Aposol 27:5-33

⁵Silisiane Pamfilia hagerina arugitagita vunazamota, Maira rankumate Lisia provinsifi umani'none.

⁶Anante sondia kva ne'mo'a Aleksandriati ventemo, Itali vunaku nehia vente keteno, anampi tavare antegeta vu'none.

⁷Akoheta rama'a kna ana'ana huta vu'none. Tusi knazampi Sindasia ehanati'none, na'ankure zaho'mo'a tusi himamu reno kana renkaniregeta mago'anena ovuta, Kriti ti amunompi me'nea mopa asogita Salmoni vu'none.

⁸Agatereta tusi amuho huta Lasia kuma tavaonte, Fea Haveni e'none.

⁹Rama'a knamo'a tagateretegeno, hagerimpi vuna kamo'a menina hazenke atie, na'ankure Jiu vahe'mo'za kave'ma a'o hukna agateregeno, hampo'na zaho ko atu knafi efrone, Poli'a antahintahi zamino,

¹⁰anage hu'ne, ama ve'nene zage, nagrama nentahuana, amama vuku'ma nehuna kamofona rama'a hazenkefi ufreta rama'a zanti atregahune, feno'zane ventegeropage, tagranena tasimura atregahune huno zamasmi'ne.

¹¹Hianagi sondia vahete kva ne'mo'a, ventere'ma aze'neria ne' ene, ventemofo nefake ha'a nanekea nentahino, hagi Poli'ma hiankea ontahi'ne.

¹²Na'ankure zahoko'atu knafima ventemo'ma umani kumamo'a knarera osu'ne. Rama'amo'za mago'zmarimpa hu'za, knarekita vugahune hu'naze. Zamagesama antahizana Foniksi uhanatigahune hu'za antahi'naze. Kritima ventemo'ma unemania kumamo'a rugaruga asoparega zge ufre kaziga (notwest sautwest) avugosa hunte'negeno zaho ko atu knafina anante umanigahune hu'naze.

¹³Kanti sauti kazigati agazone zaho emarerige'za, hago knare hiankita amane vugahu'ne nehu'za, timpi umaniku erinetraza zana anka avazuhu ventefi nenteza, Kriti kaziga vu'za mopa tva'onte vu'naze.

¹⁴Hianagi tusi'a not isti'e hu'za nehaza zahokomo avunenenteno Kriti kazigati tusi himamutino e'ne.

¹⁵Zaho komo'a vente'a eme amasagino azeri rava higeno, ventemo'a azeri agatere'zana osigeta tagrati atronkeno zaho komo taretufeno vu'ne.

¹⁶Kautie nehaza ti amu'nompi mopa asogita tagareta nevuta, tusi amuho hunerantegeta tazama husia onensa ventea avazu huno ne-ea ventea erinteanaga atre'none.

¹⁷Osi ventema erianaga atrete'za, nofi eri'za ra ventere azerisigu kitragote'naze. Vene'ne zgamo'za ventemo Sitisi tinkenare ome hae'zankura tusi kore nehu'za zamazeri knama hanige'za ti avozare'ma akohe'za vanagu, kna'age'zama rente'naza nofira eritrete'za atrageno zaho'mo zamatufeno vu'ne.

¹⁸Maseno ko'atige'za mago'a fenona ventefintira eri atre'naze, na'ankure zaho komo'a tusi hampo'natino ahegantugama huno azeri nakari'za hige'za ana hu'naze.

¹⁹Nampa 3knazupa ventemofo eri'za zantamina mago'a asga hu'za mate'vu atre'naze.

²⁰Tagra zagene hanafi'enema mika knafima hanatigeta onkonkeno zahoko'mo'ma knare osigeno'a, knare hugahune huta tagesama antahi'nona zamo'a amane zankna hu'ne.

²¹Za'za kna ne'zana one'za manizageno, Poli'a amu'nozamifi otino anage hu'ne, ama vene'nemotma nagrama huanke amage antetma Krititima atretma omazasina amanahu hazenkene tuzampaza zantamima atraza zana otrasine.

²²Hanki menima tamasmisuana korera osiho, na'ankure amama mani'naza amu'nompintira mago'moka fanane osugahananki ventemoke fanane hugahie.

²³Na'ankure meni keragera nagrama Agri vahe mani'nena erizama'a erinentoa Anumzamofo ankeromo'a navuga eme otino,

²⁴anage hu'ne, Poliga antahio korera osunka amane Sisa avurera ome otio, kagranema ana mika ventefima neaza nagara Anumzamo'a asunku huramanteno tamaza hugahie hu'ne.

²⁵E'inage hu'negu ama vene'nezga korera osiho, na'ankure nagra Anumzamofonku namentinti nehuankino nasami'nea kante fatgo huno taza hugahie.

²⁶Hu'neanagi mago ti amunompi mopare atresunkeno zaho'mo ventea atufeno have ome amiteno rukaha hanie.

²⁷14ni'a kenage'mofo agu'afima zaho'moma tatufeno Adriatiki hageri amu'nompima nevigeno'a, kerage amu'nompina ventefi eri'za vahe'mo'za hago mopare neone hu'za zamagesa antahi'naze.

²⁸Nehu'za nofi tu'mitare knaza eri renente'za, eri hagerimpi re'za kazana, 40ti'a mita fenkagame urami'ne. Osi'a ogantu'a vuza mago'ane ana nofira erire'za kazana, 30ti'a mita timofo zaza a'mo'a urami'nege'za ke'naze.

²⁹Have haegahune hu'za tusi zamagogogu nehu'za, ventema umaniku'ma nehige'za erinetrazaza anka 4'a asgahu netre'za, ko'ma atusigu nunamu hu'naze.

³⁰Anante ventefi eri'za vahe'mo'za ventefinti atre'za fre'naku nehu'za, havige hu'za nofite kna'nentake'za eri netraze nehazage'za osi voti hagerimpi eri atre'naze.

³¹Poli'a sondia vahete kva ne'ene ruga'a sondia vahera zamasamino, Ama'na vene'ne zgama ventefima omani'snazana tamagra frigahaze hu'ne.

³²Hige'za sondia vahe'mo'za ana dinkire'ma kinte'naza nofira traga hutrageno hagerimpi mareno vu'ne.

³³Ko'atumasa huku higeno, Poli'a mika vaheku ne'za neho huno nezmasmino anage hu'ne, 14ni'a kna'mofo agu'afina naza fore hugahieha hutma ne'zama onetma mago'zama osutma e'naze.