Acts 14:5-14

⁵Edo Jew embobo de embo Jew ae amimi ungoda gitijijigegari de dada edo ainda ge awa dada sedo sisera awa ungo mi Iesu da binga atopapotegari embobo da yei wasiri bebegae edo edo ganuma mi wawara edo doro bebetegorase sisera.

⁶Edo Iesu da binga atopapotegari embobo ungo ro adi sia era awa ingido ungo oju sumbudo Lystra de Derbe nati de busu Lycaonia da ainda mambudo ainda edo ainda yei demonda jiroroka ari ainda binga ewamei awa atopapotisera.

⁸Lystra nati da embo da awa tei ambari gido anumbedo atima isira. Edo uso ai mi burisira iji ainda bugudo Paul mane mambusera iji ainde awa umo meani pepeta aera.

⁹Edo umo anumbedo atise Paul da ge awa ingisira. Edo Paul embo awa gebe ira God mi umo ari ewamei adira awa gido, gido umo embo awa gongon edo gogo dimbudo sisira, “Erido dagaia derio.” Setiri embo awa kekepuinya edo souedo erido pepeta adi tuturo isira.

¹¹Edo embo jiwae be Paul mi ro isira awa gido ungoda Lyaconia ge mi gogo dimbuse sisera, “God mane teta embo inge edo ingodenaso yei wostera.”

¹²Edo Barnabas da jawo awa ungoda god ove kewari da jawo awa Zeus itido edo Paul da jawo awa ungoda god ove kewari da jawo awa Hermes itido isera ainda be awa embo re Paul mi ge re sisira awasedo.

¹³Edo god Zeus da uso mando embo mi umo ainda tumondebain edo isera awa nati ponda ainda ititisera. Edo Zeus da priest mi wo de ri wuji de budo nati jiwa da bugusera ainda be awa umo de embo jiwae be de amimi Iesu da binga atopapotegari embobo da yei rorou itadi sedo.

¹⁴Edo Barnabas de Paul de ungo ro adi era awa ge ingido ungoda sini bo jigido torere torere isera ainda be awa ungo embomei ro adi era awasedo dubo vevera isera.