Aposel 2:12-36

¹²Egha Judan gumaziba dɨgavir kuram gamighava pura okam nɨghnɨghava uarir azangsɨsi, “Kar bizir tizim?”

¹³Ezɨma Judan gumazir maba dɨbovir akabar mɨgɨa ghaze, “Me wainɨn dɨpar avɨriba amegha ongani.”

¹⁴Ezɨ Pita 11 plan aposelba ko tughav ikia, egha a gumazamiziba pamtem kamaghɨn me mɨgei, “Ia Judaba koma Jerusalemɨn itir gumazamiziba, ia bar deraghvɨram na baragh. Kɨ bizir otozir kamɨn gun ia mɨkemeghtɨma, ia a gɨfogham.

¹⁵Gumazir kaba wainɨn dɨpamɨn onganizir puvatɨ. Ia fo, kar 9 kloghɨn mɨzarazimra.

¹⁶Bizir otozir kam, kar Godɨn akam inigha izir gumazim Joel fomɨra mɨkemezir moghɨn,

¹⁷‘God kamaghɨn mɨgɨa ghaze, Dughiar gɨn izamibar kɨ uan Duam gumazamiziba bar me danɨngam. Eghtɨma ian otariba ko guiviba Godɨn akam inigha izir gumazibar mɨn mɨkɨmtɨma, ian gumazir igiaba irebabar mɨn bizibar gantɨma, ian gumazir ghuriba irebabar ganam.

¹⁸Eghtɨ nan ingangarir gumazamiziba, kɨ uaghan uan Duam dughiar kabar me danɨngam, eghtɨma me Godɨn akam inigha izir gumazibar akabav kɨmam.

¹⁹Eghtɨ kɨ pɨn overiamɨn dɨgavir kuram gamir arazibar akakagh, egh nguazimɨn mirakelɨn arazibar amuam. Eghtɨ ghuzim ko avim ko muturir dafam otogham.

²⁰Eghtɨma aruem mɨtarmeghtɨ, iakinim ghuzimɨn mɨn otogham. Bizir kaba faragh otivightɨ, gɨn Ekiam Izamin Dughiam otivam. Dughiar kam Ekiam uan gavgavim ko angazangarim sara izam.

²¹Ezɨ Ekiamɨn ziamɨn deir darasi, a ua me inigham.’

²²“Israelɨn gumazamiziba, ia mɨgɨrɨgɨar kam baragh. Nasaretɨn Iesus, God ia baghava anemadagha gavgavim a ganɨngizɨma, ezɨma a ian aven ingangarir gavgavir ekiaba koma mirakelɨn gavgavibar ian tongɨn bizibagh amizɨma, da otivizɨma ia dar ganigha uari fo.

²³God uan ifongiamɨn gɨn ghua ia bagha fomɨra nɨghnɨzir mam gamigha, uan otarim isava ian agharim gatɨ. Ezɨma ia gumazir kurabar agharimɨn, ia a isava ter ighuvim gatɨghava a gafuzɨ, an areme.

²⁴Ovevem bar Iesusɨn suiraghan kogham. Kamaghɨn, God a gamizɨ a dɨkavigha ovevemɨn osɨmtɨzim ataki.

²⁵Devitɨn Ighiabar Akɨnafarim kamaghɨn mɨkeme, ‘Kɨ Ekiamɨn garima a zurara bar nan boroghɨn ikiavɨra iti. A gavgavim na ganɨdi. Eghtɨ bizitam na damutɨ, kɨ akongɨva atiatiatingan kogham.

²⁶Ezɨma nɨ na ateghtɨma kɨ ariaghrezibar tongɨn mozimɨn aven ikian kogham. Egh nɨ ua bagha inabazir gumazim aneteghtɨma an nivafɨzim kurighan kogham. Kamaghɨn nan navim derazɨ kɨ mɨgɨrɨgɨar aghuibagh ami. God na damuamin bizir aghuiba, kɨ da bagha mɨzuai.

²⁸Nɨ, ikɨrɨmɨrir aghuarim iniamin tuavim, a nan akagha gɨfa. Nɨ na ateghtɨ kɨ nɨ ko ikiam, egh nɨ na damutɨ, kɨ bar akuegham.’

²⁹“Nan adarasi, kɨ guizbangɨra ia mɨgei, en ovavim Devit aremezɨma me anefa. Ezɨma an dagɨar mozim datɨrɨghɨn e ko ikia kati.

³⁰Egha, Devit a Godɨn akam inigha izir gumazir mam, egha a fo, God mɨgɨrɨgɨar gavgavim a ganiga ghaze, ‘Nɨn atrivir danganimɨn kɨ nɨn ovavitam afagham.’

³¹God gɨn damuamin bizim, Devit a gɨfo, a Gumazir God Uam E Iniasa Mɨsevezim, Krais, an aremegh ua dɨkavamin bizim mɨgei. Egha ghaze, God aneteghtɨma an ariaghrezibar tongɨn mozimɨn aven ikian kogham. Egh an nivafɨzim kurighan kogham.

³²Ezɨ gumazir kam Iesus, God a gamizɨma a ua dɨkafi. Ezɨ e uari uan damazibar an ganigha, egha mɨgei.

³³Ezɨma a ghuavanaga uan Afeziam Godɨn agharir guvim gaperaghav ikia a da pɨn gavgavim isi. Ezɨ an Afeziam a mɨkemezir moghɨn God uan Duam Iesus ganɨngi. Ezɨ datɨrɨghɨn ia oragha garir bizir kaba, Iesus uabɨ dagh ami.

³⁴Devit Iesusɨn mɨn Godɨn Nguibamɨn ghuzir puvatɨ. Egha a kamaghɨn mɨgei, ‘Ekiam kamaghɨn nan Ekiamɨn mɨgɨa ghaze, “Nɨ kagh nan agharir guvimɨn daperagh.

³⁵Mamaghɨra ikɨtɨma kɨ nɨn apaniba dɨkabɨraghtɨ me nɨn apengan ikiam.” ’

³⁶“Ezɨ kamaghɨn amizɨ, ia Israelba ia bar bizir kam gɨfo, ia mɨsuegha ter ighuvimɨn gurazir Iesusɨn kam, datɨrɨghɨn God a gamizɨ an Ekiamɨn oto, a Krais, God Uam E Iniasa Mɨsevezir Gumazim.”