Apostolo 15:19-36

¹⁹Eꞌanoꞌo eḡeꞌa zamareꞌetene, haḡai adugaꞌe, Iuda mene azaḡa boꞌaḡanonoꞌo Badiꞌa mone ḡihureꞌeteꞌe azaḡa, mene ziniꞌuma,

²⁰rehano zeḡe veize soꞌao mirihadu, ꞌahige ḡoere tuḡuriꞌuma. Ze, ḡuriro badiꞌaḡa mazao tiꞌeteꞌe ogomuḡaꞌe mene aꞌuma, ebu vaze ꞌahogaꞌe ane teite mene hahurateꞌe vazeḡa teite ibi mene veꞌoniꞌuma, ebu ꞌunuḡano harine runateꞌe maniḡa zu ruꞌe mene aꞌuma.

²¹Mazaḡa Mose goro ḡoeꞌaꞌe amahionoꞌo neḡaneḡano Iuda azaḡa kuru neḡano Bana Madaḡa Madaḡano meꞌode harame onaido.”

²²Eꞌanoꞌo apostolo azaḡa zu ekalesia vaze boroboroꞌa ekalesia azaḡa niduꞌa teite ḡoꞌanadu, zeḡe vaze nu meꞌuma reiro, Paulo zu Banabasi teite Antioka neḡano tuḡuzoga veize. Ze vaze ꞌahoga, niḡa Iuda, niḡa ꞌahogaꞌe Barasaba, zu vaze ꞌahoga, niḡa Silasi meiro. Anianineꞌe Zuhiꞌa Boro mone azaḡa ibito ziniꞌeteꞌe azaḡa.

²³Ze soꞌao ꞌahige mirihadu tuḡuriro, raenaꞌa, “Eme, zae negoze, apostolo azaḡa, ekalesia vaze boroboro, zu ekalesia azaḡaniꞌa, Iuda mene azaḡa Iesu mazao fieꞌeteꞌe, Antioka neḡano zu Suria zu Kilikia habaꞌano radiuꞌeteꞌe mazao matuꞌu ḡoeꞌa tuḡureꞌohe.

²⁴Eme hari ꞌahoga igiro. Vaze nuꞌa emeḡe mazaonoꞌo amadu, ḡoere nunu hina zamaze mae ḡunuḡununiro, ebu zamazeꞌa adudaroteꞌe igiro. Rehano zeꞌe emeḡeꞌa mene tuḡuziro.

²⁵Eꞌanoꞌo emeḡe niduꞌa ḡoꞌane idanadu, vaze nu maha, ebu negofe manoḡa Banabasi zu Paulo teite zae vaḡe tuḡuziꞌuma raꞌohe.

²⁶Banabasi zu Pauloꞌe emeḡe Zuhiꞌa Boro Iesu Keriso veize zeḡe ḡabone ahetiroteꞌe azaḡa.

²⁷Eꞌanoꞌo eme Iuda zu Silasi tuḡuzeꞌohe, emeḡeꞌa soꞌao mirihateꞌe ḡoeꞌa, zeḡeꞌa hebe hina zu rae furenoga veize.

²⁸Vine Zaḡoḡaniꞌa ibitofeadu, emeḡeꞌa ḡoꞌanateꞌe ḡoeꞌaꞌe ꞌahiꞌeꞌe. Emeꞌe goro haḡaiḡa nunu haḡaoꞌi radu, aduga mene ziniꞌuma. Rehano zaeꞌa haḡaiꞌuma haḡaiḡaꞌe ꞌahi daꞌo.

²⁹Ḡuriro badiꞌaḡa veize teateꞌe maniḡa mene aꞌuma, ebu ru zu ꞌunuḡano harine runateꞌe maniḡa mene aꞌuma, ebu vaze ꞌahogaꞌe ane teite mene hahurateꞌe vazeḡa teite ibi mene veꞌoniꞌuma. Za haḡai ꞌuguḡa mene haḡaine, zaꞌe haḡaizeꞌa manohudaꞌuma. Eꞌe daꞌo. Zae niduꞌa bazoꞌi!”

³⁰Eꞌanoꞌo zeḡe ḡazaḡaꞌe tuḡuzadu, Antioka neḡa onamiro, ebu Antioka ekalesia azaḡa niduꞌa nuꞌozadu, soꞌa ziniro.

³¹Ebu zeḡeꞌa meꞌodirotene, ze iraduguziꞌeteꞌe ḡoeꞌa egadu matuꞌiro.

³²Iuda ani Silasineꞌe peroveta azaḡa. Ze Zuhiꞌa Boro mone azaḡa mazao iradugu ḡoeꞌa borofe haramadu, inara ziniro.

³³Ze mada nu eꞌea radiroteꞌe enogano, Antioka neḡano Zuhiꞌa Boro mone azaḡaꞌe zama roḡeḡa veize zeḡe rana kuranadu bare tuḡuziro. Ebu ze Ierusalema neḡa bare onamiro, zeḡe tuḡuziroteꞌe azaḡa vaḡe.

³⁴U Silasiꞌe mene bariꞌuma radu eꞌea radiro.

³⁵Paulo zu Banabasiꞌe Antioka neḡano radadu, vaze ḡehaḡa teite Zuhiꞌa Boro ḡoere ihoziro, zu haramo ziniro.

³⁶Mada nu enogano, Pauloꞌa Banabasi niro, raenaꞌa, “Aro, emeḡeꞌa ibite Zuhiꞌa Boro ḡoere haramiroteꞌe neḡaneḡa niduꞌa bare onamihi, ebu eꞌea Zuhiꞌa Boro mone azaḡaniꞌa nouge radiuꞌeteꞌe ḡiazihi.”