Aposolo Jaŋere Binaŋ 21:19-33

¹⁹Fisipie Paulozi mejeŋicko barâ, Anutuzi neŋgoc ŋesiŋ ŋecnehame qâpuc jaŋerao miti gie bame fârine fuawec, irec dâŋ binaŋ ninic jaha ejarewec.

²⁰Paulozi dâŋ binaŋ ejare tarame Anutu muteŋkerâ Paulo ʒiŋuc âzâcnembiŋ: “Manakic, qomâ‐nâŋec Paulo, Judaŋic tauseŋ guru wemo afecnezi Jesure kikefuŋ embiŋ juŋgopieŋ. Eme jaŋe mâmâc sasawa sâcmutâc dâŋ ʒoɋac erâ dopeckeeŋgopieŋ.

²¹Ehame gore dâŋ ʒiŋuc wareme manaeŋgopieŋ: ‘Judaŋic qâpuc jaŋere ŋondeŋko juraŋgopieŋ jaŋe Mosere dâŋ qikiŋneniŋte jazaekac, ehuc ɋiefâc‐jeŋic jaŋere sahacko ma mi bajareniŋte muac‐jopaekac, â Judaŋic juju hata‐nâŋec beheniŋte qafeŋ‐jopaekac.’

²²Hae ʒirec ŋic jaŋe gore iŋuc manaeŋgopieŋte weniŋuc ezo? Go Jerusalem haeo waremec irec biŋe mana‐fâreniŋmu.

²³Irec nâŋe dâŋ moc gazapene ezemec. Nâŋerao ŋic 4 juŋgopieŋ, jaŋe Anuturao mumupaŋ‐jeŋic râembiŋte qizec‐jeŋic mi bâbâtâc mâc jueŋgopieŋ.

²⁴Eme nâŋe jaŋerao ʒuhucgupene jaŋere sâcko wiac ehuc tiwâ bâzi furine bajaretec rikerâ qizec‐jeŋic bâtâcnenʒepieŋ. Go iŋuc etecne honecgurâ gore ʒiŋuc mananiŋmu: Dâŋticne wareme manambeŋ i fârimâc, e sâcmutâc dâŋ reŋkehuc juekac wâc.

²⁵Â qâpuckonec opâ ruac jaŋe nemuɋâŋte taha bâzi, qowisoc, qowi bituakicne â sasec boe sau irec sawa bâec baniŋte mupaŋke‐jarembeŋ.”

²⁶Eme Paulo e dâŋjeŋic manarâ ŋic 4 jaŋerao ʒuhuckeme hae fureme sahac ŋaqi wiac‐jeŋic ʒure emasaŋ erâ taha ufuŋko fembiŋ. Ferâ Paulozi mumupaŋ dameŋ tatarare â bâzi ririkere dâŋ taha bapa jaŋe jazawec.

²⁷Ʒoaŋ gie bapa 7 wiac ehuc juniŋte mumbiŋ i tarazo eha Paulozi taha ufuŋko ferâ juhame Asia mâreŋkonec Judaŋic jaŋe e honerâ ŋic mâmâc sasawa maŋjeŋic bâiŋnembiŋ.

²⁸Ehuc Paulo rorâ kuku qajarehuc mumbiŋ, “Oe, Israe ŋicbureŋ, ware bafic‐nâponiŋ! Ŋic ʒizi mâreŋ sâc jurahuc Judaŋic nâŋâc râsi enârehuc sâcmutâc dâŋnâŋec â ufuŋ‐nâŋec ʒi mu qâsuac ehuc juekac. Erâ wâc ufuŋ‐nâŋecko Grikŋic jowac‐jopame wefuhuc furufic ʒi gâc hecneŋgopieŋ.”

²⁹Paulo e Efeso haeonec ŋic Trofimo ehec haeo rac warec eme honerâ mana sifuckehuc mumbiŋ, taha ufuŋko jowa wefujec.

³⁰Paulo e iŋuc ecnepie haeŋic mâmâc sasawa kike saoŋ qajareme ɋuruŋ herâ qâture‐fârembiŋ. Ehuc ŋic gâcnezi Paulo rorâ ufuŋkonec fâre wahambiŋ. Fâre wahapie izia motâc hembiŋ.

³¹Ŋic jaŋe Paulo rorâ qâhâmozo ehapie biŋe Roma momori jaŋere soŋaŋ sâkorao rame ʒiŋuc manawec: “Jerusalem ŋic jaŋe mâmâc sasawa râsi roroc eŋgopieŋ.”

³²Dâŋ iŋuc manarâ izia momori fekicne wahakicne rocjopame ɋuruŋ ɋuruŋ rambiŋ. Eme ŋic jaŋe Paulo qahuc juhapie soŋaŋ sâko â momorifâc‐ticne fisipie honec‐joparâ behembiŋ.

³³Eme momori soŋaŋ sâkozi fisirâ Paulo jowac rorâ mume kâpâcwâru jajaheczi bândeŋnembiŋ. Erâ Paulo ʒâŋe‐ticnere â wemo wiac ewec irec iindiŋ gie bawec.