Aposotolo Adi Hewau 15:19-36

¹⁹Na egu riba hedudurai ede teina ea ene, Isi Murimuri tataodi headi se sinibui Eaubada arinai tabu ta hemodedi.

²⁰Uriuri enadi mo ta uridi, ta ene edi oitau laulaudi tabu se abiwataiuioidi, tabu se itaitadio, eo ginauri gadodi se lamosidi abo se otaotaedi, eo osina hinage tabu se abilau.

²¹Mumuga eai i laoma wau‐ta eanua gamagamagari eai Mose se guguiaei: sabati gamagamagari sunago alodi eai ena uriuri wa se hasihasiridi.”

²²Aposotolo, eo babada, eo ekalesia gamagamagari hinage si ene i lolo tatao headi se riba hinehineridi se hetamaridi Paulo maena Banaba maediyao abo se lau Anetioka; isi esadi ede, Iuda esana esau ede Basaba, eo Sila hinage, isi ekalesia edi tatao adidiri.

²³Edi uriuri abo se laei, si uri ina doha, “Omi ema tataoyao e, Murimuri‐tataomiu, Anetioka eo Suria eo Kilikia taumiamia, ai aposotolo eo babada eo emi tataoyao ina, ai aitoiemiu.

²⁴Ai ataieyao tatao headi se laugabaemai se laowa me, edi riba aridi eai se hemodemiu, nuamiu se heponoponodi, si ene omi taba au peritome eo laugagaeo au sogohi: riba wa ai nige ai heyaridi wa.

²⁵Aie oigogo esega eo nuamai esega, ai ene i lolo tatao headi ai hineridi abo ai hetamaridiwa Banaba eo Paulo maedi se laowa, taudi labui ta ai gadosisiedi,

²⁶isi edi mauri se nuagabaeyao eda Guiau Iesu Keriso debana eai.

²⁷Arinai Iuda eo Sila ai hetamaridiwa, teina riba ta awadi eai hinage abo se heribamiu.

²⁸Paana ede Earua Tabuna maemai ai ene tabu ami oibahe ai heporohenapaidi mo;

²⁹teina mo au nuatukomakomani, sarai se heaitalasamdi edi oitau aridi eai au dabu, osina hinage eo ginauri gadodi se lamosidi tabu au aidi, eo tabu au itaitadio. Meta ginauridi au otaotaedi i lolo ede. Aioni.”

³⁰Se hetamaridi se lau abo se lage Anetioka eai moutuana se heoigogoidi abo uriuri wa se mosei aridi eai.

³¹Isi se hasirinonohai, nuadi abo se taru, se kode ariri.

³²Iuda eo Sila, isi hinage peroveta, riba gamagamagari aridi eai ehadiyao se guguiaidi, eo se headidiridi hinage.

³³Se miamia, abotai abo edi tataoyao se hetmaridi se uio aposotolo aridi eai ma nuawoiwoinadi.

³⁴Taiede Sila ena nuatu i ene i lolo nei eai i miamia begana.

³⁵Paulo eo Banaba se miamia Anetioka eai, Guiau ena riba se laulauheataei, eo se laulauguguiaei, eo tatao gamagaridi maediyao hinage.

³⁶Asubena headi se lauo Paulo abo i ribalau Banaba arinai, i ene, “Hage ta uio eda tataoyao ta itadi eanua gamagamagari eai Guiau ena riba ta guguiaidi wa, ta itadi edohadi.”