Aposel 27:5-33

⁵Ahi ame apou bayau ala bilisiu mirihik ta kon munyak tinan Silisiya, ma Pampiliya, ano ahi asahan Maira udu loboho kon tinan Lisiya.

⁶Ahi are doh badeh, tinan ta atondrok lau ta bahun ili atou ndron ra-ei badu Aleksandriya anya kili Itali. Eme ma iy atehei ahi ala bolo ndron doh ja.

⁷Len sabe kolek ahi alakak amunum le ai, tasah jor ma bayau laba tinan labai soroya ahi. Iri lau badu bolo ndron doh boto-on labai, ma ahi ala asahan mirihik ta kon tinan Nidus. Arile, jor sokei ahi ma ahi winiyan balakak bala doh ja bwe. Eme ma ahi tubuni ahi ja ala are busu Krit. Mirihik ta no-o sabon Salmone, ma ahi au ala bilisiu mara-ei ta busu.

⁸Iri lau badu ndron badeh, boto-on, ma ahi atas Krit le ai. Ma ahi ame asahan kon ari, iri aloh Salan Korohan, bado len ta kon tinan Laseya bwe.

⁹Len solo-an iu ma ahi manyah laleyah are loboho doh, ma len ndrabun tiri Juwis ta abeles iri ta nyamon badeh, ndrano ndra-au. Ma bayau atohou a tinan le gwek, eme ma Pol tiye sahou batanau ili tiri i buku doh,

¹⁰“Aha lau marakon, aha kanuhun, jo ndratanan buku taha au nadah, taha kameh ndruni len ndra-in labai, ma lakou solo-an kameh iu. Iri sanuw hawe ndron kameh iu. Taha marakon kameh amak ale.”

¹¹Arile, tinan ta atondrok lau ta bahun banuhun sahou ta Pol bwai. Iy in hamon le ta budon ta ndramak ta atondrok ndron, ma tama ndron doh amwenen.

¹²Sala kon nane doh ari korohan mwasin ta ndron aton ta jor tinan ere aliy bwe. Eme ma iri lau solo-an are bolo ndron nane doh, atehei sahou tiri i le randra ta ahi ka-au le ai. Buku ahi winiyan, asahan Piniks, ma kado aliy katondrok jor tinan nane doh kamondrei. Kon Piniks doh badeh, salan ari le udu bilisiu ili kum, ma loboho an i andri ta busu Krit.

¹³Nadu yayah sese le atohou eme loboho kum, iy batohou boto-on handru bwe. Eme ma iri anya, ahi winiyan alakak ala bolo salan ari nane iri asehek ta aliy. Eme ma iri aruwi hanai eme loken, ma ahi alakak lawe-e le bada kon badu Krit au ai.

¹⁴Arile, se nawin bwe, jor tolau laba tinan atohou udu busu eme tahi.

¹⁵Jor eme atok ta ndron badeh, ma ndron mara-ei totoreh, ma winiyan batas bamwenen ja bwe. Oro lau badu ndron anya katobolowe, tobolowe labwe, eme ma oro tubuni ndron in le bwele-e bayau, ma jor atuw ahi le ai.

¹⁶Ahi alakak au ala koroha nadu busu ari, iri aloh Kauda. Oro lau badu bolo ndron badeh, anyolom bwalu bameles bwe, oro ame aluwiy ma boto-on eme bwele-e ndron tinan.

¹⁷Oro aruwiy eme bwele-e ndron tinan, ma oro tabuwi ndron mara-ei ihis na le ndriliki. Oro anoh, kora-on oro katas kala kahis ta kababi udu loboho kiri Libiya. Eme oro lukumwi balei mari eme andri, boto-on ta jor ma bayau le badeh, teheya ndron ma oro.

¹⁸Na len ari ja badeh, jor ma bayau i tinan le gwek. Eme ma iri lau badu ndron badeh, akeh sanuw rayah iu i ndras.

¹⁹Atoha, ano atoha ja badeh, iri lau badu bolo ndron akahei ndriliki ma liwiliu ta balei, mara-ei i bolo ndras.

²⁰Len sabe buruwen badeh, ahi banyolom an ma ndrau bwai. Jor atohou boto-on ma bwidi bayau a tinan mara-ei, ma bwidi ahi kameh ta amak le ai.

²¹Len sabe buruwen badeh, ahi baimon se nyamon bwai. Eme Pol suri iy ales udu bwena tiri lau badu ndron, ma asehek anya, “Buku taha nane ado ndra Krit, aha kanuhun bohok badeh, jor ma bayau dah winiyan basahan tataha bwe, ma ado winiyan bakeh iri sanuw bala ndras bwe.

²²Arile, nadah aha sabwerei, ndrine aha mara-ei kasekesek, tasah taha mara-ei winiyan bamak bwe; ndron le kameh atahan ma atuh iu.

²³Jo badeh, lau ta Kindrei ma jo badeh, lohowan tan; len marakon jo atehei bwili ndru-uk i andri i tan. Na ben nane iy suni angelo tan ari eme ales ere mirihik tek,

²⁴ma iy tiye tek i buku doh, ‘Pol, ou sanoh! Ou kameh ala ales are mada Sisa. Ou anuhun, Kindrei ndranuhun sahou tam, ma iri lau marakon are bolo ndron hawem kede-eh kameh winiyan bamak bwe.’

²⁵Ya, aha marakon sanoh! Jo atehei budon tek mara-ei in ta Kindrei, iy kameh winiyan bwidi lakou marakon i buku le iy asehek tek na ben.

²⁶Arile, taha kameh alakak ala amar ado bwele-e busu rayah.”

²⁷Winiya ben ronoh hahuw jor teheya ahi ma ndron au ala andri bolo ndras tinan laleyah, iri aloh Medetereniyen. I buku ben alih badeh, oro lau badu ndron atona, buku ahi ndrame mirihik ta kon.

²⁸Eme ma oro akahei malou i gwa ta tumundroh gwa, buku gwa lawe-en, o, bwe. Oro aruwiy eme loken tomondrohei lawe ta gwa i buku nyahan lunoh (20). Ahi atas ala sese, ano oro tumundroh gwa ja. Oro tomondrohei lawe ta gwa ja doh asahan nyahan ronoh limeh (15).

²⁹Ma bwidi oro anoh labai, kora-on ndron tahi katas kili bwele-e bek, eme ma oro akahei hanai ma hahuw badu hamon i gwa ta ateu ndron kere rasi. Iri ame asolom ta kon kaleu suwi.

³⁰Oro lau ta ndron badeh, none ta atobwak, oro tolowei bwalu bwisik ili gwa, ta wendreya ta ala apeu rayah hanai ja ta no-o ndron.

³¹Arile, Pol asehek ili tiri tinan ta tondrok lau ta bahun ma iri lau ta bahun i buku doh, “Buku oro lau doh bado ndron bwe, aha kameh winiyan bado bwe.”

³²Oro lau ta bahun ame sani iri ndriliki ta ateu nadu bwalu nane doh, ma ateheh iu ili bolo ndras laleyah.

³³Kon ndraleu, an anya kasahan keme loken ai, Pol eme asehek sahou ili ta lau marakon nane are bolo ndron badeh, kaimon nyamon. Iy tiye i buku doh, “Idah, buku wik la-uh amwenen ai, aha tikisiy tinan labai, ma aha baimon se nyamon bwe.