynexine.

³¹Mame Pauru tõturuse sajẽtu tomo a, soutatu tõ maro, —Wapu rumekaryhtao moxiamo a nerỹko sytatose, tykase ynororo.

³²Morara tykase Pauru exiryke kanawa eary tysahkase soutatu tomo a, kanawa yhtotohme.

³³Aẽmepyryhtao Pauru tõturuse toto a, —Otuhtokose. Pake oemirykõ rohnõko matose, nyhpyra roropa.