Aposolo Jaŋere Binaŋ 2:12-36

¹²Ŋic jaŋe iŋuc murâ maŋjeŋic goroŋkeme kâuc barâ nazaŋ gazaŋ erâ mumbiŋ, “I wemo mâsi mo?”

¹³Gâcnezi ine aposolo mufec muriŋ ejarehuc mumbiŋ, “Jaŋe waiŋ opâ gapecmâc nâmbieŋte maŋjeŋic bibiriwakac.”

¹⁴Eme Petoro e âgofâcne 11 jaŋehec domahuc dâŋ hahaŋne barâ ʒiŋuc jazawec: “Judaŋic â Jerusalem haeo juŋgopieŋ sasawa, no dâŋ ŋazape hazec‐ŋeŋic râerâ mananiŋ.

¹⁵Ŋoŋe ŋic kecʒi jaŋere muŋgopieŋ ‘Waiŋ opâ nâku maŋjeŋic bibiriwakac.’ Iŋuc aricne. Hae miŋecne furekacte wemocko waiŋ opâ nanʒapeŋ.

¹⁶Porofete Joelezi findaŋdâŋ kecʒiŋuc qâreŋkewec i sanaŋkekac hâcne:

¹⁷‘Anutuzi mukac: Juku mâreŋ dameŋne bembeŋkeha, no Mâro‐nane ŋic ʒeŋgoma sâcke‐jarepemu; eme otâ ŋokâfâc‐ŋeŋic findaŋdâŋ muniŋmu, socɋârifâc‐ŋeŋic wiac ʒâŋe furu honeniŋmu, â ŋic ŋokac qizecfâc‐ŋeŋic guŋ fârine mananiŋmu.

¹⁸Erâ kiŋaŋ qaqa ŋic ŋokacfâc‐nane dameŋ ira Mâro‐nane sâcke‐jarepe findaŋdâŋ muniŋmu.

¹⁹Erâ mupe faic sambâŋko ʒâŋe furu wiac fuaocmu, â juwic mâreŋko fuŋne qaqa mâsi fuaocmu, soc â ʒoc â hosâc rombâŋ.

²⁰Ʒoaŋ ʒâŋene hâpoocmu, â mosa ʒâŋene socsoc eocmu, ehame Wofuŋte dameŋ maickeocmu, dameŋ biaŋ sâko hâcne.

²¹Eme ira Wofuŋte ʒâŋe riwaseckeniŋmu, jaŋe sisipirickonec batarac‐jopazo.’

²²“Israe ŋicbureŋ no ŋazape mananiŋ: Jesu Nazarete haeonec e Anutuzi neŋgoc ŋesiŋ ŋecnehame ŋondeŋ‐ŋeŋicko tâpiri sâko‐ticnezi mâsi â wiac ʒâŋe furu bahuc, Anuturaonec wahawec, irec fuŋne‐ticne bataniŋkeme honembiŋ.

²³E hâcne Anutuzi mârâc jaha maname fowecte hata mutaracnewec irec sâcko ŋoŋe wiac ecnehuc doc barâ ŋic qâpuc jaŋerao râepie maripoŋko qapie hâmowec.

²⁴E hâcne hâmoczi gozi kime Anutuzi gozi bacneme ɋârerâ faharewec. Hâmoczi e wemocko sakarezac.

²⁵Dawidizi ere hâcne kecʒiŋuc muwec: ‘No Wofuŋ hone dendeŋnehuc mi beheekopac, e fâre‐naneo domahame biric boroc mi epemu.

²⁶Irec bunane biaŋkeme nameŋzi mu ʒeri ekopac, erâ sahac‐nanezi wâc sâcne ŋec foc eocmu. Go mi qaisocnutec hâmoc haeo ʒâziŋkepemu, â Tiriŋicge mi behetec gârecke ʒaŋ eocmu.

²⁸Go jujure hata nowatumeŋ, maigao ʒeri bubiaŋ guru dindiŋ bâfua‐narecmu.’

²⁹“Âgo bureŋ, no mimiŋne‐nâŋec Dawidi ere acmâc ŋazape, e hâmome duckembiŋ, eme ʒâŋeruŋ‐ticne hone manac ehuc jueŋgopeneŋ.

³⁰E porofete juweczi ʒiŋuc manawec: Anutu e ɋâricfâc‐nane jaŋeraonec moc âkendâŋneme nore ŋicwofuŋ ŋeŋetacko ŋeocte mupaŋke‐narewec.

³¹I manahuc juwicnao Kristo fafahare‐ticnere hâcne muwec, ‘E hâmoc mi qikiŋnecneocmu â sahac‐ticne gârecke ʒaŋ mi eocmu.’

³²Eme Jesu e hâcne Anutuzi baɋâreme fahareme nâŋe ʒâŋe fâri‐nâŋeczi hone‐fârembeŋ.

³³Eme Anutu mefârenao risie feme Tiri Mâro biŋe qanâre‐kicne e hâcne Mamaczi qikiŋnecneme soreme wahame fuŋne‐ticne hone manac eŋgopieŋ ʒine hâcne.

³⁴Dawidi e jahacne sambâŋko mi fewec, mâc dâŋ kecʒiŋuc ine muwec: ‘Wofuŋzi nore Wofuŋ âzâcnewec: Ware fâre‐naneo ŋehaŋtec,

³⁵râsifâcge guruc‐jopape kikegere ââtesiŋ enʒepieŋ.’

³⁶Irec Israe ŋic mâmâc sasawa ʒiŋuc mana sanaŋkenʒepieŋ: Ŋoŋe Jesu maripoŋko qambiŋ, e Anutuzi Wofuŋ â Kristo âkendâŋne‐nârewec jukac.”