Afasoro 14:5-14

⁵I imusu orouini Du orouini emua yawokeibisa orouini emuama i afasoro orou omama ufiakane weisaro Foruini Banabasini emuama ibai nauisi.

⁶Nauisike i goi sabu meisike Raikonia orofa Risidaini Debe goiyairo emua iro anisi. Iro anisike i goiyaini i orofa goi goi iro anisike Yesunu wake weada eneiareibisi.

⁸Moi Risida goi mi danu umu daba mamiro enare fare me. Dawa danu amaema dori arima enare fare mero uwararo mane ibeibi.

⁹Foruini Banabasini emua fakiro i mima Forunu wake nauiro Foruma i mi erenewaa ukaada i mi dawa wirofine imukakua eno we imuike daiwereroma eno wei, anu umuma uyare enaa wei. Eno weibaie i mi idua sabu uyarike enari.

¹¹Eno uiro i ku siane ibisa orouma ibai ekake emenu Raikonia wakeroma eno weisa, moi godi ba eme ari iyabairo farisaya eawe weisa.

¹²Eno weisake emenu godi danu ibiye Dufada, danu ibiye Banabasinu moi ibi mamisa. Nono Foru dawae wake weeka mi ibake danu moi ibiye Makari mamisa.

¹³I godi Dufada danu uwara i goi barunaro enare ibi. I Dufadanu uwararo ofereni odeka miye segina segina uike boromakau unama ofereni odifine uwara aisamero waure fari.

¹⁴Waure fariro Foruini Banabasini emuama i wake nauisike imukada emenu wau ma gagane budebade uisike i oroubairo ane fakike eno weisi, anemebake eno ukaisa weisi? Eno weisike eno weisi, uwae godi mero uwae ba eme, ya ari enoya weisi. Irau wake wefune yabairo farisua weisi. I irau wakeye eno, i ba me godie mediaweke oweaweke i me ibene ibene ibeka Godibairo yanu imuka yaisina iro odiawe weisi. Eno weisike nono weisi, i ba Godima ureini dooini dawaraini eraerabusa yaisina ubu uia dawa mane imuawe weisi.