ДЗЕІ 15:19-36

¹⁹Таму я лічу, што ня сьлед заважаць тым язычнікам, якія да Бога зьвяртаюцца,

²⁰а напісаць ім, каб яны ўстрымаліся ад апаганенага ідаламі, ад распусты, ад душанага і крыві, і каб не рабілі іншым таго, чаго ня зычаць сабе:

²¹бо закон Майсееў старажытных родаў па ўсіх гарадах мае прапаведнікаў ягоных і чытаецца ў сынагогах кожнае суботы.

²²Тады апосталы і прасьвітары з усёю царквою разважылі, выбраўшы спаміж сябе мужоў, паслаць іх у Антыахію з Паўлам і Варнавам, менавіта: Юду, якога празвалі Варсавам, і Сілу, мужоў начальных сярод братоў,

²³напісаўшы і ўручыўшы ім наступнае: апосталы і прасьвітары і браты братам зь язычнікаў у Антыахіі, Сірыі і Кілікіі: радавацца.

²⁴Таму што мы пачулі, што некаторыя, выйшаўшы ад нас, устрывожылі вас сваімі казанямі і пахіснулі вашыя душы, кажучы, што трэба абразацца і трымацца закона, чаго мы ім не даручалі;

²⁵дык мы, сабраўшыся, аднадушна разважылі паслаць да вас выбраных мужоў зь любаснымі нашымі Варнавам і Паўлам,

²⁶людзьмі, якія аддалі душы свае за імя Госпада нашага Ісуса Хрыста.

²⁷І вось мы паслалі Юду і Сілу, якія высьветляць вам тое самае і словамі.

²⁸Бо заўгодна Сьвятому Духу і нам не ўскладаць на вас ніякага цяжару болей, апрача гэтага неабходнага:

²⁹устрымлівацца ад ідалаахвярнага і крыві, і душанага і распусты, і не рабіць іншым таго, чаго сабе ня зычыце; трымаючыся гэтага, добра зробіце. Будзьце здаровыя».

³⁰І вось пасланцы прыйшлі ў Антыахію і, склікаўшы людзей, уручылі пісьмо.

³¹А яны, прачытаўшы, узрадаваліся настаўленьню гэтаму.

³²Юда і Сіла, якія таксама былі прарокі, шчодрым словам далі настаўленьне братам і ўмацавалі іх.

³³Пабыўшы там якісь час, яны зь мірам адпушчаны былі братамі да апосталаў;

³⁴але Сілу надумалася застацца там, а Юда вярнуўся ў Ерусалім.

³⁵А Павал і Варнава жылі ў Антыахіі, навучаючы і зьвястуючы, разам зь іншымі многімі, слова Гасподняе.

³⁶Па пэўным часе Павал сказаў Варнаву: хадзем зноў, наведаем братоў нашых ва ўсіх гарадах, у якіх мы прапаведалі слова Гасподняе, як яны жывуць.