Aposel 14:5-14

⁵Guzenaimai, Zuda duailel ipal mui, emgasag ipal ebuan duailel mui, goagal dudu banban ereg gotulaimai, goagen Yesus nugau ze oi aidanemen dudu eg maraimai, aiwag sil ugarebi, noumamam aimai dabilemenin.

⁶Yesus nugau ze oi aidanemen dudu go ze go doimai, Likonia agaig agal ban uzan aliag wanimag Listra mui Derbe mui ipal em uzan go waugab uminai wanemenin.

⁷Go ebu go Yesus nugau Ze Naliupet duailel maremenin.

⁸Listra uzanan du tub go gonugau arab ubuneun mui dareun. Go anag nug arab ubuneun mui soligweun, gonun, go aidabun iborain tam.

⁹Go hoboi daimai, Pol nug Uwait nugau Ze mareun doi dareun. Pol gue du gonugau ougab petak eun abe maimai, go naliu usalabun iboin, gusig uligaimai, duailel ameagab ebu aureun, “Na asaib, em e tapen.” Pigai, du go gonugau arab ubuneun silikaimai, em tapeun.

¹¹Duailel gugeg go Pol nug meun uligaimai, goagal ze eiman gusig ulaimai, enemen, “Igual em Uwait go du sul alaloimai, ig ebiligeb alemen.”

¹²Guzenaimai, goagen Barnabas wanib go Sus emenin. Pol go ze maraneun du, gonun, gonugau wanib Hermes emenin.

¹³Go em Uwait Sus nugau ula dacaneun du, gonugau zobu zau uzan go uzaneim dareu, go ze go doimai, bulumakau zawai ipal mui, a sisil iweiu naliu mui oimai, uzan gilan waugab zoun. Gonugau duailel mui Yesus nugau ze oi aidanemen dudu go agal wanimag ebu agaimai, ulagwag marabun zomenin.

¹⁴Yesus nugau ze oi aidanemen dudu Barnabas zaug Pol dual, go igul go mabun dabilei daimai, goagal oiagab eg waimai, goagal tibur galau bigagaimai, pigai duailel go ula beteimai, awaremen, “Igual zaiger, ag igul go einen mabun dabilemen? Ig du ag sul, ig em Uwait tam. Ig e ebu Uwait nugau Ze naliu awarabun alemun. Ag polu wes go semoroiban, Uwait go awau dacaneu, go nug emes mui, em mui, ibut ze mui, ece unum patai meun, goen tutak agal oiagab petak an.