Aposol nup meme 15:19-36

¹⁹“Miaŋgöra Jeims nöŋön keu mi kewöta mötmötnan kewö möta jizal: Kian kantri ambazip uruŋini Anutugöreŋ meleŋjei, neŋön mönö lömböt könjöŋ ketaŋi yeŋgö qakŋine alinga qahö dop kölma.

²⁰Mewö qahöpmö, yeŋgöra kimbi kewö ohoinga dop kölma: Yeŋön sömbup busuŋi bem lopioŋgö naluk buŋa qeba könaŋine algetka ösumŋinan walöŋnöhi, mi kude neme. Sero yoŋgorö kude akŋe. Sömbup jölŋi qeqeŋaŋgö busuŋi aka sep mi kude neme. Yuai 4 mi mosötmegöra jim köhöibinak.

²¹Mosesgö Köna keu mi mönö möpŋaŋgö möpŋeyök miri dop jim asariba kota maljin. Mi Sabat kendon dop köuluk mirinine oyoŋda mörakzin. Miaŋgöra keu 4 mi ölöp qahö mosötpin.” Mewö.

²²Jeimsnöŋ mewö jiiga aposol aka jitŋememe yeŋön könagesö pakpak yembuk keu mi mötket dop kölök. Mötket dop köliga sutŋineyök azi tosatŋi möwölöhöm eŋgiba Pol Barnabas yetpuk mohotŋe Antiokia sitinöŋ melaim eŋgibingöra jiget. Mewö jiba azi qetŋi Judas qetŋi alaŋi Barsabas aka Sailas möwölöhöm etkiget. Azi yahöt mi urumeleŋ kambugö jitŋememe azia ahot.

²³Azi mi melaim etkibin jiba kimbi kun kewö ohoba böröŋire alget, “Mötnaripkö kian alaurupnini, Antiokia siti aka Siria aka Silisia gölmenöŋ maljei, neŋön eŋgö jölöŋini jizin. Aposol neŋön mötnarip könagesögö jitŋememe yembuk eŋgö urumeleŋ alaurupŋina akzin. Mewö embuk keu eraum mötpingöra kimbi al eŋgizin.

²⁴Nanine ambazip tosatŋi qahö jim kutum eŋgiinga nanŋinök neŋgömosöta eŋgöreŋ kaba uruŋini kuŋguba keu murutŋi kekelolo eŋgigetka uru mötmötŋini siksauk aiga mörin.

²⁵Miaŋgöra nini körekŋanök totoko ala urumohot ahin dop kölök. Dop köliga azi yahöt meköba melaim etkiinga wölböt alayahöt Barnabas Pol yetpuk eŋgöreŋ kame.

²⁶Barnabas Pol yetkön nanine Kembu Jisös Kraistkö qetŋaŋgöra aka malmalŋiri köleŋnohotka tosatŋan etkuget kömumbitkö ahot.

²⁷Nini Judas Sailas melaim etkiinga kaba keu miyök toroqeba jitnöŋ jiyohotka mötme.

²⁸Uŋa Töröŋi aka neŋön keu kewögöra urumohot ahinga dop kölja: Eŋgö qakŋine lömböt könjöŋ qahö toroqeba albin. Keu bohonŋi 4 miyök wuataŋgöme. Mi oŋgitketka julbinbuk.

²⁹Keu 4 mi kewö: Sömbup busuŋi bem lopioŋgö naluk buŋa qeba könaŋine algetka ösumŋinan walöŋnöhi, mi kude neme. Mewöyök sep me sömbup jölŋi qeqeŋaŋgö busuŋi mi kude neme. Sero yoŋgorö kude akŋe. Yuai 4 mi mosöta andö qegetka urumohot ahinga Anutunöŋ kötuetköm eŋgiiga ölöwaka malme. Mönö uru bönjöŋ malme.” Mewö.

³⁰Kimbi mewö ohoba melaim eŋgigetka anget. Köna anda geba Antiokia sitinöŋ aŋgotket. Aŋgota urumeleŋ könagesö köl öröm eŋgigetka tokoget. Tokogetka kimbi mi eŋgigetka oyoŋget.

³¹Mi oyoŋgetka miaŋgöra amqeba urukölalep möta söŋgaiget.

³²Judas Sailas yetkön nanŋirak kezapqetok azia mala goro keu gwötpuk eŋgiba urugö naŋgönaŋgö keu jiba mem köhöim eŋgiyohot.

³³Mem köhöim eŋgiba nalö tosatŋi miaŋgöreŋ toroqeba malohot. Malohot teköiga urumeleŋ alaurup yeŋön “Luaibuk anmahot,” jiba melaim etkiget. Jerusalem malohotka melaim etkigeri, Judasnöŋ mönö yeŋgöreŋ liliŋgöyök.

³⁴(-)

³⁵Pol aka Barnabas yetkön toroqeba Antiokia sitinöŋ mala ambazip tosatŋi gwötpuk yembuk Kembugöreŋ Buŋa keu kusum eŋgiba uruŋini kuŋgum eŋgiba malget. Mewö.

³⁶Mewö malgetmö, nalö tosatŋi teköiga Polnöŋ Barnabasgöra kewö jiyök, “Netkön taon miri pakpak liliköba Kembugöreŋ Buŋa keu jim asariba maliri, mönö miaŋgöreŋ liliŋgöba urumeleŋ alaurupniran denöwö maljei, mi ölöp anda eka mötpit.”